Зебур 135 - Мукъаддес Китап

Тешеккюр гимни

¹ РАББИге шукюр этинъиз! О, хайырлыдыр, – акъикъатен эбедийдир Онынъ севгиси!

² Аллаларнынъ Алласына шукюр этинъиз, – акъикъатен эбедийдир Онынъ севгиси!

³ Раббилернинъ Раббисине шукюр этинъиз, – акъикъатен эбедийдир Онынъ севгиси!

⁴ О, Озь башына буюк аджайип ишлер япты, – акъикъатен эбедийдир Онынъ севгиси, –

⁵ коклерни икметнен яратты, – акъикъатен эбедийдир Онынъ севгиси, –

⁶ ерни сувлар устюне пекитти, – акъикъатен эбедийдир Онынъ севгиси, –

⁷ буюк ярыкъларны яратты, – акъикъатен эбедийдир Онынъ севгиси, –

⁸ куннинъ сабысы олсун деп, кунешни яратты, – акъикъатен эбедийдир Онынъ севгиси, –

⁹ гедженинъ сабысы олсун деп, ай ве йылдызларны яратты, – акъикъатен эбедийдир Онынъ севгиси!

¹⁰ О, Мысырда биринджи догъгъанларны ольдюрди, – акъикъатен эбедийдир Онынъ севгиси, –

¹¹ Исраильни андан алып чыкъарды, – акъикъатен эбедийдир Онынъ севгиси, –

¹² Озюнинъ къудретинен, кучь-къуветинен, – акъикъатен эбедийдир Онынъ севгиси!

¹³ О, Къызыл денъизни экиге больди, – акъикъатен эбедийдир Онынъ севгиси, –

¹⁴ Исраильни денъиз ортасындан кечирди, – акъикъатен эбедийдир Онынъ севгиси, –

¹⁵ фыравунны ве ордусыны Къызыл денъизге ташлады, – акъикъатен эбедийдир Онынъ севгиси!

¹⁶ О, Озь халкъыны сахрадан кечирди, – акъикъатен эбедийдир Онынъ севгиси, –

¹⁷ буюк падишаларны ольдюрди, – акъикъатен эбедийдир Онынъ севгиси, –

¹⁸ къудретли падишаларны ёкъ этти, – акъикъатен эбедийдир Онынъ севгиси, –

¹⁹ аморлыларнынъ падишасы Сихонны, – акъикъатен эбедийдир Онынъ севгиси, –

²⁰ ве Башаннынъ падишасы Огны ёкъ этти, – акъикъатен эбедийдир Онынъ севгиси!

²¹ О, оларнынъ топрагъыны мирас этип берди, – акъикъатен эбедийдир Онынъ севгиси, –

²² Озь къулу Исраильге мирас этип берди, – акъикъатен эбедийдир Онынъ севгиси!

²³ Хор олгъанымызда, О, бизни унутмады, – акъикъатен эбедийдир Онынъ севгиси, –

²⁴ ве душманларымыздан бизни къуртарды, – акъикъатен эбедийдир Онынъ севгиси!

²⁵ О, эр бир джангъа аш бере, – акъикъатен эбедийдир Онынъ севгиси!

²⁶ Коклернинъ Алласына шукюр этинъиз, – акъикъатен эбедийдир Онынъ севгиси!