Узеир 10 - Мукъаддес Китап

Къарышыкъ къоранталар меселесининъ чезильмеси

¹ Узеир дува окъуды, агълай-агълай тёвбе этти, агълады, Алланынъ Эви огюнде ерге йыкъылды. Шу вакъытта онынъ янында чокътан-чокъ исраиллилер джемааты топланды, акъайлар, апайлар, балалар да кельди. Олар окюр-окюр агълай эдилер.

² Элам союндан олгъан Ехиэлнинъ огълу Шекъанья Узеирге шойле деди: – Биз Алламыз огюнде имансыз шей яптыкъ, мемлекетнинъ халкъларындан къызларыны апай этип алдыкъ, амма Исраильнинъ даа умюти бар!

³ Шимди Алламызнынъ огюнде ант этейик: эфендимнинъ айткъанларына ве Алламызнынъ къанунларындан къоркъкъан адамларнынъ айткъанларына коре, эписи бойле апайларны ве олардан догъгъан балаларны озюмизден узакълаштырайыкъ. Къанунгъа коре олсун!

⁴ Тур, Узеир! Бу сенинъ ишинъдир. Биз сеннен олурмыз. Джесаретли ол да, керек шейни яп!

⁵ Узеир еринден турып, руханийлернинъ башлыкъларыны, левийлилерни ве бутюн Исраильни, олар айткъанларыны беджерсинлер деп, ант эттирди. Олар ант эттилер.

⁶ Сонъра Узеир турып, Алланынъ Эвинден кетти, Эльяшивнинъ огълу Ехохананнынъ эвине кетти. Анда келип, бир шей ашамады ве сув ичмеди, эсирликтен кельгенлернинъ имансыз иши себебинден агълады.

⁷ Ехудада ве Ерусалимде, эсирликтен кельгенлернинъ эписине Ерусалимде топланмагъа хабер бердилер.

⁸ Эгер кимде-ким учь куньден кельмесе, башлыкъларнынъ ве акъсакъалларнынъ къарары боюнджа, онынъ мал-мулькю бутюнлей ёкъ этиледжек, озю исе эсирликтен къайткъанларнынъ джемаатындан чыкъарыладжакътыр.

⁹ Учь куньден сонъ Ехуда ве Биньямин акъайлары Ерусалимде топлаштылар. Бу, докъузынджы айнынъ 20-нджи кунюнде олды. Бутюн халкъ Алланынъ Эви огюндеки мейданда отурды, топлашувнынъ себебинден ве кучьлю ягъмурдан дыр-дыр къалтырай эди.

¹⁰ Узеир руханий турды да, оларгъа шойле деди: – Сизлер ят апай алып, имансыз шей яптынъыз ве Исраиль къабаатларыны даа да зияде эттинъиз.

¹¹ Шимди бабаларынъызнынъ Алласы РАББИнинъ огюнде тёвбе этип шукюр этинъиз, Онынъ истегенини беджеринъиз ве мемлекетнинъ халкъларындан ве ябанджы апайлардан айырылынъыз.

¹² Бутюн джемаат къычырып деди: – Сен бизге айткъанынъ киби япармыз.

¹³ Амма халкъ чокъ, ягъмур да ягъып тура. Тышарыда турмагъа чаремиз ёкъ. Эм де бу, бир-эки куньлюк иш дегиль, бунда бизим гуналарымыз чокъ.

¹⁴ Башлыкъларымыз бутюн джемаат адындан арекет этсинлер, ве шеэрлеримиздеки ябанджы апай алгъанларнынъ эр бири бельгиленген вакъытта кельсин. Оларнен берабер эр бир шеэрнинъ башлыкълары ве къадылары кельсинлер. Алламызнынъ алевли гъазабы бизден кетмегендже, бойле япылсын.

¹⁵ Тек Асаэлнинъ огълу Ёнатан ве Тикванынъ огълу Яхзея бунъа къаршы чыкътылар, ве Мешуллам ве левийли Шаббетай оларгъа къол туттылар.

¹⁶ Эсирликтен кельгенлер алынгъан къараргъа коре яптылар. Узеир руханий эр бир сойдан сойларнынъ башлыкъларыны айырды, эр бири ады-адынен бельгиленди. Онунджы айнынъ биринджи кунюнде олар бу ишни бакъмакъ ичюн топлашув яптылар.

¹⁷ Биринджи айнынъ биринджи кунюне олар ят апайгъа эвленген эр бир адамнынъ ишини бакъып битирдилер.

Ябанджы къызларгъа эвленген ехудалылар

¹⁸ Шу ачылды: руханийлернинъ огъулларындан ят апайларгъа эвленгенлер шулардыр: Ёцадакънынъ огълу Ешуанынъ огъулларындан ве онынъ агъа-къардашларындан – Маасея, Элиэзер, Ярив ве Гедалья.

¹⁹ Олар апайларынен айырылмагъа сёз бердилер. Озь къабааты ичюн исе бирер къочкъар къурбан эттилер.

²⁰ Иммернинъ огъулларындан – Хананий ве Зевадья;

²¹ Харимнинъ огъулларындан – Маасея, Элия, Шемая, Ехиэл ве Уззия;

²² Пашхурнынъ огъулларындан – Эльёэнай, Маасея, Исмаил, Нетанэл, Ёзавад ве Эласа;

²³ левийлилерден – Ёзавад, Шимий ве Келая (яни Келита), Петахья, Ехуда ве Элиэзер;

²⁴ йырджылардан – Эльяшив; къапуджылардан – Шаллум, Телем ве Урий;

²⁵ исраиллилерден, Парошнынъ огъулларындан – Рамья, Йиззия, Малкия, Миямин, Элазар, Малкия ве Беная;

²⁶ Эламнынъ огъулларындан – Маттанья, Зекъарья, Ехиэл, Авдий, Еремот ве Элия;

²⁷ Заттунынъ огъулларындан – Эльёэнай, Эльяшив, Маттанья, Еремот, Завад ве Азиза;

²⁸ Бевайнынъ огъулларындан – Ехоханан, Хананья, Заббай ве Атлай;

²⁹ Банийнинъ огъулларындан – Мешуллам, Маллукъ, Адая, Яшув, Шеал ве Еремот;

³⁰ Пахат-Моавнынъ огъулларындан – Адна, Келал, Беная, Маасея, Маттанья, Бецалел, Биннуй ве Менашше;

³¹ Харимнинъ огъулларындан – Элиэзер, Йишшия, Малкия, Шемая, Шимон,

³² Биньямин, Маллукъ, Шемарья;

³³ Хашумнынъ огъулларындан – Маттенай, Маттатта, Завад, Элифелет, Еремай, Менашше ве Шимий;

³⁴ Банийнинъ огъулларындан – Маадай, Амрам ве Уэл,

³⁵ Беная, Бедея, Келухий,

³⁶ Ванья, Меремот, Эльяшив,

³⁷ Маттанья, Маттенай, Яасай,

³⁸ Бани, Биннуй, Шимий,

³⁹ Шелемья, Натан, Адая,

⁴⁰ Макънадвай, Шашай, Шарай,

⁴¹ Азарел, Шелемья, Шемарья,

⁴² Шаллум, Амарья, Юсуф;

⁴³ Невонынъ огъулларындан – Еиэл, Маттитья, Завад, Зевина, Яддай, Ёэль ве Беная.

⁴⁴ Булар эписи ят апайларгъа эвленген эдилер, базыларынынъ балалары да догъулгъан эди.