Узеир 7 - Мукъаддес Китап

Узеир Ерусалимге келе

¹ Бу вакъиалардан сонъ, Фарс падишасы Артахшаста падишалыгъынынъ заманында, Сераянынъ огълу Узеир (Серая – Азарьянынъ огълу, Азарья – Хилкиянынъ огълу,

² Хилкия – Шаллумнынъ огълу, Шаллум – Цадокънынъ огълу, Цадокъ – Ахитувнынъ огълу,

³ Ахитув – Амарьянынъ огълу, Амарья – Азарьянынъ огълу, Азарья – Мераётнынъ огълу,

⁴ Мераёт – Зерахьянынъ огълу, Зерахья – Уззийнинъ огълу, Уззий – Буккийнинъ огълу,

⁵ Буккий – Авишуанынъ огълу, Авишуа – Пинехаснынъ огълу, Пинехас – Элазарнынъ огълу, Элазар – баш руханий Харуннынъ огълу эди)

⁶ Вавилондан чыкъты. О, Исраильнинъ Алласы РАББИ Мусагъа берген къануныны яхшы бильген кятип эди. Онен Алласы РАББИнинъ къолу эди, ве падиша онъа эр бир истеген шейини берди.

⁷ Узеирнен берабер Ерусалимге исраиллилернинъ базылары, руханийлернинъ ве левийлилернинъ базылары, йырджылар ве къапуджылар, Сарай хызметчилери де кеттилер. Бу, Артахшаста падишалыгъынынъ единджи йылында олды.

⁸ О, падишанынъ единджи йылынынъ бешинджи айында Ерусалимге кельди.

⁹ Узеир ве онынъ адамлары биринджи айнынъ биринджи кунюнде Вавилондан чыкъты ве бешинджи айнынъ биринджи куню Ерусалимге кельди. Узеирнинъ Алласы онъа ярдым этти.

¹⁰ Узеир РАББИнинъ Къануныны огренмеге ве беджермеге, эм де бутюн Исраильде низамнамелерни ве къарарларны огретмеге джан-юрекнен берильди.

Артахшаста падишанынъ мектюби

¹¹ Мына Артахшаста падиша Узеирге берген мектюпнинъ копиясы. Узеир руханий ве кятип эди ве РАББИ Исраильге берген эмирлерни ве низамнамелерни яхшы биле эди.

¹² «Падишаларнынъ падишасы олгъан Артахшастадан Узеир руханийге, коклердеки мукеммель Алласынынъ къануныны огреткен кятипке…» ве иляхре.

¹³ «Мен шойле буюрам: меним падишалыгъымда яшагъан, Ерусалимге къайтмагъа истеген эр бир исраилли, руханий ве левийли сеннен кетсин.

¹⁴ Падиша ве онынъ еди меслеатчылары сени ёллайлар. Бар, Ехуданы ве Ерусалимни бакъ, олар сенинъ къолларынъда олгъан Алланънынъ къанунына коре яшаймы?

¹⁵ Бундан гъайры, падиша ве онынъ меслеатчылары Ерусалимде булунгъан Исраильнинъ Алласына багъышлагъан кумюшни ве алтынны озюнънен алып кет.

¹⁶ Бутюн Вавилон виляетинде топлагъан кумюш ве алтынны, эм де Ерусалимдеки Алланынъ Сарайы ичюн озь истегинен берильген халкънынъ ве руханийлернинъ бахшышларыны алып бар.

¹⁷ Шу параларгъа сен гъайретнен бугъалар, къочкъарлар, къозулар, ашлыкъ бахшышлары ве ичерлик бахшышларыны сатын ал ве буларнынъ эписини Ерусалимдеки Алланынъ Эвинде олгъан къурбан ерине кетир.

¹⁸ Къалгъан кумюш ве алтыннен сен ве агъа-къардашларынъ истеген шейлерни, Алланъыз истеген шейлерини япынъыз.

¹⁹ Санъа берильген, Алланънынъ Сарайындаки ибадет этмек ичюн керек олгъан савутларны исе Ерусалим Алласы огюне къой.

²⁰ Алланънынъ Сарайына санъа коре керек олгъан башкъа шейлерни падишанынъ хазине эвинден чыкъарып ал.

²¹ Менден, Артахшаста падишадан, озеннинъ о бир тарафында яшагъан бутюн хазинеджилерге буюргъаным бойле: коклердеки Алласынынъ къануныны огреткен кятип, Узеир руханий къайсы бир шейни сизден сораса, онъа эр шейни гъайретнен беринъиз:

²² 100 чувал къадар кумюш, 500 чувал къадар богъдай, 50 чапчакъ къадар шарап ве 50 чапчакъ къадар ягъны. Тузны исе къарарсыз беринъиз.

²³ Коклернинъ Алласы буюргъанлары коклердеки Алланынъ Эви ичюн гъайретнен ве бутюнлей япылмалы, ёкъса Онынъ гъазабы падишанынъ ве огъулларынынъ падишалыгъына тюшеджек.

²⁴ Биз даа буны бильдиремиз: ич бир руханийлерден, левийлилерден, йырджылардан, къапуджылардан, Сарай хызметчилеринден ве Алланынъ Эвинде башкъа хызмет эткенлерден не берги, не салым, не гумрюк парасыны топламасынлар.

²⁵ Сен исе, Узеир, санъа Алладан берильген икметинъе коре, Алланынъ къануныны бильген эр бир адамны башлыкълар ве къадылар оларакъ къой, олар озеннинъ башкъа тарафындаки халкъны укюм этсинлер. Къанунны бильмегенлерни исе огретинъиз.

²⁶ Алланънынъ къануныны ве падишанынъ къануныны гъайретнен беджермеген эр ким суд этильсин, ве оны ольдюрсинлер, я да къуваласынлар, я да онынъ барлыкъ-вариетини тартып алсынлар, я да оны зиндангъа атсынлар».

Узеир Алланы шерефлей

²⁷ Бабаларымызнынъ Алласына РАББИге шукюрлер олсун! О, падишанынъ юрегине Ерусалимдеки РАББИнинъ Сарайыны безетмек истегини къойды.

²⁸ Падишанынъ, меслеатчыларынынъ ве падишанынъ эписи къудретли башлыкъларынынъ огюнде О, манъа Озь буюк севгисини косьтерди! Аллам РАББИнинъ къолу меннен олгъаны ичюн, мен рухландым ве, меннен кетсинлер деп, Исраильнинъ башлыкъларыны топладым.