Зебур 148 - Мукъаддес Китап

Бутюн дюнья Алланы макътасын!

¹ Эльхамдюлилля! Коктен РАББИни макътанъыз, тёпелерде Оны макътанъыз!

² Эй, Онынъ бутюн мелеклери, Оны макътанъыз! Эй, Онынъ бутюн ордулары, Оны макътанъыз!

³ Эй, кунеш ве ай, Оны макътанъыз! Эй, бутюн нурлу йылдызлар, Оны макътанъыз!

⁴ Эй, коклернинъ коклери, эй, кок устюндеки сувлар, Оны макътанъыз!

⁵ Олар РАББИнинъ Адыны макътасынлар. О, эмир этти, ве олар яратылды.

⁶ О, оларны эбедий ерлештирди, оларгъа бозулмайджакъ бир низамнаме берди.

⁷ Эй, денъиз аждерхалары ве тюбю олмагъан чукъурлар, ерден РАББИни макътанъыз!

⁸ Эй, атеш ве бурчакъ, къар ве туман, Онынъ эмирини ерине кетирген боран!

⁹ Эй, дагълар ве бутюн байырлар, мейва тереклери ве кедрлернинъ эписи!

¹⁰ Эй, джанаварлар ве бутюн тувар, сюйрекленгенлер ве къанатлы къушлар!

¹¹ Эй, дюнья падишалары ве эписи халкълар, ёлбашчылар ве ернинъ эписи башлары!

¹² Эй, йигитлер ве къызлар, къартлар ве яшлар!

¹³ Эписи РАББИнинъ Адыны макътасынлар! Ялынъыз Онынъ Ады Юджедир! Онынъ буюклиги ер ве кок устюнде кенишлей!

¹⁴ РАББИ Озь халкъы ичюн бойнуз котерди; Озь азизлерининъ эписине, Исраиль огъулларына, Озюне якъын олгъан халкъына макътав йырыны берди! Эльхамдюлилля!