Зебур 101 - Мукъаддес Китап

Азап чеккеннинъ дувасы

¹ Такъаттан кесильген, къасеветини РАББИнинъ алдына тёккен заваллынынъ дувасы.

² Я РАББИ, дувамны эшит, ярдым къычырувым Санъа етип барсын!

³ Беля баскъан кунюмде Сен менден юзь чевирме, сесиме къулакъ ас, Сени чагъыргъан кунюмде манъа тез джевап бер!

⁴ Мына, куньлерим тютюн киби ёкъ олып кетти, кемиклерим атеште янгъан къарачыкълар киби!

⁵ Юрегим – къуругъан ве йыкъылгъан от киби, отьмегимни ашамагъа биле унутам.

⁶ Аджыныкълы инъильдегенимден, терим кемигиме япышып къалды.

⁷ Мен сахра пугъусына, харабеде къонгъан байкъушкъа ошайым.

⁸ Козюме юкъу кирмей, дам устюнде ялынъыз къалгъан къуш киби отурам.

⁹ Душманларым эр кунь мени акъаретлейлер, мени мыскъыллагъанлар меним адымнен лянет этелер.

¹⁰ Мен кульни отьмек киби ашайым, ичимлигимни козьяшымнен къарыштырам.

¹¹ Сенинъ ачувынъ ве гъазабынъ ичюндир бу, Сен мени котердинъ де, ерге урдынъ.

¹² Куньлерим – узангъан кольге киби, мен от киби къурудым.

¹³ Амма Сен эбедий олурсынъ, я РАББИ, несиллернинъ эписи Сени акъылда тутар.

¹⁴ Сен котерилип, Сионгъа шефкъат косьтереджексинъ, чюнки онъа мерамет этмек вакъты кельди, бельгиленген вакъыт кельди!

¹⁵ Онынъ ташларыны къулларынъ севди, онынъ тозуны биле аджыдылар.

¹⁶ Халкълар РАББИнинъ Адындан, бутюн дюнья падишалары – Сенинъ шуретинъден къоркъар.

¹⁷ РАББИ Сионны янъыдан къураджакъ, Озюнинъ Шуретинде корюнеджек.

¹⁸ Заваллыларнынъ дувасына къулакъ асаджакъ, ялварувларына хор бакъмайджакъ.

¹⁹ Бу шей келеджек несиль ичюн язылыр, ве догъуладжакъ халкъ РАББИни макътар.

²⁰ РАББИ мукъаддес юксекликтен ашагъы бакъты, коклерден ер юзюни козетти,

²¹ эсирлернинъ инъильтисини эшитти ве олюм огъулларыны азат этти.

²² Сонъ Сионда РАББИнинъ Адыны олар бильдирсинлер, Ерусалимде Оны макътасынлар

²³ халкълар берабер топланаджакъ вакъытта, падишалыкълар РАББИге хызмет этеджек вакъытта.

²⁴ Ёлумда О, къуветимни алды, куньлеримни О, къыскъартты.

²⁵ «Аллам, омрюмнинъ ярысында мени алма!» – дедим. «Сенинъ йылларынъ да несиллерде девам этер!»

²⁶ Башында ерни Сен яраткъансынъ, коклер де – Сенинъ къолларынънынъ ишидир.

²⁷ Олар ёкъ олып кетеджек, амма Сен къаладжакъсынъ. Бир урба киби, эписи ипранаджакъ; кирли урба дайын, оларны денъиштиреджексинъ, ве оларнынъ ерине башкъалары келеджек.

²⁸ Сен Озюнъ исе денъишмейджексинъ, Сенинъ йылларынъ ич битмейджек.

²⁹ Къулларынънынъ огъуллары яшайджакъ, оларнынъ эвлятлары Сенинъ огюнъде сарсылмаз тураджакъ.