Узеир 6 - Мукъаддес Китап

Кореш чыкъаргъан эмирни тапалар

¹ Сонъра Дарьявеш падишанынъ буюргъанына коре, Вавилонда, китаплар сакълагъан эвинде, хазинелер къоюлгъан ерде къыдырып башладылар.

² Экбатана шеэринде, Мадай виляетиндеки сарайда бир бургъу тапылды. Ичинде шойле язылгъан эди: «Хатыра оларакъ.

³ Кореш падишалыгъынынъ биринджи йылында, Кореш падиша Ерусалимдеки Алланынъ Сарайы акъкъында шойле буюрды: “Къурбанлар кетирильген ерде эв къурулсын, къавий темеллер къоюлсынлар. Эвнинъ юксеклиги 30 метр олсун, кенълиги де 30 метр олсун.

⁴ Учь сыра буюк таш ве бир сыра агъачтан олсун. Бутюн масрафлар падиша сарайындан тёленсин.

⁵ Невукъаднеццар Алланынъ Сарайындаки алтын ве кумюш савутларны Ерусалимдеки Сарайдан алып чыкъкъан ве Вавилонгъа кетирген эди. Шимди бу савутлар Ерусалимдеки Сарайгъа, эр бири озь ерине къайтарылсын ве Алланынъ Сарайында къоюлсынлар”».

Дарьявеш падишанынъ эмири

⁶ «Шимди, Таттенай, озеннинъ о бир тарафындаки виляетнинъ акими, Шетар-Бознай озь аркъадашларынъызнен, озеннинъ о бир тарафындаки виляетнинъ башлыкъларынен берабер андан узакъ кетинъиз.

⁷ Алланынъ Эвини къурмагъа кедер этменъиз. Ехуданынъ акими ве Ехуда акъсакъаллары шу Алланынъ Эвини озь еринде къурсунлар.

⁸ Мен исе сизге бойле буюрам: Алланынъ Эви къуруджылыгъында шу Ехуда акъсакъалларына ярдым этинъиз, падишанынъ байлыгъындан, озеннинъ о бир тарафындаки виляетте топлангъан бергилерден явашлатмайып керекли шейлер алынъыз ве шу адамларгъа беринъиз, ишлери токътамасын.

⁹ Коклернинъ Алласына бутюнлей якъыладжакъ къурбанлар ичюн кереги къадар бугъа, къочкъар я да къозулар беринъиз. Булардан да гъайры, Ерусалим руханийлери не къадар богъдай, туз, шарап ве ягъ сорасалар, эр кунь оларгъа токътавсыз берильсин.

¹⁰ Олар коклернинъ Алласыны разы этеджек къурбанлар кетирсинлер ве падиша ве онынъ огъулларынынъ сагълыгъы ичюн дувалар окъусынлар.

¹¹ Мен исе даа шойле буюрам: ким де ким шу эмирни денъиштиреджек олса, шу адамнынъ эвинден бир агъач чыкъарыладжакъ ве адам шу агъачкъа котерилип ольдюриледжек, онынъ эви исе бир оба чёплюкке чевириледжек.

¹² Эгер бирде-бир падиша я да халкъ шу эмирни денъиштиреджек ве Ерусалимдеки Алланынъ Эвини ёкъ этеджек олса, Намы анда булунгъан Алла оларны ёкъ этсин! Мен, Дарьявеш, шуны буюрам. Буюргъаным гъайретнен беджерильсин».

¹³ Бундан сонъра, озеннинъ о бир тарафындаки виляетнинъ акими Таттенай, Шетар-Бознай ве оларнынъ аркъадашлары Дарьявеш падиша буюргъаныны гъайретнен яптылар.

¹⁴ Ехуда акъсакъаллары да, Хагъгъай пейгъамбернинъ ве Иддонынъ огълу Зекерьянынъ пейгъамберлигине коре, къурдылар, ве оларнынъ ишлери онъ келе эди. Исраиль Алласынынъ истегенине коре ве Фарс падишалары Кореш, Дарьявеш ве Артахшастанынъ буюргъанларына коре, олар къурдылар ве битирдилер.

¹⁵ Бу Эвнинъ къурулмасы Адар айынынъ учюнджи кунюне, Дарьявеш падишанынъ падишалыгъынынъ алтынджы йылында битирильди.

Алланынъ Сарайыны азиз этелер

¹⁶ Бундан сонъ Исраиль огъуллары, руханийлер, левийлилер ве эсирден къайтып кельген башкъалары да буюк къуванчнен Алланынъ Сарайыны азиз эттилер.

¹⁷ Алланынъ Сарайыны азиз эткенде, 100 баш бугъа, 200 баш къочкъар, 400 баш къозу ве, бутюн Исраильнинъ гуналары ичюн он эки къабилесининъ сайысына коре, он эки баш теке къурбан чалдылар.

¹⁸ Сонъра Мусанынъ китабында язылгъанына коре, руханийлерни болюклерине коре ве левийлилерни невбетлерине коре Ерусалимде Аллагъа хызмет этмеге къойдылар.

Песах Байрамы

¹⁹ Эсирден къайтып кельгенлер биринджи айнынъ 14-юнджи куню Песах Байрамыны яптылар.

²⁰ Руханийлер ве левийлилер элялландылар, бир адам киби темизлендилер. Олар эсирден къайтып кельгенлернинъ эписине, агъа-къардашлары руханийлерге ве озьлерине Песах къурбаныны чалдылар.

²¹ Эсирден къайтып кельген Исраиль огъуллары ве, Исраильнинъ Алласы РАББИге ибадет этмек ичюн, башкъа халкъларнынъ писликлеринден айырылгъан адамлар да оны ашадылар.

²² Еди кунь девамында къуванчнен Маясыз Пишкен Пителер Байрамыны яптылар, чюнки РАББИ оларны къувандырды ве, Алланынъ, Исраиль Алласынынъ Эвини къурмагъа ярдым этмек ичюн, оларгъа Ашшур падишасынынъ юрегини чевирди.