Якъуп 4 - Мукъаддес Китап

Аллагъа бойсунынъыз

¹ Аранъыздаки къавгъа ве давалар къайдан чыкъа? Беденинъизде дженк эткен истеклеринъизден дегильми?

² Сизде олмагъан шейлерни истейсиз; адам ольдюресиз ве пахыллайсыз, амма даа алып оламайсынъыз; котеклешесиз ве дженк этесиз. Сизлерде ич бир шей ёкъ, чюнки Алладан истемейсинъиз.

³ Истейсинъиз ве алып оламайсыз, чюнки яхшылыкъ ичюн дегиль, озь истеклеринъизни беджермек ичюн истейсиз.

⁴ Эй, Алладан вазгечкен адамлар, дюньянен дост олгъаны Аллагъа душман олгъаныны бильмейсизми? Шунынъ ичюн, дюньянен дост олмагъа истеген адам Аллагъа душман ола.

⁵ Фикирлеринъизге коре, Языда язылгъан сёзлер: «Алла ичимизге къойгъан рух бизни тек озю ичюн истей», – деп бошуна язылгъанмы?

⁶ Амма О, бизге даа зияде эйиликни бере. Бойлеликнен, Языда айтылгъан ки, Алла къопайларгъа къаршы чыкъаджакъ, алчакъгонъюллилерге исе эйилик япаджакъ.

⁷ Шунынъ ичюн, Аллагъа бойсунынъыз. Шейтангъа къаршы чыкъынъыз, ве о, сизден къачар.

⁸ Аллагъа якъынлашынъыз, ве О, сизлерге якъынлашыр. Эй, гуналылар, къолларынъызны ювунъыз! Эй, акъылы болюнген адамлар, юреклеринъизни темизленъиз!

⁹ Кедерленинъиз, окюрип агъланъыз! Кулькюнъиз агълавгъа, къуванчынъыз къасеветке айлансын.

¹⁰ Раббининъ огюнде алчакъгонъюлли олунъыз, ве О, сизни юксельтир.

Дин къардашынъызны суд этменъиз

¹¹ Агъа-къардашларым, бири-биринъизни яманламанъыз! Озь агъа-къардашыны яманлагъан я да оны суд эткен адам Алланынъ Къануныны яманлай ве Къанунны суд эте. Эгер сен Къанунны суд этсенъ, сен Къанунны беджермекнинъ ерине суд этиджи оласынъ.

¹² Лякин тек бир Къанун Яратыджысы ве Суд Этиджи бар. О, эм къуртара, эм де ёкъ эте биле. Я сен ким оласынъ? Башкъа адамны не ичюн суд этесинъ?

Макътанчакъ олманъыз

¹³ Энди мени динъленъиз! Базыларынъыз: «Бугунь я да ярын бир шеэрге барып, о ерде бир йыл яшап, алыш-вериш япып, файда корермиз», – дейсиз.

¹⁴ Сизлер ярын не оладжагъыны бильмейсиз де! Яшайышынъыз озю недир? Бир ань ичинде пейда олып, гъайып олгъан був кибидир.

¹⁵ Бунынъ ерине бойле айтынъыз: «Эгер Рабби къысмет этсе, биз яшармыз ве бойле-бойле ишлер япармыз».

¹⁶ Сиз исе шимди макътанасыз, бурун котерип юресиз. Эр бир бойле макътанчакълыкъ ямандыр.

¹⁷ Демек, ким хайырлы иш япмагъа керек олгъаныны билип, япмаса, гуна къазана.