Зебур 14 - Мукъаддес Китап

Ким Алланынъ огюнде турмагъа ляйыкъ

Давутнынъ зебуры.

¹ Я РАББИ, Сенинъ эвинъде ким отураджакъ? Ким мукъаддес дагъынъда яшайджакъ?

² Къабаатсыз юрген, адалетни къорчалагъан, юрегинден акъикъатны айткъан адам.

³ Онынъ тили ошек айтмаз, о, достуна яманлыкъ япмаз, якъын адамыны акъаретлемез.

⁴ Аллагъа сайгъысызлыкъ косьтерген адамны онынъ кореджек козю олмаз, амма РАББИден къоркъкъанларны о, урьмет этер, озь зарарына олса да, берильген сёзюни беджерир.

⁵ О, кумюш парасыны борджкъа берип, фаиз алмаз, гунасызны къараламакъ ичюн, бахшыш алмаз. Бойле яшагъан адам ич бир вакъыт сарсылмаз.