Сайылар 36 - Мукъаддес Китап

Целофехаднынъ къызларына айырылгъан пайлар акъкъында

¹ Юсуф огъуллары сойларындан, Гилад огъуллары сойларындан (Гилад – Макирнинъ огълу, Макир – Менашшенинъ огълу эди) къоранта башлыкълары якъынлашып, Мусанен ве башлыкъларнен, Исраиль огъуллары къабилелерининъ башлыкъларынен лаф эттилер.

² Олар: – РАББИ эфендимизге топракъны джерепке коре Исраиль огъуллары арасында пайлаштырмагъа буюрды. Бундан гъайры, РАББИ эфендимизге Целофехад агъамызнынъ топракъ пайыны онынъ къызларына бермеге буюрды, – дедилер.

³ – Эгер Целофехаднынъ къызлары башкъа бир Исраиль огъуллары къабилесинден олгъан огъланларгъа акъайгъа чыкъсалар, топракъ пайы бизим бабаларымыздан алынып, акъайларынен багълы къабилесине кечеджек. Бойледже, джерепке коре бизге тюшкен пай эксиледжек.

⁴ Исраиль огъулларында 50-нджи йылы олгъанда биле, къызларнынъ пайы олар оладжакъ къабилеге кечеджек. Бойледже, оларнынъ пайы бабаларымызгъа тюшкен пайдан алынаджакъ.

⁵ Муса Исраиль огъулларына РАББИнинъ сёзюне коре бойле буюрды: – Юсуф огъулларынынъ къабилеси догъру айта.

⁶ Целофехаднынъ къызлары акъкъында РАББИнинъ буюргъаны будыр: олар бегенген огълангъа акъайгъа чыкъмакъ мумкюн. Лякин тек озь бабасы къабилесининъ сойларындан олгъан акъайларгъа чыкъсынлар.

⁷ О вакъыт Исраиль огъулларынынъ топракъ пайлары бир къабиледен башкъа къабилеге кечмейджек. Исраиль огъулларындан эр бири озь къабилесининъ топракъ пайына багълы олмакъ керек.

⁸ Исраиль огъулларынынъ къабилелеринде топракъ пайыны алгъан эр бир къыз озь бабасы къабилесининъ сойларындан олгъан акъайгъа чыкъмакъ керек. О заман Исраиль огъуллары бабаларынынъ топракъ пайына саип оладжакълар,

⁹ ве топракъ пайлары бир къабиледен башкъа къабилеге кечмейджек. Исраиль огъулларынынъ эр къабилеси озь топракъ пайына багълы олсун.

¹⁰ РАББИ Мусагъа насыл буюргъан олса, Целофехад къызлары ойле де яптылар.

¹¹ Целофехаднынъ къызлары Махла, Тирца, Хогъла, Милкъа ве Ноа эмджелерининъ огъулларына акъайгъа чыкътылар.

¹² Бойледже, къызлар Юсуфнынъ огълу Менашше огъулларынынъ сойларындаки огъланларгъа акъайгъа чыкътылар, ве топракъ пайлары бабасы къабилесининъ сойларында къалды.

¹³ Моав тегизликлеринде, Иорданнынъ янында, Ерихон къаршысында РАББИ Мусанынъ ярдымынен Исраиль огъулларына бойле эмирлерини ве къарарларыны буюрды.