Зебур 105 - Мукъаддес Китап

Исраильнинъ гуналары акъкъында

¹ Эльхамдюлилля! РАББИге шукюр этинъиз! О, хайырлыдыр, ве эбедийдир Онынъ севгиси!

² РАББИнинъ къудретли ишлерини ким бутюнлей айта билир? Онынъ макътавлы шейлерини ким толусынен беян эте билир?

³ Не де бахтлыдыр адалетли укюм эткенлер, эр вакъыт догъру япкъан адамлар!

⁴ Я РАББИ, халкъынъа разылыгъынъны косьтерген вакъытта мени хатырла, къуртарувынъны меним тарафыма ёлла!

⁵ Сайлагъанларынънынъ аманлыгъыны корейим, халкъынънен берабер къуванчнен шенъленейим, Сенинъ мирасынънен макътанып юрейим!

⁶ Биз бабаларымызнен гуна яптыкъ, ёлдан урулдыкъ, бозукълыкъ яптыкъ.

⁷ Бабаларымыз Мысырда олгъанда, Сенинъ аджайип шейлеринъни анъламадылар, чокътан-чокъ мераметли ишлеринъни хатырламадылар, денъиз янында, Къызыл денъиз янында исьян котердилер.

⁸ РАББИ исе, къудретимни косьтермейим деп, Озь Ады ичюн оларны къуртарды.

⁹ О, Къызыл денъизге къатты сёз айтты, ве денъиз къуруды. Санки сахранынъ ортасындан кечкенлери киби, оларны терен денъиз тюбюнден кечирди.

¹⁰ Нефрет эткеннинъ къолундан оларны къуртарды, душман панджасындан сатын алды.

¹¹ Душманларыны сувлар басты, олардан ич бириси къалмады.

¹² О вакъыт инандылар Онынъ сёзлерине, макътав йырыны айттылар Онъа.

¹³ Амма тезден унуттылар Онынъ ишлерини, Онынъ огютлерини беклемедилер.

¹⁴ Сахрада нефислерине бойсундылар, адам олмагъан ерлерде Алланы сынадылар.

¹⁵ О, оларгъа истегенлерини берди, амма джанларына ольдюриджи хасталыкъны ёллады.

¹⁶ Ордуда Мусаны пахылладылар, ве Харунны, РАББИнинъ азизини.

¹⁷ Ер ярылып, Датанны ютты, Авирамнынъ тарафдарларыны къаплап алды.

¹⁸ Топлангъан ерлеринде атеш янды, ярамайларны якъып ташлады.

¹⁹ Хорев дагъында бузавны ясадылар, иритильген маденден япылгъан путкъа табындылар.

²⁰ Шунынънен шуретли Алласыны от ашагъан огюз путуна денъиштирдилер.

²¹ Мысырда буюк ишлер япкъан, Къуртарыджылары олгъан Алланы унуттылар.

²² Хам топрагъында аджайип шейлер япкъан, Къызыл денъизде къоркъунчлы ишлер косьтерген Алланы унуттылар.

²³ Алла оларны ёкъ этмеге ниетленди. Лякин Алла сайлагъан Муса Онынъ огюнде арада турды, гъазабыны къайтарды, ве О, оларны ёкъ этмеди.

²⁴ Сонъ олар гузель ерни хор эттилер, инанмай эдилер Алланынъ сёзюне.

²⁵ Чадырларында мырылдап отурдылар, бойсунмадылар РАББИнинъ сесине.

²⁶ О вакъыт Алла оларгъа къаршы къол котерди, сахрада оларны ёкъ этмеге истеди.

²⁷ Тюрлю топракъларда оларны даркъатып, оларнынъ эвлятларыны халкълар арасында ёкъ этмеге истеди.

²⁸ Олар Баал-Пеор адлы путкъа япыштылар, олюлер ичюн берильген къурбанларны ашадылар.

²⁹ Япкъан ишлеринен Алланы ачувландырдылар, сонъ ольдюриджи маразгъа огърадылар.

³⁰ Пинехас турды да, арагъа чыкъты, ве ольдюриджи мараз кесильди.

³¹ Бу иш онъа инсафлыкъ деп сайылды, несильден несильге эбедий олды.

³² Мерива сувлары янында Алланы гъазапландырдылар, олар ичюн Мусанынъ башына беля кельди.

³³ Олар онынъ джаныны агъырткъанларында, Муса тюшюнмейип лаф къачырды.

³⁴ РАББИ оларгъа эмир эткен эди, олар исе къырмадылар ят халкъларны,

³⁵ амма башкъа халкъларнен къарышып, оларнынъ ишлерини огрендилер,

³⁶ оларнынъ путларына табындылар, путлар исе тузакъ олды оларгъа.

³⁷ Озь огъулларынен къызларыны ольдюрип, джинлерге къурбан кетирдилер.

³⁸ Ханаан путларына къурбан кетирип, огъул ве къызларынынъ гунасыз къаныны тёктилер, топракъ исе къангъа батып арам олды.

³⁹ Олар япкъан ишлери ичюн арам олдылар, арекетлеринен ороспулыкъ япкъан киби олдылар.

⁴⁰ О вакъыт РАББИ Озь халкъына гъазапланды, Озюнинъ мирасындан нефретленди.

⁴¹ Оларны башкъа халкъларнынъ къолуна берди, олардан нефрет эткенлер оларгъа эфендилик этип башлады.

⁴² Душманларындан олар зулум чектилер, оларнынъ къолу астында баш эгип юрдилер.

⁴³ Чокъ керелер РАББИ оларны къуртаргъан эди, олар исе даа инатлана эдилер, ве озь яманлыкълары ичюн алчакълаштырылдылар.

⁴⁴ Лякин О, оларнынъ агъыр алларына итибар этти, оларнынъ ярдымгъа чагъырувыны эшитти.

⁴⁵ Оларгъа берген васиетини хатырлады, буюк севгиси ичюн оларны аджыды.

⁴⁶ Оларны эсир алгъан эписининъ юрегинде оларгъа нисбетен шефкъат догъурды.

⁴⁷ РАББИ олгъан Алламыз, бизни къуртар! Халкълар арасындан бизни топлап ал, Сенинъ мукъаддес Адынъны шуретлейик, Сенинъ шуретли ишлеринънен макътанайыкъ!

⁴⁸ РАББИ олгъан Исраильнинъ Алласына эбедиен, бутюн асырларда бинъ шукюрлер олсун! Бутюн халкъ исе: «Амин» – десин! Эльхамдюлилля!