Зебур 107 - Мукъаддес Китап

Алланынъ севгисине шукюр!

¹ Тюркю. Давутнынъ зебуры.

² Юрегим азыр! Йырларым ве чалгъы чаларым, эй, Алла, меним шуретим!

³ Уянынъыз, эй, арфа ве сантыр! Мен танъда турарым!

⁴ Халкълар арасында Сени шуретлерим, я РАББИ, миллетлер ичинде Санъа йырларым!

⁵ Сенинъ севгинъ коклерден де юксек, акъикъатынъ да булутларгъа узанып етер.

⁶ Эй, Алла, коклерден юкъарыгъа чыкъ, шуретинъ бутюн ер юзюни къапласын!

⁷ Севгенлеринъ азат олсун деп, къудретинънен оларны къуртар, эм де манъа джевап бер!

⁸ Алла Озюнинъ мукъаддес мескенинде айтты: «Тантана этип, Шекемни болерим, Сукъкъот вадийини ольчеп алырым.

⁹ Гилад Менимки, Менашше де Менимки. Эфраим – демир къалпагъым, Ехуда – падишалыкъ таягъым.

¹⁰ Моав – меним легеним; Эдомны аякъкъапларымнен басаджагъым, Фелестин топрагъында къычырып, гъалебемни илян этеджегим».

¹¹ Ким мени пекитильген шеэрге алып киреджек? Эдомгъа мени ким озгъарып бараджакъ?

¹² Эй, Алла, бизни ташлап кеткен Сен дегильсинъми? Ордуларымызнен берабер чыкъмайсынъ, эй, Алла!

¹³ Душмангъа къаршы куреште бизге ярдым эт! Инсаннынъ къуртарувы исе файдасыз.

¹⁴ Алланынъ ярдымынен батырлыкъ япармыз, душманларымызны О, ерге таптар.