Зебур 1 - Мукъаддес Китап

Акъикъий бахыт

¹ Не де бахтлыдыр ярамазларнынъ акъылынен юрмеген, гунакярлар ёлуна тюшмеген, мыскъылджылар топлашувында отурмагъан адам!

² О, РАББИнинъ Къанунындан кейф ала, гедже-куньдюз Онынъ Къануныны тюшюне.

³ Акъкъан сувлар янында сачылгъан, мейвасыны озь вакътында берген, япракълары ич солмагъан терек кибидир о адам! О не япса да, эр шейни беджерир!

⁴ Ярамайлар бойле дегиллер, олар ельде савурылгъан тобан киби олурлар.

⁵ Шунынъ ичюн ярамай адамлар къыямет куню къуртулып оламазлар, гунакярлар да инсафлыларнынъ топлашувында олмазлар.

⁶ РАББИ инсафлыларнынъ ёлуны биле, ярамайларнынъ ёлу исе гъайып олур.