Титке 2 - Мукъаддес Китап

Иманлылар джемиети ичюн къаиделер

¹ Сен, Тит, сагълам огретювге ярагъан шейлерни огрет.

² Къарт акъайлар айдын фикирли, урьметли, акъыллы, иманда, севгиде ве сабырда сагълам адамлар олсунлар.

³ Къарт апайлар Алланы урьмет этип яшасын, башкъаларны яманламасын, чокъ шарап ичмекнинъ къулу олмасын, яхшы ишлер япмагъа огретсинлер.

⁴ Бойле этип, олар яш къадынларны озь акъайларыны ве балаларыны севмеге,

⁵ айдын фикирли, темиз юрекли ве мераметли олмагъа, эвни бакъмагъа ве озь акъайларыны динълемеге огретсинлер. О вакъыт башкъа адамлар Алланынъ Сёзюни яманламайджакъ.

⁶ Йигитлерни айдын фикирли олмагъа чагъыр.

⁷ Хайырлы ишлер япып, оларгъа эр бир иште орьнек ол. Башкъаларны огреткенде, намуслы ве урьметли ол,

⁸ ич бир шубеси олмагъан догъру сёзлерни айт. О вакъыт душманлар утанаджакъ ве бизим акъкъымызда яман сёз айтып оламайджакъ.

⁹ Къулларны огрет: эр шейде озь эфендилерине бойсунсын, оларнынъ буюргъаныны япсын, сёз къайтармасынлар,

¹⁰ хырсызлыкъ япмасын, лякин эр алда намуслы ве ишанчлы олсунлар. Бойле арекет этип, олар Къуртарыджымыз Алланынъ огретюви яхшы олгъаныны эр шейде косьтереджеклер.

Иса Месихнинъ келеджегине умют этип, инсафнен яшанъыз

¹¹ Алланынъ эйилиги бутюн адамларгъа къуртулышны кетирмек ичюн пейда олды.

¹² Бу эйилик бизге динсизликни ве гуналы истеклерни ред этмеге, озюни тутмагъа, бу шимдики дюньяда адалетли ве диндар олып яшамагъа огрете.

¹³ Шунынънен биз умютимизнинъ бахтлы беджерилювини, улу Алланынъ ве Къуртарыджымыз Иса Месихнинъ шуретнен кельгенини беклейик.

¹⁴ Бизни эр бир гунадан къуртармакъ, яхшы ишлерни гъайретнен япкъан темиз сайлангъан халкъны Озюне азырламакъ ичюн, О, Озюни бизим ичюн къурбан кетирди.

¹⁵ Буны огрет, насиат бер, бутюн акимиетнен тербиеле; ич кимсе санъа юкъарыдан бакъмасын.