Сайылар 4 - Мукъаддес Китап

Кехатлыларынынъ хызмети

¹ РАББИ Мусагъа ве Харунгъа бойле деди:

² – Левий огъулларындан олгъан Кехат огъулларыны сойларына ве къоранталарына коре,

³ отуздан башлап элли яшынадже, хызмет эткенлернинъ эписини сай. Олар Корюшюв Чадырында чалышсынлар.

⁴ Корюшюв Чадырындаки Кехат огъулларынынъ хызмети – Энъ Мукъаддес Ерде хызмет этмектир.

⁵ Орду ёлгъа чыкъаджакъ вакъытта Харун ве оларнынъ огъуллары келип, къапаткъан пердени тюшюрсинлер ве онынънен Шаатлыкъ Сандыгъынынъ устюни къапатсынлар.

⁶ Оны индже ишленген терилер орьтюсинен къапатсынлар, онынъ устюне мор юньден япылгъан безни ташласынлар ве сырыкъларыны ерине кечирсинлер.

⁷ РАББИнинъ булунувыны косьтерген пителер ичюн столны мор юньден япылгъан безнен къапатсынлар, устюне чанакъларны, пиалаларны, гугюмлерни ве тёкюледжек бахшышлар ичюн мешребелерни къойсунлар. Онынъ устюнде эр вакъыттаки пителер де олсунлар.

⁸ Буларнынъ устюне ачыкъ къырмызы юньден япылгъан безни тёшесинлер, оны индже ишленген терилер орьтюсинен къапатсынлар ве сырыкъларыны ерине кечирсинлер.

⁹ Мор юньден япылгъан безни алсынлар ве ярыкъ къандилини ве онынъ лампатларыны, машачыкъларыны, табачыкъларыны, зейтюн ягъы ичюн къуллангъан эписи савутларынынъ устюне тёшесинлер.

¹⁰ Къандильни бутюн алетлеринен берабер индже ишленген терилер орьтюсинен къапатсынлар ве седиенинъ устюне къойсунлар.

¹¹ Алтын къурбан ерининъ устюне мор юньден япылгъан безни тёшесинлер, устюни индже ишленген терилер орьтюсинен къапатсынлар, сырыкъларыны ерине кечирсинлер.

¹² Мукъаддес Ерде ибадет этмек ичюн къулланылгъан бутюн шейлерни алсынлар, мор юньден япылгъан безге сарсынлар, индже ишленген терилер орьтюсинен къапатсынлар ве седиенинъ устюне къойсунлар.

¹³ Къурбан ерини кульден темизлесинлер ве мавылы къырмызы юньден япылгъан безнен къапатсынлар.

¹⁴ Сонъ ибадет этмек ичюн къулланылгъан бутюн алетлерни: комюр табакъларыны, сенеклерни, куречиклерни ве чанакъларны, – къурбан ерининъ эписи алетлерини онынъ устюне къойсунлар, оны индже ишленген терилер орьтюсинен къапатсынлар, сырыкъларыны ерине кечирсинлер.

¹⁵ Орду башкъа ерге кочькен вакъытта Харун ве онынъ огъуллары Мукъаддес Ерни ве Мукъаддес Ернинъ эписи алетлерини къапаткъан сонъ, Кехат огъуллары оларны ташымагъа кельсинлер. Лякин Мукъаддес Ерге токъунмасынлар, ёкъса олар ольдюриледжеклер. Корюшюв Чадырынынъ бу къысымларыны Кехат огъуллары ташысынлар.

¹⁶ Руханий Харуннынъ огълу Элазар къандиль ичюн зейтюн ягъы, якъыладжакъ къокъулы отлар, эр вакъыттаки ашлыкъ бахшышлары ве ягъламакъ ичюн зейтюн ягъы, бутюн Мескен, бутюн ичиндеки шейлер ве бутюн шейлеринен берабер Мукъаддес Ер ичюн джевапкяр олсун.

¹⁷ РАББИ Мусагъа ве Харунгъа бойле деди:

¹⁸ – Кехат сойларынынъ къабилесине левийлилернинъ арасындан ёкъ олмагъа ёл берменъиз.

¹⁹ Олар сагъ олсунлар ве Энъ Мукъаддес Ерге якъынлашкъанда ольмесинлер деп, бойле япынъыз: Харуннен огъуллары барсынлар ве эр адамгъа озь хызметини ве ташыйджакъ юкюни бильдирсинлер.

²⁰ Олар озьлери, ольмемек ичюн, Мукъаддес Ерни къапаткъанда, онъа якъынлашып бакъмасынлар.

Гершон огъулларынынъ хызмети

²¹ РАББИ Мусагъа бойле деди:

²² – Гершон огъулларыны къоранталарына ве сойларына коре сай.

²³ Корюшюв Чадырында хызмет этмек ичюн, хызметке ляйыкъ олгъан отуздан башлап элли яшынадже адамларнынъ эписини сай.

²⁴ Мына гершонлыларнынъ сойлары япаджакъ ишлер. Олар бойле этип хызмет этсинлер ве юклер ташысынлар:

²⁵ Мескеннинъ безлерини, Корюшюв Чадырыны ве орьтюсини, устюне тёшеледжек индже ишленген терилер орьтюсини, Корюшюв Чадырынынъ киришиндеки пердени,

²⁶ азбарнынъ безлерини, Мескеннинъ ве къурбан ерининъ чевре-четинде олгъан азбар киришиндеки пердени, йиплерини, оларнынъ бутюн алетлерини, олар ичюн япылгъан эр бир шейни ташысынлар. Бойле этип, хызмет этсинлер.

²⁷ Гершон огъулларынынъ бутюн япаджакъ ишлери – юк ташымакъ я да башкъа бир хызмет этмек – Харуннынъ ве огъулларынынъ башлыгъында япылсын. Гершон огъуллары бутюн ташыгъан шейлери ичюн джевапкяр олсунлар.

²⁸ Гершонлыларнынъ сойлары Корюшюв Чадырында япаджакъ ишлери ве олар джевапкяр оладжакъ шейлер будыр. Руханий Харуннынъ огълу Итамар оларнынъ башлыгъы олсун.

Мерарий огъулларынынъ хызмети

²⁹ Мерарий огъулларыны сойларына ве къоранталарына коре сай.

³⁰ Корюшюв Чадырында хызмет этмек ичюн, хызметке ляйыкъ олгъан отуздан башлап элли яшынадже адамларнынъ эписини сай.

³¹ Корюшюв Чадырында хызмет эткенде, олар булар ичюн джевапкяр олсунлар: Мескеннинъ черчивелери, сырыкълары, диреклери, темеллери,

³² азбарнынъ чевре-четиндеки диреклери ве темеллери, къазычыкълары, йиплери ве оларнынъ бутюн алетлери ве хызметте къулланылгъан бутюн шейлер. Ташымагъа керек олгъан шейлернинъ адларыны эр бир адамгъа бильдир.

³³ Корюшюв Чадырында хызмет эткенде, мерарийлилернинъ сойлары бойле ишлер япсынлар. Руханий Харуннынъ огълу Итамар оларнынъ башлыгъы олсун.

Левийлилер сайылувынынъ нетиджелери

³⁴ Муса, Харун ве джемаатнынъ башлыкълары Кехат огъулларыны сойларына ве къоранталарына коре сайдылар.

³⁵ Корюшюв Чадырында хызмет этмек ичюн, хызметке ляйыкъ олгъан отуздан башлап элли яшынадже адамларнынъ эписини сайдылар.

³⁶ Оларнынъ сойларына коре сайылгъанлар 2 750 адам эди.

³⁷ Кехатлыларнынъ сойларында сайылгъанлар, Корюшюв Чадырында хызмет эткенлернинъ эписи булардыр. РАББИ Мусагъа буюргъаны киби, Муса ве Харун оларны сайдылар.

³⁸ Гершон огъуллары сойларына ве къоранталарына коре сайылдылар.

³⁹ Корюшюв Чадырында хызмет этмек ичюн, хызметке ляйыкъ олгъан отуздан башлап элли яшынадже адамларнынъ эписини сайдылар.

⁴⁰ Оларнынъ сойларына ве къоранталарына коре сайылгъанлар 2 630 адам эди.

⁴¹ Гершон огъуллары сойларында сайылгъанлар, Корюшюв Чадырында хызмет эткенлернинъ эписи булардыр. РАББИ буюргъаны киби, Муса ве Харун оларны сайдылар.

⁴² Мерарий огъуллары сойларына ве къоранталарына коре сайылдылар.

⁴³ Корюшюв Чадырында хызмет этмек ичюн, хызметке ляйыкъ олгъан отуздан башлап элли яшынадже адамларнынъ эписини сайдылар.

⁴⁴ Оларнынъ сойларына коре сайылгъанлар 3 200 адам эди.

⁴⁵ Мерарий огъуллары сойларында сайылгъанлар булардыр. РАББИ Мусагъа буюргъаны киби, Муса ве Харун оларны сайдылар.

⁴⁶ Бойледже Муса, Харун ве Исраиль башлыкълары эписи левийлилерни оларнынъ сойларына ве къоранталарына коре сайдылар.

⁴⁷ Корюшюв Чадырында хызмет эткенлернинъ ве юклерни ташыгъанларнынъ эписини, отуздан башлап элли яшынадже бутюн адамларны сайдылар.

⁴⁸ Сайылгъанлар 8 580 адам эди.

⁴⁹ РАББИ Мусагъа буюргъаны киби, олар сайылдылар ве эр кес япаджакъ ишке ве ташыйджакъ юкке бельгилендилер. РАББИ Мусагъа эмир бергени киби, оларны сайдылар.