Зебур 106 - Мукъаддес Китап

Раббининъ Озь халкъына севгиси

¹ РАББИге шукюр этинъиз! О, хайырлыдыр ве эбедийдир Онынъ севгиси!

² РАББИ сатын алгъан адамлар бойле айтсынлар! О, оларны душман къолундан къуртарды,

³ тюрлю мемлекетлерден топлап алды: шаркътан ве гъарптан, шималь ве дженюптен!

⁴ Олар сахрада, адам олмагъан ёлларда юре эдилер, адам яшагъан бир шеэр тапамадылар.

⁵ Ач олып, сувсуз къалгъан эдилер, джанлары ичлеринде иримекте эди.

⁶ Беляда РАББИни чагъырдылар, ве О, оларны азапларындан къуртарды.

⁷ О, оларны догъру ёлгъа чыкъарды, олар ерлешеджек ерге алып кетирди.

⁸ РАББИге шукюр этсинлер буюк севгиси ичюн, инсан огъулларына косьтерген аджайип ишлери ичюн!

⁹ О, сувсагъан джанны тойдурды, ач олгъан джанны эйиликнен толдурды.

¹⁰ Къаранлыкъта, олюм кольгесининъ тюбюнде къалдылар, демир зынджырларында азап чеке эдилер,

¹¹ чюнки Алланынъ эмирлерине къаршылыкъ косьтердилер, Юдже Алланынъ ирадесине хор бакътылар.

¹² О, агъыр ишнен оларнынъ юрегини йымшакъ этти, олар абынды, ярдымджылары исе ёкъ эди.

¹³ Беляда РАББИни чагъырдылар, ве О, оларны азапларындан къуртарды.

¹⁴ Къаранлыкъ ве олюм кольгесинден оларны азат этти, бугъавларыны сындырып ташлады.

¹⁵ РАББИге шукюр этсинлер буюк севгиси ичюн, инсан огъулларына косьтерген аджайип ишлери ичюн!

¹⁶ О, бакъыр араба къапуларны парча-парча этти, демир пармакълыкъларны сындырып ташлады.

¹⁷ Къанунсыз ёллардан кетип, олар ахмакъ олдылар, япкъан яманлыкълары ичюн азап чектилер.

¹⁸ Джанлары эр бир ашны ред этти, олюм араба къапусына якъынлаша эдилер.

¹⁹ Беляда РАББИден ярдым истедилер, ве О, оларны азапларындан къуртарды.

²⁰ Сёзюни ёллап, оларны тедавийледи, оларны мезарларындан чыкъарып алды.

²¹ РАББИге шукюр этсинлер буюк севгиси ичюн, инсан огъулларына косьтерген аджайип ишлери ичюн!

²² РАББИге шукюр къурбаныны кетирсинлер, Онынъ ишлерини къуванчнен къычырып бильдирсинлер!

²³ Гемилерде денъизге чыкъкъанлар да, буюк сувларда иш япкъанлар да

²⁴ РАББИнинъ ишлерини, теренликлерде косьтерген аджайип шейлерини корьдилер.

²⁵ О, эмир этти ве кучьлю боран кетирди, денъиз далгъаларыны юкъарыгъа котерди.

²⁶ Далгъалар коклерге чыкъып, теренликке йыкъылды, шу белядан гемиджилер рухтан тюшти.

²⁷ Олар сархош киби салланып айланды, бутюн акъыллары башындан учты.

²⁸ Беляда РАББИни чагъырдылар, ве О, оларны азапларындан къуртарды.

²⁹ РАББИ боранны тындырды, сув далгъаларыны да ятыштырды.

³⁰ Сувлар ятышкъаны ичюн, адамлар севинди, ве О, оларны арзу эткен ялыгъа алып кельди.

³¹ РАББИге шукюр этсинлер буюк севгиси ичюн, инсан огъулларына косьтерген аджайип ишлери ичюн!

³² Халкъ топлашувларында Оны юксельтсинлер, акъсакъаллар джемиетинде Оны макътасынлар!

³³ РАББИ озенлерни сахрагъа айландырыр, чокъракъларны исе – къуру топракъкъа.

³⁴ Ернинъ сакинлерининъ яманлыгъы ичюн, берекетли топракъны тузлу ерге чевирир.

³⁵ О, сахраны гольге айландырыр, ве къуру топракъны – чокъракъларгъа.

³⁶ Ач олгъанларны шу ерге ерлештирир, олар яшамакъ ичюн шеэр къурарлар.

³⁷ Тарлаларны экерлер, юзюм багъларыны сачарлар, андан буюк берекет алырлар.

³⁸ РАББИ оларнен разы олур, олар пек чокълашыр, маллары да ич эксильмез.

³⁹ Олар азлашып къалдылар, зулум, беля ве къайгъыдан йыкъылдылар.

⁴⁰ О, мырзаларны масхара этти, ёлсуз сахрада оларны юрсетти.

⁴¹ Фукъарени исе факъырлыкътан чыкъарыр, несилини къой сюрюси киби чокълаштырыр.

⁴² Догъру олгъанлар буны корип къуваныр, бутюн арам олгъанлар агъзыны къапатып отурыр.

⁴³ Кимде акъылы олса, буларны акъылында тутаджакъ, РАББИнинъ буюк севгисини анълайджакъ.