Зебур 138 - Мукъаддес Китап

Алла эр шейни коре

Баш чалгъыджы ичюн. Давутнынъ зебуры.

¹ Я РАББИ, Сен мени сынадынъ, эм де билип алдынъ.

² Отурып-тургъанымны Сен билесинъ, тюшюнджелеримни узакътан анълайсынъ.

³ Юргенимде де, раатлангъанымда да Сен мени бакъасынъ, бутюн ёлларымны Сен эвельден билесинъ.

⁴ Даа бир сёзни агъзыма алмаздан эвель, Сен бутюн айтаджагъымны билесинъ, я РАББИ!

⁵ Огюмден ве артымдан мени сарып аласынъ, Озь къолунъны устюме къоясынъ.

⁶ Сени бильмек меним ичюн пек аджайип, юксектир о, акълым етмез онъа.

⁷ Сенинъ Рухунъдан къайда кетмек мумкюним? Сенинъ огюнъден къайда къачып олурым?

⁸ Эгер кокке чыкъсам – Сен о ердесинъ, олюлер дюньясына тюшсем – анда да Сенсинъ.

⁹ Шефакъ къанатларыны алып учсам, денъизнинъ узакъ четине кочип ерлешсем,

¹⁰ о ерде де Сенинъ къолунъ манъа ёл косьтерир, онъ къолунъ мени тутар.

¹¹ Эгер мен: «Къаранлыкъ мени къапласын, этрафымдаки ярыкъ геджеге айлансын», – десем де,

¹² къаранлыкъ биле Сен ичюн къара дегиль, гедже де куньдюз киби айдын, къаранлыкъ ве ярыкъ Сен ичюн бирдир.

¹³ Бутюн ичимни Сен яраттынъ, анамнынъ къурсагъында мени ясадынъ.

¹⁴ Санъа шукюр этем, чюнки мен аджайип олып яратылгъаным. Сенинъ ишлеринъ аджайиптир, буны джаным толусынен анълай.

¹⁵ Гизли оларакъ яратылгъанымда, ернинъ къурсагъында япылгъанымда, кемиклерим Сенден гизли дегиль эди.

¹⁶ Анамнынъ къурсагъында олгъанымда, козьлеринъ коре эди мени. Даа бир кунь биле яшамагъанымда, Сен куньлеримни тайинлеп, эписини китабынъа язгъан эдинъ.

¹⁷ Сенинъ тюшюнджелеринъ манъа пек азиздир, олар не къадар чокътыр, эй, Алла!

¹⁸ Оларны сайсам, къумдан да чокъ олып чыкъар эди. Мен уянгъанымда, але даа Сеннен бераберим.

¹⁹ Эй, Алла, Сен ярамай инсанларны ольдюргейдинъ! Узакълашынъыз менден, къанназ инсанлар!

²⁰ Арам ниетнен Сени тильге алалар, бошуна душманларынъ фитне этелер.

²¹ Я РАББИ, Сенден нефретленгенлерден мен нефретленмейимми? Санъа къаршы чыкъкъанлардан игренмейимми?

²² Бар нефретнен олардан игренем, озюме душман, деп саям оларны.

²³ Эй, Аллам, мени сынап, юрегимни билип ал! мени сынап, тюшюнджелеримни огренип ал!

²⁴ Бакъ, мен хавфлы ёлда дегилимми? Эбедийликке баргъан ёлгъа мени догърулт!