Зебур 102 - Мукъаддес Китап

Алланы шуретлев

Давутнынъ йыры.

¹ Эй, джаным, РАББИни алгъышла! Онынъ мукъаддес Адыны алгъышла, эй, бутюн ичим!

² Эй, джаным, РАББИни алгъышла, Онынъ бутюн эйиликлерини унутма!

³ О, бутюн къанунсызлыкъларынъны багъышлай, бутюн хасталыкъларынъны тедавийлей.

⁴ Аятынъны мезардан къуртара, башынъа буюк севги ве шефкъат таджыны кийдире.

⁵ Сен истеген эйиликлернен сени тойдура, яшлыгъынънынъ кучюни къартал кучю киби янъарта.

⁶ РАББИ догъру арекет эте, бутюн эзильгенлерни адалетли укюм эте.

⁷ О, Озь ёлларыны Мусагъа, Озь ишлерини Исраильнинъ огъулларына косьтерди.

⁸ РАББИ мераметли ве шефкъатлыдыр! О, пек сабырлы; севгиси пек буюк!

⁹ О, эр вакъыт къабаатлап юрмез, О, эр вакъыт хошнутсыз олмаз.

¹⁰ Гуналарымыз ичюн къазангъанымызгъа коре О, япмады, бизге къабаатларымызгъа ярашкъан джеза бермеди.

¹¹ Кок ерден не къадар юксек олса, Ондан къоркъкъанларгъа буюк севгиси о къадар чокъ.

¹² Шаркъ гъарптан не къадар узакъта олса, акъсызлыкъларымызны бизден о къадар узакълаштырды.

¹³ Баба балаларына насыл шефкъатлы олса, РАББИ Ондан къоркъкъанларгъа шефкъатлы ола.

¹⁴ О, бизим теркибимизни биле, топракъ олгъанымызны эсинде тута.

¹⁵ Инсан куньлери бир откъа ошай, тарла чечеги киби гуль ача.

¹⁶ Онынъ устюнден ель эсип кече, ве о, ёкъ ола, онынъ ери биле оны танымаз.

¹⁷ Амма РАББИнинъ севгиси эбедийдир, Ондан къоркъкъанларгъа бутюн асырларда даркъала.

¹⁸ Онынъ акъикъаты оларнынъ эвлятларына, Онынъ васиетини туткъанларгъа ве къаиделерини беджермеге ичюн унутмагъанларгъа даркъала.

¹⁹ РАББИ тахтыны коклерде ерлештирген, Онынъ падишалыгъы эр ерге акимдир.

²⁰ Эй, Онынъ мелеклери, кучьлю батырлар, Онынъ сёзюне къулакъ аскъан ве Онынъ айткъанларыны беджергенлер, РАББИни алгъышланъыз!

²¹ Эй, сизлер, Онынъ бутюн ордулары, ирадесини эда эткен хызметчилер, РАББИни алгъышланъыз!

²² Эй, РАББИнинъ бутюн ишлери, падишалыгъынынъ эр бир еринде Оны алгъышланъыз! Эй, меним джаным, РАББИни алгъышла!