Зебур 134 - Мукъаддес Китап

Макътав гимни

¹ Эльхамдюлилля! РАББИнинъ Адыны макътанъыз, Оны макътанъыз, РАББИнинъ къуллары,

² РАББИнинъ Эвинде ве Алламызнынъ Эви азбарларында тургъанлар!

³ РАББИни макътанъыз, чюнки О, хайырлыдыр! Адына йырланъыз, чюнки бу шей татлыдыр!

⁴ РАББИ Озюне Якъупны, Озь шахсий мулькиети оларакъ Исраильни сайлады.

⁵ Мен бильдим ки, РАББИ улудыр, Раббимиз бутюн аллалардан устюн.

⁶ Ер ве коклерде, денъизлер ве бутюн теренликлерде РАББИ истегенини япа.

⁷ Ернинъ четинден О, булутларны котере, ягъмур ичюн яшын ярата, Озь хазинелеринден ельни чыкъара.

⁸ О, инсанлардан тап айвангъа къадар Мысырнынъ биринджи догъгъан балаларыны къырды,

⁹ Мысыр ортасында фыравунгъа ве онынъ бутюн къулларына къаршы бельги ве аджайип аляметлер йиберди.

¹⁰ О, чокъ халкъларны ольдюрди, къудретли падишаларны ёкъ этти.

¹¹ Аморлыларнынъ падишасы Сихонны да, Башаннынъ падишасы Огны да, бутюн Ханаандаки падишалыкъларыны да О, ёкъ этип ташлады

¹² ве оларнынъ топракъларыны Озь халкъы Исраильге мирас этип берди.

¹³ Я РАББИ, Сенинъ Адынъ эбедийдир! Несиллернинъ эписи Сени хатырлар, я РАББИ!

¹⁴ РАББИ Озь халкъыны акълайджакъ, Озь къулларына мерамет этеджек!

¹⁵ Халкъларнынъ путлары – кумюш ве алтындыр, инсан къолларынынъ ишидир.

¹⁶ Агъызлары бар, амма лаф этмезлер, козьлери бар, амма корьмезлер.

¹⁷ Къулакълары бар, амма эшитмезлер, агъызларындан нефес чыкъмаз.

¹⁸ Оларны ясагъан адамлар, оларгъа ишангъанларнынъ эписи оларгъа ошап къаладжакъ.

¹⁹ Эй, Исраиль сою, РАББИни алгъышланъыз! Эй, Харуннынъ сою, РАББИни алгъышланъыз!

²⁰ Эй, Левийнинъ сою, РАББИни алгъышланъыз! Эй, РАББИден къоркъкъанлар, Оны алгъышланъыз!

²¹ Ерусалимде отургъан РАББИге Сиондан шукюрлер олсун! Эльхамдюлилля!