Сайылар 5 - Мукъаддес Китап

Ордуны арамлагъан адамлар акъкъында

¹ РАББИ Мусагъа бойле деди:

² – Исраиль огъулларына буюр, тери хасталыгъына огърагъан, къан ве ирин акъувы олгъанлар я да олю адамгъа токъунып арамлангъан эр кесни ордудан тыш чыкъарсынлар.

³ Акъайларны да, къадынларны да ордудан тыш чыкъарынъыз. Олар озь ордуларыны арамламасынлар, чюнки Мен оларнынъ арасында булунам.

⁴ Исраиль огъуллары ойле де яптылар, оларны ордудан тыш чыкъардылар. РАББИ Мусагъа насыл айткъан олса, Исраиль огъуллары ойле де яптылар.

Къабаат ичюн одеме

⁵ РАББИ Мусагъа бойле деди:

⁶ – Исраиль огъулларына бойле айт: Эгер акъай я да къадын башкъа адамгъа къаршы насылдыр гуна япса, ве шуны япып, РАББИге къаршы гуна япса ве къабаатлы олса,

⁷ япкъан гунасы ичюн тёвбе этсинлер, кимге къаршы гуна япкъан олса, онъа бутюнлей къайтарсын ве беште бир пайыны къошып, кимге къаршы гуна ишлеген олсалар, онъа берсинлер.

⁸ Эгер шу адамнынъ одемесини алмакъ ичюн якъын догъмушы олмаса, къабаатнынъ одемеси РАББИге багъышлансын ве руханийге берильсин. Бундан гъайры руханийге багъышлав къурбаны берильсин, ве о, адамны онен элялласын.

⁹ Исраиль огъулларынынъ руханийге бахшыш этильген эписи азизликлери онынъ олсунлар.

¹⁰ Эр кеснинъ айырылгъан бахшышлары руханийнинъ олсунлар, ве руханийге берильген эр шей руханийнинъки олсун.

Куньджюлик акъкъында къанун

¹¹ РАББИ Мусагъа бойле деди:

¹² – Исраиль халкъына бойле айт: Эгер биревнинъ апайы озь акъайына садыкълыгъыны бозса,

¹³ башкъа акъай о апайнен ятса ве урлугъыны тёксе, апай исе буны акъайындан гизлиден япса ве бойле этип арамланса, лякин шаат олмаса ве апай гунасында тутулмаса,

¹⁴ акъайнынъ юрегинде исе апайына къаршы куньджюлик догъса, апайы къабаатлы я да къабаатлы олмагъан алда, онъа къаршы юрегинде куньджюлик догъса,

¹⁵ акъай озь апайыны руханийге кетирсин ве апайы ичюн бахшыш оларакъ бир чанакъ арпа унуны берсин, лякин уннынъ устюне зейтюн ягъыны тёкмесин, темиз къокъулы майны да къоймасын, чюнки бу, куньджюлик бахшышы, къабаатны хатырлаткъан бахшыштыр.

¹⁶ Руханий апайны чагъырып, оны РАББИнинъ огюне къойсун.

¹⁷ Руханий балчыкъ бардакъкъа азиз сув тёксюн ве, Мескеннинъ полундан топракъ алып, сувгъа къошсун.

¹⁸ Руханий апайны РАББИнинъ огюне къойсун, сачыны ачсын, къолуна хатырлав бахшышыны, яни куньджюлик бахшышыны берсин. Руханийнинъ къолунда къаргъыш кетиреджек аджджы сув олсун.

¹⁹ Сонъ руханий апайны ант бермеге меджбур этсин ве бойле десин: «Эгер башкъа бир адам сеннен ятмагъан олса, ве сен акъайынъа олгъан садыкълыгъынъны бозып арамланмагъан олсанъ, къаргъыш кетиреджек бу аджджы сув санъа зарар кетирмесин.

²⁰ Лякин акъайынъа садыкълыгъынъны бозып арамлангъан олсанъ ве акъайынъдан гъайры башкъа бир адамнен яткъан олсанъ,

²¹ о заман руханий апайны къаргъыш антыны бермеге меджбур этсин ве апайгъа бойле айтсын: – РАББИ халкъынъ арасында сени къаргъасын. РАББИ сени бош къарын шишик къурсакъ япсын.

²² Къаргъыш кетиреджек бу сув сенинъ ичинъе кирсин ве къурсагъынъны шиширсин, къарынынъны бошатсын». О заман апай: «Амин, ойле де олсун», – десин.

²³ Руханий бу еминни бир кягъыткъа язып, оны аджджы сувнен ювсун.

²⁴ Сонъ къаргъыш кетиреджек аджджы сувны апайгъа ичирсин, ве къаргъыш кетиреджек шу сув онынъ ичине кирсин ве онъа аджджы дерт берсин.

²⁵ Руханий апайнынъ къолундан куньджюлик бахшышыны алсын, оны РАББИнинъ огюнде котерсин ве къурбан ерининъ янына алып кетсин.

²⁶ Руханий ашлыкъ бахшышындан хатыра пайы оларакъ бир авуч алсын ве къурбан еринде якъсын, сонъ апайгъа сувны ичирсин.

²⁷ Онъа сувны ичирген сонъ, эгер апай озь акъайына садыкълыгъыны бозып арамлангъан олса, къаргъыш кетиреджек аджджы сув ичине киреджек ве аджджы дерт береджек, онынъ къурсагъы шишеджек ве онынъ къарны бошайджакъ. Халкъы арасында бу апай лянет оладжакъ.

²⁸ Лякин эгер апай арамланмагъан ве темиз олса, о апай зарар корьмейджек ве бала догъура биледжек.

²⁹ Бир апай озь акъайына садыкълыгъыны бозып арамланса, куньджюлик акъкъында къанун будыр.

³⁰ Акъайны куньджюлик руху басса ве о, озь апайыны куньлеп башласа, о, апайыны РАББИнинъ огюнде къойсун ве руханий апайгъа бу къанун боюнджа япсын.

³¹ О вакъыт акъай ич бир гунада къабаатлы олмайджакъ, онынъ апайы исе къабааты ичюн джезасыны чексин.