Зебур 118 - Мукъаддес Китап

Раббининъ Къануны Алеф

Алеф

¹ Не де бахтлыдыр къабаатсыз ёлунен, РАББИнинъ Къанунынен юрген адамлар!

² Не де бахтлыдыр РАББИнинъ шаатлыкъларыны сакълап, бутюн юрекнен Алланы къыдыргъанлар!

³ Олар къанунсыз ишни япмайып, РАББИнинъ ёлларындан юрелер.

⁴ Сен къаиделеринъни джиддий сакъламагъа Озюнъ бизге буюрдынъ.

⁵ Ах, низамнамелеринъни тутмагъа меним ёлларым баргъан олса эди!

⁶ О вакъытта утанмаз эдим, бутюн эмирлеринъе бакъып.

⁷ Догъру юрекнен Санъа шукюр этерим, Сенинъ адиль къарарларынъны огренип.

⁸ Сенинъ низамнамелеринъни тутарым, мени бутюнлей ташлап кетме!

Беит

Беит

⁹ Йигит озь ёлуны насыл этип темиз сакълар? Сенинъ Сёзюнъни тутса, бойле олур.

¹⁰ Мен Сени бутюн юрегимнен къыдырам, эмирлеринъден узакълашмагъа ёл берме.

¹¹ Санъа къаршы гуна япмамакъ ичюн, Сёзюнъни юрегимде сакъладым.

¹² РАББИге бинъ шукюрлер олсун! Низамнамелеринъни манъа огрет.

¹³ Агъзынъдан чыкъкъан бутюн къарарларны озь тилимнен хабер этем.

¹⁴ Сенинъ шаатлыкъларынъ акъкъында буюк байлыкъ акъкъында киби къуванам.

¹⁵ Къаиделеринъни теренден тюшюнирим, Сенинъ ёлларынъа тюшюнип бакъарым.

¹⁶ Къанунларынъдан зевкъ тапам, Сенинъ Сёзюнъни ич унутмам.

Гимел

Гимел

¹⁷ Къулунъа эйилик яп, сонъ мен яшап, Сёзюнъни тутарым.

¹⁸ Козьлеримни ачып ташла, ве мен Къанунынънынъ аджайип шейлерини корерим.

¹⁹ Мен бу дюньяда ят адамым, эмирлеринъни менден сакълама.

²⁰ Къарарларынъны эр вакъыт арзу этем, бундан джанымнынъ алы ёкъ.

²¹ Кибирли адамларны юзьлединъ, эмирлеринъден четлешкенлерге лянет.

²² Масхаралыкъ ве акъаретни менден узакълаштыр, чюнки мен шаатлыкъларынъны сакълап туттым.

²³ Башлыкълар отурып, манъа къаршы анълаша, къулунъ исе низамнамелеринъни тюшюнип бакъа.

²⁴ Сенинъ шаатлыкъларынъ манъа зевкъ бере, олар манъа акъыл огрете.

Далет

Далет

²⁵ Джаным топракъкъа япышып къалгъан, Озь Сёзюнънен мени джанландыр!

²⁶ Ёлларымны Санъа ачкъанымда, мени эшиттинъ, низамнамелеринъни манъа огрет!

²⁷ Къаиделеринънинъ ёлуны манъа анълат, аджайип шейлеринъни теренден тюшюнейим!

²⁸ Джаным кедерден иримекте, Сёзюнънен мени къуветлендир!

²⁹ Яланджылыкъ ёлуны менден узакълаштыр, Къанунынъны манъа багъышла!

³⁰ Мен акъикъат ёлуны сайладым, къарарларынъны алдыма къойдым.

³¹ Шаатлыкъларынъа къатты япыштым, мени масхара этме, я РАББИ!

³² Сен манъа чокъ шейлерни анълаткъанынъ ичюн, эмирлеринъ ёлундан чапып кетерим.

Хе

Хе

³³ Я РАББИ, низамнамелеринънинъ ёлуны манъа огрет, оларны сонъунадже тутып беджеририм.

³⁴ Манъа анълав бер, ве мен Къанунынъны беджеририм, оны бутюн юрегимнен тутарым.

³⁵ Мени эмирлеринъ ёлуна къой, чюнки шуны мен истедим.

³⁶ Юрегимни акъсыз къазанчкъа дегиль, Озь шаатлыкъларынъа чевир.

³⁷ Козьлеримни бош шейлерден бур, Озь ёлларынъда мени джанландыр.

³⁸ Сенден къоркъкъанларгъа берген Сёзюнъни Озь къулунъ ичюн де ерине кетир!

³⁹ Мен къоркъкъан акъаретни менден узакълаштыр, чюнки Сенинъ къарарларынъ хайырлыдыр.

⁴⁰ Сенинъ къаиделеринъни истедим, Озь адалетинънен джанландыр мени.

Вав

Вав

⁴¹ Берген Сёзюнъе коре, я РАББИ, буюк севгинъ ве къуртарувынъ манъа кельсин!

⁴² О вакъыт мени акъаретлегенлерге джевап берерим, чюнки Сенинъ Сёзюнъе ишандым.

⁴³ Агъзымдан акъикъат сёзлерини бутюнлей тартып алма, мен Сенинъ къарарларынъа умют багъладым.

⁴⁴ Сенинъ Къанунынъны мен эр вакъыт, даима ве эбедиен сакъларым.

⁴⁵ Юрегим сербест олып юрерим, чюнки къаиделеринъни къыдырдым.

⁴⁶ Падишалар огюнде шаатлыкъларынъ акъкъында айтарым, эм де ич утанмам.

⁴⁷ Мен Сенинъ эмирлеринъден зевкъ алырым, чюнки оларны севдим.

⁴⁸ Къолларымны севген эмирлеринъе узатырым, низамнамелеринъни теренден тюшюнирим.

Зайин

Зайин

⁴⁹ Къулунъа берген сёзюнъни хатырла, бунынънен умют бердинъ манъа!

⁵⁰ Беля кельген куньде о манъа теселлидир, чюнки Сёзюнъ мени джанландырды.

⁵¹ Къопайлар мени чокъ масхара эттилер, мен исе къайтмадым Къанунынъдан.

⁵² Я РАББИ, Сенинъ къадимий къарарларынъны ерине кетирдим ве теселли таптым.

⁵³ Къанунынъны ташлап кеткен яманларны корьгенимде, мени ачув баса.

⁵⁴ Эр бир яшагъан еримде низамнамелеринъ акъкъында йырладым.

⁵⁵ Я РАББИ, гедже Сенинъ Адынъны хатырлап, Къанунынъны сакълап туттым.

⁵⁶ О меним ичим олды, акъикъатен къаиделеринъни сакъладым.

Хет

Хет

⁵⁷ «РАББИ – меним къысметим», – дедим. Айткъанларынъны тутмагъа мен сёз бердим.

⁵⁸ Мен бутюн юрегимнен Санъа ялвардым: Сёзюнъе коре манъа мерамет эт.

⁵⁹ Мен ёлларымны тюшюнип бакътым, аякъларымны шаатлыкъларынънынъ тарафына бурдым.

⁶⁰ Эмирлеринъни тутмакъ ичюн ашыкътым, бу ёлда мен ич токътамадым.

⁶¹ Ярамайларнынъ тузакълары мени сарып алды, амма Сенинъ Къанунынъны унутмадым.

⁶² Адалетли къарарларынъ ичюн шукюр этейим деп, мен яры геджеде де турарым.

⁶³ Мен Сенден къоркъкъанларнынъ ве къаиделеринъни туткъанларнынъ эписине дост олурым.

⁶⁴ Я РАББИ, Сенинъ буюк севгинънен ер юзю толу, манъа низамнамелеринъни огрет!

Тет

Тет

⁶⁵ Я РАББИ, Озь Сёзюнъе коре, къулунъа яхшылыкъ эттинъ!

⁶⁶ Манъа сагълам дуйгъу ве бильги бер, чюнки мен эмирлеринъе инандым.

⁶⁷ Азап чекмезден эвель янълыша эдим, энди исе Сёзюнъни тутам.

⁶⁸ Сен яхшысынъ, яхшылыкъ япасынъ, низамнамелеринъни манъа огрет!

⁶⁹ Къопайлар артымдан ялан айта, мен исе бутюн юрегимнен къаиделеринъни тутарым.

⁷⁰ Оларнынъ юреклерини ич ягъы баскъан, мен исе Сенинъ Къанунынъдан зевкъ тапам.

⁷¹ Азап чеккеним манъа яхшы олды, чюнки низамнамелеринъни огренип алдым.

⁷² Бинълер алтын ве кумюштен яхшы Сенинъ агъзынъдан чыкъкъан Къанунынъ.

Ёд

Ёд

⁷³ Сенинъ къолларынъ мени яраткъан, ясагъан, эмирлеринъни огренмек ичюн манъа анълав бер!

⁷⁴ Сенден къоркъкъанлар мени корип севинир, чюнки Сенинъ Сёзюнъе умют багъладым.

⁷⁵ Я РАББИ, къарарларынъ адалетли олгъаныны билем, садакъатынъ ичюн мени къыйнадынъ.

⁷⁶ Къулунъа берген Сёзюнъе коре, буюк севгинъ манъа теселли олсун!

⁷⁷ Шефкъатынъ манъа кельсин, ве мен яшарым, чюнки Сенинъ Къанунынъдан зевкъ алам.

⁷⁸ Къопайлар масхара олсун, чюнки олар ялан айтып, мени яманлады. Мен исе Сенинъ къаиделеринъни тюшюнирим.

⁷⁹ Сенден къоркъкъан ве шаатлыкъларынъны бильгенлер меним тарафыма айлансын.

⁸⁰ Низамнамелеринъ ёлунда юрегимни темиз тутайым, сонъ Мен масхара олмам.

Каф

Каф

⁸¹ Къуртарувынъны беклеп, джаным иримекте, Сёзюнъе мен умют багъладым.

⁸² Сёзюнъни беклеп, козьлерим зайыфлаша; «Не вакъыт меним гонълюмни алырсынъ?» – дейим.

⁸³ Тютюн ичинде къуругъан мешин торбасына ошайым, лякин Сенинъ низамнамелеринъни унутмадым.

⁸⁴ Къулунънынъ омюри не къадар олур? Манъа зулум эткенлерни не вакъыт укюм этеджексинъ?

⁸⁵ Къанунынъа къаршы чыкъып, къопайлар манъа чукъур къаздылар.

⁸⁶ Бутюн Сенинъ эмирлеринъ ишанчлыдыр, лякин адамлар манъа адалетсиз зулум этелер; манъа ярдым эт!

⁸⁷ Мени ер юзюнден ёкъ этмелерине аз къалды, амма мен къаиделеринъни ташлап кетмедим.

⁸⁸ Буюк севгинъ ичюн мени джанландыр, Сенинъ агъзынъдан чыкъкъан шаатлыкъларынъны сакълап тутарым!

Ламет

Ламет

⁸⁹ Я РАББИ, Сенинъ Сёзюнъ эбедийдир, о, коклерде къатты ерлештирильген.

⁹⁰ Несильден несильге Сен ишанчлысынъ, Сен ерни къавий пекиттинъ, ве о, тура.

⁹¹ Къарарларынъа коре бу куньге къадар эр шей тура, чюнки Сенинъ къулларынъдыр бутюн барлыкъ.

⁹² Къанунынъдан зевкъ тапмагъан олсам, мен белядан ёкъ олып кетер эдим.

⁹³ Къаиделеринъни эбедий унутмам, чюнки оларнен мени джанландырасынъ.

⁹⁴ Мен Сенинъки олам, азат эт мени, чюнки Сенинъ къаиделеринъни къыдырам.

⁹⁵ Ярамайлар мени ёкъ этмек ичюн сакъланып туралар, мен исе шаатлыкъларынъны юрегимнен тюшюнип бакъарым.

⁹⁶ Эр бир мукеммель шейнинъ сонъуны корьдим, Сенинъ эмиринънинъ сонъу исе ёкъ.

Мим

Мим

⁹⁷ Не къадар севем Къанунынъны, о, бутюн кунь меним фикримде.

⁹⁸ Эмирлеринъ мени душманларымдан икметли япты, чюнки олар эр вакъыт меннен.

⁹⁹ Бутюн оджаларымдан акъыллы олдым, чюнки Сенинъ шаатлыкъларынъны тюшюнем.

¹⁰⁰ Акъсакъаллардан да зияде анълайым, чюнки Сенинъ къаиделеринъни сакълап тутам.

¹⁰¹ Сенинъ сёзюнъни тутмакъ ичюн, аякъларымны бутюн яман ёллардан сакъладым.

¹⁰² Сенинъ къарарларынъдан юзь чевирмедим, чюнки Сен Озюнъ мени огреттинъ.

¹⁰³ Сёзлеринъ тамагъыма татлы келе, агъзыма олар балдан гузель корюне!

¹⁰⁴ Къаиделеринъден акъыл огренгеним ичюн, эр бир ялан ёлундан нефретленем.

Нун

Нун

¹⁰⁵ Сенинъ Сёзюнъ адымларым ичюн лампаттыр, ёлума нур сачкъан ярыкътыр.

¹⁰⁶ Адалетли къарарларынъны беджерип тутмагъа ант эттим, эм антымны тутаджагъым.

¹⁰⁷ Мен пек чокъ азап чектим, я РАББИ, Сёзюнъе коре мени джанландыр.

¹⁰⁸ Я РАББИ, тилимдеки алгъышлав бахшышларындан разы ол, манъа къарарларынъны огрет!

¹⁰⁹ Джаным эр вакъыт хавфлы алда, Сенинъ Къанунынъны исе унутмадым.

¹¹⁰ Ярамайлар манъа тузакъ къойдылар, амма мен Сенинъ къаиделеринъден юзь чевирмедим.

¹¹¹ Шаатлыкъларынъны эбедий мирас этип алдым, олар юрегиме къуванч берелер.

¹¹² Низамнамелеринъе юрегимни бердим, омюр бою, сонъунадже оларны беджеририм.

Самек

Самек

¹¹³ Фикирлери экиге болюнген адамлардан нефретленем, Сенинъ Къанунынъны исе севем.

¹¹⁴ Сыгъынагъым ве къалкъаным Сенсинъ, Сенинъ Сёзюнъе умют багъладым.

¹¹⁵ Эй, Къанун бозгъанлар, менден узакълашынъыз, ве мен Алламнынъ эмирлерини беджерип юрерим.

¹¹⁶ Сёзюнъе коре манъа аркъа ол, ве мен яшап къалырым, умютимни масхара этме!

¹¹⁷ Манъа ярдым эт, ве мен къуртулырым, низамнамелеринъе дикъкъатнен бакъарым!

¹¹⁸ Низамнамелеринъден чыкъкъан адамларнынъ эписини Сен ред этесинъ, чюнки оларнынъ яланджы арекетлери бошуна!

¹¹⁹ Ер юзюндеки бутюн ярамайларны Сен куль киби чыкъарып ташлайсынъ, шунынъ ичюн шаатлыкъларынъны севдим.

¹²⁰ Сенден къоркъкъанымдан вуджудым титрей, къарарларынъдан мен пек къоркъам.

Айин

Айин

¹²¹ Мен догъру ве адалетли арекет эттим; манъа зулум эткенлернинъ къолуна берме мени!

¹²² Озь къулунъны онынъ хайыры ичюн къорчала, къопайлар манъа зулум этмесин!

¹²³ Сенинъ къуртарувынъны ве адалетли укюминъни беклеп, козьлерим ёрулды.

¹²⁴ Къулунъа буюк севгинъе коре арекет эт, манъа низамнамелеринъни огрет!

¹²⁵ Мен Сенинъ къулунъ олам, манъа акъыл бер, сонъ шаатлыкъларынъны анъларым!

¹²⁶ РАББИнинъ иш япмакъ вакъты кельди, чюнки Сенинъ Къанунынъны бозып ташладылар!

¹²⁷ Мен эмирлеринъни алтындан да, энъ темиз алтындан зияде севем.

¹²⁸ Бутюн къаиделеринъни догъру саям, эр бир ялан ёлундан исе нефрет этем.

Пе

Пе

¹²⁹ Сенинъ шаатлыкъларынъ аджайиптир, шунынъ ичюн джаным оларны беджере.

¹³⁰ Сёзюнъ ачылгъанда, ярыкъ сача, адий адамларгъа анълав бере.

¹³¹ Агъзымны ачып нефес алам, Сенинъ эмирлеринъни беклейим!

¹³² Адынъны севгенлерге япкъанынъ киби, манъа да бакъып, эйилик яп манъа!

¹³³ Сёзюнъде адымларымны пекит, ич бир беля манъа укюмдар олмасын!

¹³⁴ Инсанларнынъ зулумындан мени сатын алып къуртар, къаиделеринъни сакълап тутарым!

¹³⁵ Къулунъа юзюнънинъ ярыгъыны косьтер, низамнамелеринъни огрет манъа!

¹³⁶ Козьяшымны озен киби акъызам, чюнки адамлар Къанунынъны бозгъанлар.

Саде

Саде

¹³⁷ Сен адалетлисинъ, я РАББИ, къарарларынъ исе догърудыр.

¹³⁸ Сен берген шаатлыкъларынъ адалетли ве пек ишанчлыдыр.

¹³⁹ Куньджюлигим мени чекиштире, чюнки душманларым Сёзюнъни унуттылар!

¹⁴⁰ Сенинъ Сёзюнъ пек темиздир, къулунъ оны севди!

¹⁴¹ Мен кичиким, сайгъылы дегилим, лякин къаиделеринъни унутмадым.

¹⁴² Сенинъ адалетинъ эбедиен адалетлидир, Къанунынъ да даимийдир.

¹⁴³ Азап ве сыкъынты манъа кельди, эмирлеринъде исе зевкъ таптым.

¹⁴⁴ Шаатлыкъларынъ эбедиен адалетлидир; манъа акъыл бер, ве мен яшарым.

Коф

Коф

¹⁴⁵ Бутюн юрегимнен ялвардым: «Манъа джевап бер, я РАББИ, Сенинъ низамнамелеринъни тутарым».

¹⁴⁶ Сени чагъырдым: «Къуртар мени, шаатлыкъларынъны сакъларым!»

¹⁴⁷ Саба эрте турып, ярдым истейим, Сенинъ Сёзюнъе умют багъладым.

¹⁴⁸ Сёзюнъни тюшюнмек ичюн, гедже козьлериме юкъу бермейим.

¹⁴⁹ Буюк севгинъ ичюн сесимни эшит, я РАББИ, къарарларынъа коре мени джанландыр!

¹⁵⁰ Бозукъ ниетли адамлар манъа якъынлашты, олар Сенинъ Къанунынъдан узакътадыр.

¹⁵¹ Сен пек якъынсынъ, я РАББИ, бутюн эмирлеринъ исе – ишанчлыдыр.

¹⁵² Чокътан берли бильдим ки, Сен шаатлыкъларынъны эбедиен темеллештирдинъ.

Реш

Реш

¹⁵³ Заваллы алыма бакъып, мени къуртар, чюнки Сенинъ Къанунынъны унутмадым!

¹⁵⁴ Давамда меним тарафымны тут, мени сатын алып къорчала, Сёзюнъе коре мени джанландыр!

¹⁵⁵ Къуртулыш ярамай адамлардан узакътадыр, чюнки олар низамнамелеринъни къыдырмайлар.

¹⁵⁶ Сенинъ шефкъатынъ буюктир, я РАББИ, къарарларынъа коре мени джанландыр!

¹⁵⁷ Мени къувалагъанлар ве душманларым чокъ, амма Сенинъ шаатлыкъларынъдан мен юзь чевирмем.

¹⁵⁸ Имансыз адамларны корьдим ве олардан игрендим, чюнки олар эмирлеринъни тутмадылар.

¹⁵⁹ Бакъ, къаиделеринъни мен не къадар севем! Я РАББИ, буюк севгинъ ичюн мени джанландыр!

¹⁶⁰ Сенинъ Сёзюнънинъ темели акъикъаттыр, эр бир адалетли къарарынъ эбедийдир.

Син, Шин

Син, Шин

¹⁶¹ Башлыкълар себепсиз мени къуваладылар, юрегиме исе Сенинъ Сёзюнъ къоркъу бере.

¹⁶² Мен Сенинъ Сёзюнъ ичюн, буюк келир тапкъан киби къуванам.

¹⁶³ Яланджылыкътан нефретленип игренем, лякин Сенинъ Къанунынъны севем.

¹⁶⁴ Адалетли къарарларынъ ичюн эр кунь еди кере Сени алгъышлайым.

¹⁶⁵ Къанунынъны севгенлер буюк аманлыкъта яшайлар, оларнынъ огюнде маниа ёкъ.

¹⁶⁶ Къуртарувынъа умют багъладым, я РАББИ, Сенинъ эмирлеринъни беджерем.

¹⁶⁷ Шаатлыкъларынъны юрегимде сакълап юрем, оларны чокъ севем.

¹⁶⁸ Къаиде ве шаатлыкъларынъны сакълап тутам, чюнки бутюн ёлларым Сенинъ алдынъда.

Тав

Тав

¹⁶⁹ Агълавым Санъа барып етсин, я РАББИ, Сёзюнънен манъа акъыл бер!

¹⁷⁰ Ялваргъаным Санъа барып етсин, Сёзюнъе коре мени къуртар!

¹⁷¹ Низамнамелеринъни манъа огреткенинъ ичюн, дудакъларым Санъа макътавлар айтар!

¹⁷² Тилим сёзлеринъни йырлар, чюнки бутюн эмирлеринъ адалетлидир!

¹⁷³ Къолунъ манъа ярдым этсин, чюнки мен къаиделеринъни сайладым.

¹⁷⁴ Къуртарувынъны чокъ беклейим, я РАББИ, Къанунынъда мен зевкъ тапам.

¹⁷⁵ Джаным яшасын, Сени макътасын, къарарларынъ манъа ярдым этсин!

¹⁷⁶ Джоюлгъан къой киби, ёлумны шашырдым. Озь къулунъны къыдырып тап, чюнки эмирлеринъни унутмадым!