Зебур 147 - Мукъаддес Китап

Исраильни Алланы макътамагъа чагъырув

¹ Эй, Ерусалим, РАББИни макъта! Алланъны макъта, эй, Сион!

² О, къапуларынънынъ мандалларыны пеките, ичинъдеки огъулларынъа эйилик тиле,

³ сынъырларынъ ичинде аманлыкъ бере, энъ яхшы богъдайнен сени тойдура.

⁴ О, ер юзюне Сёзюни ёллай, Онынъ Келимеси тез етип бара.

⁵ О, юнь киби къар ягъдыра, куль киби къырав сача.

⁶ О, парчачыкълар киби Озь бурчагъыны ташлай; Онынъ аязына ким даяныр?

⁷ О, сёзюни ёллар – эписи ирир, Озь елини ёллар – сувлар акъар.

⁸ О, Озь Сёзюни Якъупкъа бильдирди, Озь низамнаме ве къарарларыны Исраильге берди.

⁹ Башкъа ич бир халкъ ичюн япмады буны, олар Онынъ къарарларыны бильмейлер. Эльхамдюлилля!