Юхан 12 - Мукъаддес Китап

Бетанияда Исанынъ аякъларына ягъ якъалар

¹ ‌Песах Байрамындан алты кунь эвель Иса Бетаниягъа кельди. Анда Иса олюлерден тирильткен Лазар яшай эди.

² О ерде Иса ичюн акъшамлыкъ ашыны азырладылар. Марта хызмет этмекте эди, Лазар Исанен берабер ашагъан адамлардан бири эди.

³ О вакъыт Мерьем бир кучюк бардачыкъ темиз, паалы къокъулы ягъ кетирип, Исанынъ аякъларына якъты ве сачларынен Онынъ аякъларыны сюртип къурутты. Ягънынъ къокъусына бутюн эв толды.

⁴ Исанынъ шегиртлеринден бири, Оны сатаджакъ Иуда Искариот:

⁵ – Бу ягъны учь юз динаргъа сатып, фукъарелерге болип берсе, яхшыджа олмаз эдими? – деди.

⁶ Бу сёзлерни о фукъарелерге къайгъыргъаны ичюн дегиль, хырсыз олгъаны ичюн айтты. Онда ортакъ акъча къутусы эди, ве о къутугъа къоюлгъан паралардан озюне алып хырсызлай эди.

⁷ – О къадынны раатсызлама! – деди Иса. – О, бу ягъны Меним дефн этиледжек кунюм ичюн сакълады.

⁸ Фукъарелер сизинъ аранъызда эр вакъыт оладжакълар, Мен исе эр вакъыт олмайджам.

Лазаргъа къаршы фитне

⁹ Исанынъ не ерде олгъаныны билип, о ерге чокъ еудийлер кельдилер. Олар тек Исаны дегиль, Иса олюлерден тирильткен Лазарны да корьмеге истей эдилер.

¹⁰ Баш руханийлер Лазарны да ольдюрмеге тырыша эдилер,

¹¹ чюнки онынъ ичюн чокъ еудийлер кетип, Исагъа иман эте башладылар.

Исанынъ Ерусалимге тантананен киргени

¹² Эртеси куню байрамгъа кельген чокъ адамлар Исанынъ Ерусалимге келеяткъаныны эшиттилер.

¹³ Пальма терегининъ пытакъларыны алып, Оны къаршыламагъа чыкътылар ве кучьлю сеслернен къычырып башладылар: – Аллагъа шукюр! Раббининъ Ады иле Келеяткъанны, Исраильнинъ Падишасыны шуретленъиз!

¹⁴ Иса бир яш эшекни тапып, устюне минди. Бу акъкъында эвельден бойле язылгъан эди:

¹⁵ «Эй, Сион къызы, къоркъма! Сенинъ Падишанъ яш эшекке минип келеята!»

¹⁶ Шегиртлери буны башта анъламадылар. Иса Озь шуретине тек иришкен сонъ, бу сёзлер Онынъ акъкъында язылгъаныны ве халкъ Оны бойле къаршылагъаныны хатырладылар.

¹⁷ Иса Лазарны къабирден чагъыргъан ве олюлерден тирильткен вакъытта Онен берабер олгъан халкъ бу акъкъында шаатлыкъ эте эди.

¹⁸ Иса бойле бельгини косьтергени акъкъында эшиткен халкъ Оны къаршыламагъа чыкъты.

¹⁹ Фериселер исе бир-бирине: – Коресизми, энди ич бир шей япып оламайсыз. Онынъ артындан бутюн дюнья кетти! – дей эдилер.

Исаны юнанлар къыдыралар

²⁰ Ибадет этмек ичюн байрамгъа кельгенлер арасында юнанлар да бар эди.

²¹ Олар Галилеянынъ Бетсайда шеэринден олгъан Филипнинъ алдына барып ялвардылар: – Эфенди, биз Исаны корьмеге истеймиз.

²² Филип барып, бу акъта Андрейге айтты, сонъ Андрейнен Филип экиси Исанынъ алдына барып, Онъа айттылар.

²³ Иса оларгъа шойле джевап къайтарды: – Инсан Огълу шуретленеджек вакъты кельди.

²⁴ Сизге керчектен догърусыны айтам: эгер богъдайнынъ урлугъы топракъкъа тюшип ольмесе, о тек адий бир урлучыкъ олып къаладжакъ. Амма ольсе, чокъ берекет береджек.

²⁵ Ким озь джаныны севсе, оны гъайып этеджек. Ким бу дюньяда озь джаныны аджымаса, оны эбедий аят ичюн сакълап къалдыраджакъ.

²⁶ Ким Манъа хызмет этмеге истесе, Меним артымдан кельсин. Мен къаерде олсам, хызметчим де о ерде оладжакъ. Манъа хызмет эткенни Баба урьмет этеджек.

Иса Озюнинъ гъалебеси акъкъында айта

²⁷ Энди юрегим сызлай. Мен не айтсам экен? «Эй, Баба, Мени бу сааттен къуртар», – дейимми? Лякин Мен шу саат ичюн кельдим.

²⁸ Эй, Баба, Озь Адынъны шерефле! Иса буны айткъанынен, коктен: – Мен оны шерефледим ве даа шерефлейджегим, – деген сес кельди.

²⁹ О ерде тургъан халкъ буны эшитип, кок гудюрдиси белледи. «Ёкъ, Онен мелек лаф этти!» – деди башкъалары.

³⁰ Бунъа джевап берип Иса деди: – Бу сес Мен ичюн дегиль, сиз ичюн олды.

³¹ Шимди бу дюнья суд этиледжек, шимди бу дюньянынъ башлыгъы тышарыгъа чыкъарылып къувуладжакъ.

³² Мен ерден юкъарыгъа котерильгенимде, Озюме эр кесни чекеджегим.

³³ Бу сёзлерни Иса Озюнинъ насыл оледжегини бильдирмек макъсадынен айтты. Халкъ бунъа джевап берип деди:

³⁴ – Биз Къанундан Месих эбедий бизнен оладжагъыны эшиттик. Насыл этип Сен: «Инсан Огълуна юкъарыгъа котерильмеге керек», – дейсинъ? Ким бу Инсан Огълу?

Халкънынъ имансызлыгъы

³⁵ Иса оларгъа деди: – Даа къыскъа бир вакъыт ичинде ярыкъ сизнен оладжакъ. Къаранлыкъ сизни басмасын деп, ярыкъта юрюнъиз. Къаранлыкъта юрген адам къаерге кетеяткъаныны бильмей.

³⁶ Ярыкъ даа сизнен олгъанда, ярыкъкъа иман этинъиз, сонъ ярыкънынъ огъуллары оладжакъсыз. Бу сёзлерни айтып, Иса узакълашып гизленди.

³⁷ Иса халкънынъ козю огюнде о къадар чокъ бельгилерни косьтерген олса да, олар Онъа иман этмей эдилер.

³⁸ Ешая пейгъамбернинъ сёзлери беджериледжек эди: «Я Рабби! Бизим хаберимизге ким инанды? РАББИнинъ къудрети кимге ачылды?»

³⁹ Олар ана шу себептен инанып оламай эдилер. Ешая пейгъамбер даа айткъаны киби:

⁴⁰ «Рабби бу халкънынъ козьлерини кёр этти, юрегини де бир шей анъламагъан киби этти. Бойледже, олар козьлеринен корьмезлер, акъылларынен анъламазлар, оларны тедавийлесин деп, Онъа кельмезлер».

⁴¹ Ешая буны айткъанда, Месихнинъ шуретини корип, Онынъ акъкъында айта эди.

⁴² Бунъа бакъмадан, чокъ башлыкълар Исагъа иман эттилер. Лякин, синагогалардан айырылмасынлар деп, олар фериселер ичюн Исаны ачыкъ танымай эдилер.

⁴³ Башлыкълар Алланынъ шуретинден адамларнынъ шуретини зияде севе эдилер.

Сонъки кунюнде Исанынъ Сёзю имансыз адамларны укюм этеджек

⁴⁴ Иса къычырып: – Манъа иман эткен адам Манъа дегиль, Мени Ёллагъангъа иман эте.

⁴⁵ Мени корьген адам Мени Ёллагъанны коре.

⁴⁶ Манъа иман эткен эр бир адам къаранлыкъта къалмасын деп, Мен дюньягъа ярыкъ олып кельдим.

⁴⁷ Ким Меним сёзлеримни эшитип иман этмесе, оны Мен суд этмейим. Мен дюньяны суд этмек ичюн дегиль, къуртармакъ ичюн кельдим.

⁴⁸ Мени ред этип, сёзлеримни къабул этмеген адамнынъ суд этиджиси бар – оны ахыр заманда Меним айткъан Сёзюм суд этеджек.

⁴⁹ Мен Озь Адымдан айтмадым. Мени ёллагъан Баба Манъа не айтмакъны ве насыл айтмакъны буюрды.

⁵⁰ Онынъ эмири исе эбедий аят олгъаныны билем. Мен не айтсам, Манъа Баба буюргъаныны айтам, – деди.