Юхан 2 - Мукъаддес Китап

Галилеянынъ Кана шеэринде никях тою

¹ Учюнджи куню Галилеянынъ Кана шеэрчигинде никях тою олды. О ерде Исанынъ анасы бар эди.

² Тойгъа Иса шегиртлеринен де чагъырылгъан эдилер.

³ Шарап биткен сонъ, Исанынъ анасы Онъа: – Оларда шарап къалмагъан, – деди.

⁴ Иса онъа: – Къадын, бу бизим ишимиз дегиль. Меним вакъыт-саатим даа кельмеди, – деди.

⁵ О вакъыт анасы хызметчилерге: – О, сизге не айтса, оны япынъыз, – деди.

⁶ О ерде еудийлернинъ элялланув адети ичюн, эр бири дёрт-алты буюк къопкъа сув сыгъдыргъан алты дане таш савут бар эди.

⁷ Иса хызметчилерге: – Савутларны сувгъа толдурынъыз, – деди. Олар савутларны четлеринедже толдурдылар.

⁸ Сонъ Иса оларгъа: – Энди чомучлап алынъыз да, тойбашына алып барынъыз, – деди. Олар ойле де япты.

⁹ Тойбашы шарап олгъан сувны ичип бакъты. Шарап къайдан кельгенини о бильмей эди, тек сувны чекип кельген хызметчилер биле эди. Тойбашы киевни чагъырып, онъа:

¹⁰ – Эр кес башта яхшы шарапны къоя, мусафирлер ичип тойгъан сонъ, ярамайджа союны бере. Сен исе яхшы шарапны шу вакъыткъадже сакълап туткъансынъ! – деди.

¹¹ Иса буны Галилеянынъ Кана шеэрчигинде япты; бу шей Онынъ аджайип бельгилерининъ башы олды. Бойле этип, Иса Озь шуретини косьтерди, ве шегиртлери Онъа иман эттилер.

¹² Бундан сонъ Иса, анасы, къардашлары ве шегиртлери Къафарнаум шеэрине кельдилер ве о ерде бир къач кунь отурдылар.

Иса Алланынъ Сарайында

¹³ ‌Еудийлернинъ Песах Байрамы якъынлашкъаны ичюн, Иса Ерусалим шеэрине кетти.

¹⁴ Алланынъ Сарайы азбарына киргенинен, бугъалар, къойлар, гогерджинлер саткъанларны ве пара алмаштырыджыларнынъ отургъаныны корьди.

¹⁵ Иса аркъандан бир къамчы ясады да, Сарайнынъ азбарындан эписини бугъаларынен ве къойларынен берабер къувып чыкъарды, пара алмаштыргъанларнынъ масаларыны авдарып, акъчаларыны септирип йиберди.

¹⁶ Гогерджинлерни саткъанларгъа: – Буларны бу ерден ёкъ этинъ, Бабамнынъ Эвини базиргян эвине айландырманъыз! – деди.

¹⁷ О вакъыт Онынъ шегиртлери: «Ичимде Сенинъ Эвинъе олгъан шевкъим яна», – язылгъан сёзлерни хатырладылар.

¹⁸ Сонъ еудий башлыкълары джевап берип: – Бойле шейлерни япасынъ, амма бизге насыл бельги береджексинъ? – дедилер.

¹⁹ Иса оларгъа: – Бу Сарайны йыкъынъыз, ве Мен оны учь кунь ичинде тиклейджем, – деди.

²⁰ Олар Исагъа: – Бу Сарай къыркъ алты йылда къурулгъан, Сен исе оны учь куньде тиклемеге истейсинъ?! – дедилер.

²¹ Иса «Сарай» деп, Озь бедени акъкъында дей эди.

²² О, олип тирильген сонъ, шегиртлери бу сёзлерни хатырладылар ве Мукъаддес Языгъа да, Исанынъ сёзюне де инандылар.

Иса адамларнынъ юреклерини биле

²³ Иса Ерусалимде Песах Байрамында олгъанда, чокъ адамлар Онынъ япкъан аджайип бельгилерини корип, Онъа иман эттилер.

²⁴ Амма эписи адамларнынъ юреклерини бильгени ичюн, Иса Озю оларгъа ишанмай эди.

²⁵ Исагъа адамлар акъкъында шаатлыкъ бермек керекмей эди. Адамнынъ юрегинде не олгъаныны О, Озю биле эди.