Узеир 8 - Мукъаддес Китап

Сюргюнликтен къайтып кельген халкъ

¹ Артахшаста падишанынъ заманында меннен берабер Вавилондан чыкъкъан сойларнынъ башлыкълары ве несиллер джедвелинде язылгъанлар шулардыр:

² Пинехаснынъ огъулларындан – Гершом, Итамарнынъ огъулларындан – Даниял, Давутнынъ огъулларындан – Хаттуш,

³ Шекъаньянынъ огъулларындан, Парошнынъ огъулларындан – Зекъарья ве онен берабер несиллернинъ джедвелинде язылгъан 150 акъай,

⁴ Пахат-Моавнынъ огъулларындан – Зерахьянынъ огълу Эльехоэнай ве онен берабер 200 акъай,

⁵ Шекъаньянынъ огъулларындан – Яхазиэлнинъ огълу ве онен берабер 300 акъай,

⁶ Адиннинъ огъулларындан – Ёнатаннынъ огълу Эвед ве онен берабер 50 акъай,

⁷ Эламнынъ огъулларындан – Атальянынъ огълу Ешая ве онен берабер 70 акъай,

⁸ Шефатьянынъ огъулларындан – Микъаэлнинъ огълу Зевадья ве онен берабер 80 акъай,

⁹ Ёавнынъ огъулларындан – Ехиэлнинъ огълу Овадья ве онен берабер 218 акъай,

¹⁰ Шеломит огъулларындан – Ёсифьянынъ огълу ве онен берабер 160 акъай,

¹¹ Бевай огъулларындан – Бевайнынъ огълу Зекъарья ве онен берабер 28 акъай,

¹² Азгъаднынъ огъулларындан – Хакъкъатаннынъ огълу Ёханан ве онен берабер 110 акъай,

¹³ Адоникъамнынъ огъулларындан – сонъки олгъанлар, оларнынъ адлары Элифелет, Еиэл, Шемая ве оларнен берабер 60 акъай,

¹⁴ Бигвайнынъ огъулларындан – Утай ве Завуд ве оларнен берабер 70 акъай.

Узеир левийлилерни чагъырта

¹⁵ Мен оларны Ахава шеэрине акъкъан озеннинъ боюнда топладым. Биз анда учь кунь девамында турдыкъ. Мен халкъны ве руханийлерни бакъып чыкътым ве оларнынъ арасындан левийлилерден ич кимсени тапмадым.

¹⁶ Сонъ Элиэзер, Ариэл, Шемая, Элнатан, Ярив, Элнатан, Натан, Зекъарья ве Мешуллам башлыкъларны ве Ёярив ве Элнатан оджаларны чагъырттым.

¹⁷ Мен оларны Къасифья ерининъ Иддо башлыгъына йибердим ве Иддогъа ве агъа-къардашларына, Къасифья еринде яшагъан Сарай хызметчилерине нелер айтмагъа анълаттым: бизге Алламызнынъ Эви ичюн хызметчилер йиберсинлер.

¹⁸ Алламызнынъ яхшылыгъы бизнен эди, шунынъ ичюн олар бизге акъыллы адамны Шеревьяны (Шеревья – Махлийнинъ огъулларындан, Махлий – Левийнинъ огълу, Левий – Исраильнинъ огълудыр), онынъ огъулларыны ве агъа-къардашларыны – 18 адамны алып кельдилер.

¹⁹ Даа Хашавьяны ве онен берабер Мерарийнинъ огъулларындан Ешаяны, онынъ агъа-къардашларыны ве огъулларыны – 20 адамны

²⁰ ве Давут ве онынъ башлыкълары левийлилерге хызметчи оларакъ берген Сарай хызметчилерден 220 адам алып кельдилер. Оларнынъ адлары джедвельде язылгъан эди.

Ахава озенининъ боюнда окъулгъан дува

²¹ Алламыз огюнде боюн эгмек ичюн, Ондан озюмизге, балаларымызгъа ве бутюн малларымызгъа ачыкъ ёл тилемек ичюн, Ахава озенининъ боюнда мен ашамамакъ-ичмемекнинъ башланувыны илян эттим.

²² Мен падишадан, бизни ёлумызда чешит душманлардан сакъласын деп, аскер ве атлылар сорамагъа утандым, чюнки биз падишагъа: «Алламызны къыдыргъан эр бир адам Онынъ яхшылыгъыны корер, лякин Оны къалдыргъан эр бир адамгъа Онынъ къудрети ве гъазабы тюшер!» – деген эдик.

²³ Биз ашамадыкъ-ичмедик ве бунынъ акъкъында Алламызгъа ялвардыкъ, ве О, бизни эшитти.

Сарайгъа берильген бахшышлар

²⁴ Сонъра мен руханийлернинъ башлыкълары арасындан он эки адамны: Шеревьяны, Хашавьяны ве оларнен берабер агъа-къардашларындан он адамны айырдым

²⁵ ве оларгъа кумюш, алтын ве савутларны чекип бердим. Падиша, меслеатчылары ве башлыкълары, ве анда булунгъан исраиллилернинъ эписи бу бахшышларны Алламызнынъ Эви ичюн багъышлагъан эдилер.

²⁶ Оларнынъ къолуна 650 чувал кумюш, 100 чувал кумюш савутлар ве 100 чувал алтын чекип бердим.

²⁷ Булардан башкъа фияты 1 000 алтын пара олгъан 20 дане алтын чанакъ ве алтын киби паалы эки дане ялтырагъан бакъыр чанакъ бердим.

²⁸ Мен оларгъа бойле дедим: «Сизлер РАББИ огюнде азизсинъиз, бу савутлар да – азизлик, кумюш ве алтын да – бабаларымызнынъ Алламыз РАББИге озь истегинен берильген бахшышлардыр.

²⁹ Мукъайт олунъыз, буларны сакъланъыз ве руханийлернинъ ве левийлилернинъ башлыкъларына ве Исраиль сойларынынъ башлыкъларына Ерусалимде РАББИнинъ Эвиндеки одаларда чекип беринъиз».

³⁰ Руханийлер ве левийлилер Ерусалимге, Алламызнынъ Эвине алып кетмек ичюн, кумюш, алтын ве савутларны чекип къабул эттилер.

Ерусалимге къайтув

³¹ Биринджи айнынъ 12-нджи кунюнде бизлер Ахава озенинден Ерусалимге ёл алдыкъ. Алламызнынъ къудрети бизнен берабер эди ве бизни ёл бою душмандан ве ёлбаскъынджылардан къорчалады.

³² Биз Ерусалимге кельдик ве учь кунь анда къалдыкъ.

³³ Дёртюнджи куню биз кумюш, алтын ве савутларны Алламызнынъ Эвине алып бардыкъ, чектик ве Уриянынъ огълу Меремот руханийге, Пинехаснынъ огълу Элазаргъа, Ешуанынъ огълу Ёзавадгъа, Биннуйнынъ огълу Ноадья левийлилерге бердик.

³⁴ Эписини эсапладыкъ ве чектик. Берильген шейлернинъ агъырлыгъы о вакъытта язылгъан эди.

³⁵ Бундан сонъ эсирден къайтып кельгенлер Исраильнинъ Алласына, бутюн Исраиль ичюн, бутюнлей якъыладжакъ къурбан оларакъ – 12 бугъа, 96 къочкъар ве 77 къозу, ве гуна ичюн къурбан оларакъ – 12 теке алып кетирдилер. Буларнынъ эписи РАББИге бутюнлей якъыладжакъ къурбан олды.

³⁶ Сонъра падишанынъ буюргъанларыны падишанынъ акимлерине ве озеннинъ о бир тарафындаки виляетлернинъ башлыкъларына еткиздилер, ве олар халкъкъа ве Алланынъ Эвине къол туттылар.