Зебур 113 - Мукъаддес Китап

Тири Алла ве путлар акъкъында

¹ Исраиль Мысырдан чыкъкъанда, Якъупнынъ сою ябанджы тильде лаф эткен халкътан айырылгъанда,

² Ехуда РАББИнинъ мукъаддес мескени олды, Исраиль де – Онынъ падишалыкъ эткен ери.

³ Денъиз суву бакъты да, къачты, Иордан озени артына акъты.

⁴ Дагълар къой киби секирди, байырлар къозу киби сычрады.

⁵ Эй, денъиз, санъа не олды да, къачасынъ? Иордан, не ичюн артынъа къайтасынъ?

⁶ Эй, дагълар, не ичюн къой киби секиресинъиз? Эй, байырлар, не ичюн къозу киби сычрайсынъыз?

⁷ Эй, ер юзю, Раббининъ алдында, Якъупнынъ Алласы алдында къоркъудан титре!

⁸ О, къаяны сув хавузына айландырды, чакъмакъташны исе – сув чокърагъына.

⁹ Бизлерге дегиль, я РАББИ, бизлерге дегиль, лякин Сенинъ буюк севгинъ ве вефадарлыгъынъ ичюн Озь Адынъа шурет бер!

¹⁰ Не ичюн халкълар: «Къана оларнынъ Алласы?» – дейлер.

¹¹ Бизим Алламыз коклердедир, О, истегенини япа.

¹² Оларнынъ путлары исе – кумюш ве алтындыр, инсан къолларынынъ ишлеридир.

¹³ Агъызлары бар, лякин лаф этмейлер, козьлери бар, амма корьмейлер.

¹⁴ Къулакълары бар – эшитмейлер, бурунлары бар – къокъу алмайлар.

¹⁵ Къоллары бар – сезмейлер, аякълары бар – юрмейлер, ве богъазларындан давуш чыкъмай.

¹⁶ Оларны ясагъан эр бир адам, оларгъа умют багълагъан эр кес олар киби олсун.

¹⁷ Эй, Исраиль, РАББИге умют багъла! О, сенинъ ярдымджынъ ве къалкъанынъдыр.

¹⁸ Эй, Харуннынъ сою, РАББИге умют багъла! О, сенинъ ярдымджынъ ве къалкъанынъдыр.

¹⁹ Эй, РАББИден къоркъкъанлар, РАББИге умют багъланъыз! О, сизинъ ярдымджынъыз ве къалкъанынъыздыр.

²⁰ РАББИ бизни эсинде тута. О, эйилик косьтерир: О, Исраиль халкъына эйилик япар, Харуннынъ союна эйилик япар,

²¹ РАББИден къоркъкъанларгъа – кучюк ве буюк олгъанларгъа – РАББИ эйилик япар!

²² РАББИ сизлерни ве огъулларынъызны къоша-къоша чокълаштырсын!

²³ Ер ве кокни яраткъан РАББИ сизлерге эйилик япсын!

²⁴ Коклернинъ коклери – РАББИнинъдир, амма ерни О, инсан огъулларына берген.

²⁵ Олюлер, сюкюнет диярына кеткенлер РАББИни макътамаз.

²⁶ Биз исе, шимдиден башлап эбедиен РАББИни алгъышлармыз! Эльхамдюлилля!