Юхан 13 - Мукъаддес Китап

Иса шегиртлерининъ аякъларыны юва

¹ Песах Байрамындан эвель Иса бу дюньядан Бабанынъ янына кетмек вакъты кельгенини биле эди. О, бу дюньяда Озюнъкилерни севген эди ве шимди оларны сонъунадже севди.

² Акъшамлыкъ ашы вакъты эди. Шейтан энди Симон Искариот огълу Иуданынъ юрегине Исаны сатмакъ ниетини къойгъан эди.

³ Баба эр шейни Исанынъ къолуна бергенини, Алладан чыкъып, кене Алланынъ янына къайтаяткъаныны билип,

⁴ Иса софра башындан турды, усть урбасыны чыкъарды, бир эльбез алды да, белине багълады.

⁵ Легенге сув къойып, шегиртлерининъ аякъларыны юва, белине багълагъан эльбезнен сюртип къурута башлады.

⁶ Симон Пётрнынъ янына кельгенде: – Рабби! Сен меним аякъларымны ювмагъа истейсинъми?! – деди Пётр.

⁷ – Не япкъанымны шимди анъламайсынъ. Сонъ анълайджакъсынъ, – деди Иса онъа джевап берип.

⁸ – Меним аякъларымны ич бир вакъыт ювмайджакъсынъ! – деди Пётр. – Эгер ювмасам, Меннен бирликте пайынъ олмайджакъ, – деди Иса.

⁹ О вакъыт Симон Пётр: – Рабби, тек аякъларымны дегиль, къолларымны, башымны да юв! – деди.

¹⁰ Иса онъа: – Ювулгъан адам бутюнлей темиз, онынъ тек аякъларыны ювмакъ керек. Сиз темизсиз, амма эпинъиз дегиль, – деди.

¹¹ Иса Оны сатаджакъ адамны биле эди, шунынъ ичюн: «Эпинъиз темиз дегильсиз», – деди.

¹² Шегиртлерининъ аякъларыны ювгъан сонъ, Иса усть урбасыны кийип, ерине ерлешти. Шегиртлерине деди: – Мен сизге не япкъанымны анъладынъызмы?

¹³ Сиз Манъа «Оджа» ве «Рабби» дейсиз, эм догъру айтасыз, чюнки Мен бу олам.

¹⁴ Эгер Мен Рабби ве Оджа олып, аякъларынъызны ювгъан олсам, сизге де бир-биринъизнинъ аякъларынъызны ювмакъ керек.

¹⁵ Мен сизге орьнек косьтердим. Энди Мен сизге не япкъан олсам, сизге де ойле япмакъ керек.

¹⁶ Сизге керчектен догърусыны айтам: къул озь эфендисинден устюн дегиль, ёлланылгъан да оны ёллагъандан устюн дегильдир.

¹⁷ Эгер буны анъласанъыз, буны беджерип бахтлы олурсыз!

¹⁸ Мен эпинъиз акъкъында айтмайым, – девам этти Иса. – Мен сайлагъан адамларымны билем. Лякин отьмегимни ашагъан адамнынъ Манъа къаршы табаныны котергени акъкъында Языда язылгъан сёзлер беджерильмек керек.

¹⁹ Шимдиден, даа бу вакъиалар олмаздан эвель, Мен буны сизге айтам, чюнки бу вакъиалар олгъан сонъ, сиз иман этеджексиз ки, Мен – Одырым.

²⁰ Сизге керчектен догърусыны айтам: ким Мен ёллайджакъ адамны къабул этсе, Мени къабул эте. Мени къабул эткен исе Мени Ёллагъанны къабул эте.

Иса шегиртлеринден бири Оны сатаджагъы акъкъында айта

²¹ ‌Бу сёзлерни айткъан сонъ, Исанынъ джаны пек сыкъылды. Энди ачыкътан-ачыкъ айтып башлады: – Сизге керчектен догърусыны айтам: Мени сизден биринъиз сатаджакъ.

²² Шегиртлери исе, О, ким акъкъында айткъаныны бильмейип, шашкъынлыкънен бир-бирине бакъып тура эдилер.

²³ Олардан бири Исанынъ янында ята эди. Иса оны пек севе эди.

²⁴ Симон Пётр онъа, Иса ким акъкъында айткъаныны сораса, деп ишмар этти.

²⁵ О, Исанынъ кокрегине башыны къойып: – Рабби, о кимдир? – деп сорады.

²⁶ Иса джевап берип: – Мен бу пите парчасыны ашкъа батырып кимге берсем, одыр, – деди. Сонъ О, бир пите парчасыны батырып, Симон Искариот огълу Иудагъа берди.

²⁷ Шу ань, Иуда питени алгъанынен, онынъ ичине Шейтан кирди. – Япаджагъынъны тез-тез яп, – деди онъа Иса.

²⁸ Иса бу сёзлерни не ичюн айткъаныны софра этрафындакилерден ич кимсе анъламады.

²⁹ Акъча къутусы Иудада олгъаны ичюн, базылары тюшюндилер ки, Иса онъа: «Байрам ичюн бизге керек олгъан шейлерни сатын ал» я да «Фукъарелерге бир шей бер», – деди.

³⁰ Иуда исе питени алып, бирден тышарыгъа чыкъып кетти. Энди гедже тюшкен эди.

Янъы эмир

³¹ Иуда чыкъып кеткен сонъ, Иса деди: – Шимди Инсан Огълу шерефленди, Инсан Огълунда Алла да шерефленди.

³² Эгер Алла Инсан Огълунда шерефленген олса, Алла Озюнде Инсан Огълуны шерефлейджек, Оны тез арада шерефлейджек.

³³ Балалар! Мен сизлернен берабер даа аз вакъыт оладжагъым. Мени къыдыраджакъсыз. Еудийлернинъ башлыкъларына айткъаным киби, сизге де айтам: Мен кетеяткъан ерге сиз барып оламайсыз.

³⁴ Сизге янъы эмир берем: бир-биринъизни севинъиз. Мен сизни насыл севген олсам, сиз де бир-биринъизни шойле севинъиз.

³⁵ Эгер аранъызда бир-биринъизге севги олса, сиз Меним шегиртлерим олгъанынъызны эписи биледжек.

Иса Пётрнынъ ёлдан уруладжагъы акъкъында эвельден айта

³⁶ Симон Пётр Исагъа деди: – Рабби, Сен къаерге кетесинъ? – Мен кетеяткъан ерге сен артымдан шимди барып оламайсынъ, амма сонъ бараджакъсынъ, – деп джевап берди онъа Иса.

³⁷ – Рабби, – деди онъа Пётр, – не ичюн артынъдан шимди барып оламайым? Мен Сен ичюн джанымны береджегим!

³⁸ Иса джевап берип: – Мен ичюн джанынъны береджексинъми? Санъа керчектен догърусыны айтам: хораз къычырмаздан эвель, сен Менден учь кере вазгечеджексинъ, – деди.