Сырларнынъ ачылувы 7 - Мукъаддес Китап

Тамгъа къоюлгъан 144 000 адам

¹ Бундан сонъ ер юзюнинъ дёрт кошесинде тургъан дёрт мелекни корьдим. Олар ер юзюнинъ дёрт елини тутып тура эдилер. Ель не ерге, не денъизге, не бирде-бир терекке эсе эди.

² Сонъ мен башкъа бир мелекни корьдим. О, куньдогъуш тарафтан чыкъаята, онынъ къолунда Тири Алланынъ тамгъа алети бар эди. Ерге ве денъизге зарар кетирмек ичюн къудрет алгъан дёрт мелекке о, кучьлю сеснен багъырды:

³ – Алламызнынъ къулларынынъ манълайларына тамгъа басмагъанымызджа, не ерге, не денъизге, не тереклерге ич бир зарар кетирменъиз!

⁴ Мен тамгъа къоюладжакъ адамларнынъ сайысыны эшиттим. Исраиль огъулларынынъ бутюн къабилелеринден 144 000 адамгъа тамгъа басылгъан эди.

⁵ Ехуда къабилесинден 12 000 адамгъа тамгъа басылгъан эди, Рубен къабилесинден – 12 000, Гъад къабилесинден – 12 000,

⁶ Ашер къабилесинден – 12 000, Нафталий къабилесинден – 12 000, Менашше къабилесинден – 12 000,

⁷ Шимон къабилесинден – 12 000, Левий къабилесинден – 12 000, Йиссакъар къабилесинден – 12 000,

⁸ Зевулун къабилесинден – 12 000, Юсуф къабилесинден – 12 000, Биньямин къабилесинден де 12 000 адамгъа тамгъа басылгъан эди.

Беяз урбалы адамлар

⁹ Бундан сонъ бакъсам, буюк бир топлам, эр бир миллеттен, эр къабиледен, эр халкътан ве тиллерден олгъан, эсабына етип олмагъан адамлар тахтнынъ алдында, Къозунынъ огюнде тура эди. Эписи беяз урба кийип, къолларында пальма пытакъларыны тута эдилер.

¹⁰ Олар кучьлю сеснен: – Тахтта отургъан Алламыз ве Къозу къуртара биле! – деп къычыра эдилер.

¹¹ Эписи мелеклер тахт, акъсакъаллар ве дёрт айваннынъ этрафында турдылар. Тахтнынъ алдында йыкъылып, олар бетлеринен ерге тийдилер ве Аллагъа ибадет этип дедилер:

¹² – Амин! Эйилик ве шурет, икметлик, шукюр, шереф, кучь ве къудрет, эбедиен бизим Алламыздадыр! Амин!

¹³ Акъсакъаллардан бири менден сорады: – Беяз урба кийген бу адамлар ким олгъаныны, олар къайдан кельгенини билесинъми?

¹⁴ – Эфендим, буны сен билесинъ, – дедим мен. О, манъа шойле деди: – Булар – буюк белядан кечип кельгенлер. Олар озь урбаларыны Къозунынъ къанынен ювдылар, ве олар беяз олдылар.

¹⁵ Шунынъ ичюн олар Алланынъ тахты алдында туралар ве Онынъ Сарайында гедже-куньдюз Онъа хызмет этелер. Тахтта Отургъан оларгъа Озь чадырында бир ер береджек.

¹⁶ Олар энди ач къалмайджакъ ве сувсамайджакълар. Оларны не кунеш, не сыджакъ якъаджакъ.

¹⁷ Тахтнынъ ортасындаки Къозу, чобан киби, оларны бакъаджакъ ве яшайыш сувлары олгъан чокъракъларгъа алып бараджакъ. Алла оларнынъ козьяшларыны бутюнлей силеджек.