Узеир 1 - Мукъаддес Китап

Кореш Алланынъ Сарайыны гъайрыдан тиклемеге буюра

¹ Фарс падишасы Кореш падишалыгъынынъ биринджи йылында, Йирмеянен айтылгъан РАББИнинъ сёзлери беджерильсин деп, РАББИ Фарс падишасы Корешнинъ рухуна токъунды, ве о, бутюн падишалыгъына шойле хаберни агъыздан бильдирмеге ве язып бермеге адамларны ёллады:

² – Фарс падишасы Кореш бойле дей: «Коклернинъ Алласы РАББИ ер юзюндеки бутюн падишалыкъларны манъа берди. О, манъа Ехудадаки Ерусалимде Онынъ ичюн Эвни къурмагъа буюрды.

³ Араларынъызда Онынъ халкъындан ким олса, Алласы РАББИ онен олсун, Ехудадаки Ерусалимге кетсинлер, Исраиль Алласы РАББИнинъ Сарайыны къурсунлар, Ерусалимде олгъан Алла ичюн къурсунлар.

⁴ Сагъ къалгъанларнынъ эписи ичюн эр бир топракъта яшагъан адамлар оларгъа ярдым этсинлер: кумюш, алтын, тувар ве башкъа шейлер берсинлер ве истеклерине коре Ерусалимдеки Алланынъ Сарайы ичюн бахшышлар берсинлер».

⁵ Бундан сонъ, Ехуда ве Биньямин сойларынынъ башлыкълары, руханийлер ве левийлилер, ве Алла рухландыргъан эр бир адам турды ве Ерусалимде РАББИнинъ Эвини къурмагъа кеттилер.

⁶ Оларнынъ эписи къомшулары, оларгъа ярдым этмек ичюн, оларгъа кумюш савутларны, алтын, башкъа шейлер, туварлар ве къыйметли шейлерни, ве озь истегинен берильген бахшышларны багъышладылар.

⁷ Кореш падиша Невукъаднеццар Ерусалимден, РАББИнинъ Сарайындан алып кельген, озь аллаларынынъ эвине къойгъан савутларны чыкъарды.

⁸ Фарс падишасы Корешнинъ хазинеджиси Митредат шу шейлерни чыкъарып кетирди ве сайып, Ехуда башлыгъы Шешбаццаргъа оларны берди.

⁹ Мына шу шейлернинъ сайысы: 30 алтын табакъ, 1 000 кумюш табакъ, 29 пычакъ,

¹⁰ 30 алтын чанакъ, айны 410 кумюш чанакъ, 1 000 башкъа савутлар.

¹¹ Эписи оларакъ алтын ве кумюш савутларнынъ сайысы 5 400. Сюргюн этильгенлер Вавилондан Ерусалимге кочип кеткенде, Шешбаццар буларнынъ эписини алып кетирди.