Зебур 108 - Мукъаддес Китап

Белягъа огърагъан адамнынъ шикяети

Баш чалгъыджы ичюн. Давутнынъ зебуры.

¹ Эй, мен макътагъан Аллам, сесинъни кесме!

² Ярамайлар ве хаинлер агъызларыны ачып, манъа ялан айталар.

³ Олар нефрет сёзлеринен мени сарып алдылар, себепсиз манъа къаршы силяландылар.

⁴ Севгим ичюн манъа душманлыкъ япалар, мен исе дува окъуйым.

⁵ Яхшылыгъым ичюн яманлыкъ этелер, севгиме къаршы нефрет берелер.

⁶ Бойле адамнынъ башына ярамай адамны къой, къабаатлайыджы турсун онынъ онъ тарафында.

⁷ О, суд къаршысына кельгенде, къабаатлы олып чыкъсын, дувасы гуна киби эсаплансын.

⁸ Омрю къыскъа олсун, онынъ ерине башкъасы отурсын.

⁹ Балалары оксюз къалсын, апайы тул олсун.

¹⁰ Огъуллары доланып тиленджилик япсын, озь виранелеринде отьмек сорасын.

¹¹ Бутюн малыны борджкъа берген адам тутып алсын, ишлерининъ махсулларындан башкъалары файдалансын.

¹² Онъа кимсе мерамет косьтермесин, оксюзлерине кимсе аджып бакъмасын.

¹³ Онынъ сою къырылып ташлансын, келеджек несильде адлары къалмасын.

¹⁴ Бабаларынынъ къабаатлары РАББИнинъ акъылына кельсин, аналарынынъ гуналары унутылмасын.

¹⁵ Оларнынъ къабаатлары эр вакъыт РАББИнинъ огюнде олсун, озюнинъ хатырасыны исе ер юзюнден сильсин.

¹⁶ О, яхшылыкъ этмеге ич тюшюнмеди, лякин фукъаре, факъырны ве алчакъ гонъюллини эзиетледи, оны ольдюрмеге истеди.

¹⁷ Лянетни севгеннинъ башына лянет тюшер, эйилик истемеген адамдан яхшылыкъ узакълашыр.

¹⁸ Лянетни о, урба киби кийсин, къаргъыш онынъ ичини сув киби урсун, кемиклерине зейтюн ягъы киби кирсин.

¹⁹ Лянет онъа эр вакъыт кийген урба, эр вакъыт къушангъан къушакъ олсун.

²⁰ Джаныма яманлыкъ тилегенлерни, душманларымны РАББИ бойле джезаласын!

²¹ РАББИ-ТААЛЯ, Адынънынъ урьмети ичюн манъа эйилик косьтер, чюнки Сенинъ севгинъ хайырлыдыр! Къуртар мени,

²² чюнки мен фукъаре ве факъырым, ичимде юрегим яралы.

²³ Акъшам кольгеси киби тез кечип кетем, сарынчкъа киби къувалар мени.

²⁴ Тизлерим аштан вазгечмектен титрей, терим кемигиме япышып къалды.

²⁵ Адамларнынъ акъаретине нишан олдым, манъа козь ташлап, башыны саллайлар.

²⁶ Я РАББИ, меним Аллам, ярдым эт манъа! Буюк севгинъни косьтерип, мени къуртар!

²⁷ Бильсинлер ки, бу Сенинъ къолунъдыр, буны беджерген Сенсинъ, я РАББИ!

²⁸ Олар лянет этсе де, Сен эйилик япарсынъ! Олар уджюмге атылса да, масхара олурлар! Сенинъ къулунъ исе севинир!

²⁹ Душманларым намуссызлыкъ урбасыны кийсин, утанчнен урба киби орьтюльсинлер.

³⁰ Дудакъларым РАББИни чокъ шуретлер, чокъ адам ичинде мен Оны макътарым!

³¹ РАББИ фукъаренинъ онъ тарафында турар, оны къабаатлагъанлардан джаныны О, къуртарыр.