Сайылар 34 - Мукъаддес Китап

Ваде этильген топракънынъ сынъырлары

¹ РАББИ Мусагъа бойле деди:

² – Исраиль огъулларына эмир эт, оларгъа бойле айт: Ханаан топрагъына киргенинъизде, сизге мульк оларакъ тюшеджек топракъ, кенарларынен берабер Ханаан топрагъы бойле оладжакъ:

³ Дженюбий янынъыз Цин сахрасындан Эдом кенары боюнджа узанаджакъ. Шаркъта дженюбий сынъырынъыз Олю денъизнинъ уджундан башлайджакъ.

⁴ Сынъыр дженюбий тарафкъа, Акъреплер тёпелигине ёл алып, Цин сахрасындан кечеджек ве сонъ Къадеш-Барнеагъа, дженюбий тарафына узанаджакъ, Хацар-Аддаргъа барып, Ацмондан кечеджек,

⁵ Ацмондан сынъыр Мысыр вадийине буруладжакъ ве Акъ денъизге бараджакъ.

⁶ Гъарбий сынъырынъыз Акъ денъиз оладжакъ. Будыр гъарпта оладжакъ сынъырынъыз.

⁷ Шималий сынъырынъыз бойле оладжакъ: сынъырны Акъ денъизден Хор дагълыгъына къадар сызыкъ чекип къайд этинъиз,

⁸ сонъ оны Хор дагълыгъындан Лево-Хаматкъа къадар чызынъыз, сынъырнынъ уджлары Цедадгъа къадар оладжакъ.

⁹ Сонъ сынъыр Цифронгъа узанаджакъ, ве сынъырнынъ уджлары Хацар-Энанда битеджек. Будыр шимальде оладжакъ сынъырынъыз.

¹⁰ Шаркъий сынъырынъызны Хацар-Энандан Шефамгъадже узатынъыз.

¹¹ Шефамдан сынъыр Айиннинъ шаркъ тарафында Ривлагъадже ашагъы тараф тюшер. Сонъ сынъыр ашагъы кетип, Киннерет денъизининъ шаркъ тарафындаки джапкъа къадар узанаджакъ.

¹² Сонъ Иордангъа тараф ашагъы кетеджек, ве сынъырнынъ уджлары Олю денъизде токътайджакъ. Будыр топрагъынъызнынъ эр тарафтан олгъан сынъырлары.

¹³ Муса Исраиль огъулларына бойле буюрды: – Мульк оларакъ джерепке коре пайлаштыраджакъ топрагъынъыз будыр. РАББИнинъ буюргъанына коре, топракъ докъуз къабилеге ве яры къабилеге пайлаштырылсын,

¹⁴ чюнки Рубен огъулларынынъ къабилеси сойларынен берабер, Гъад огъулларынынъ къабилеси сойларынен берабер ве Менашше къабилесининъ ярысы озь пайларыны энди алдылар.

¹⁵ Бу эки къабиле ве ярым къабиле озь топракъ пайларыны Ерихоннынъ къаршысында, Иорданнынъ шаркъ тарафында алдылар.

Пай этмек ичюн джевапкяр адамларнынъ тайинленюви

¹⁶ РАББИ Мусагъа бойле деди:

¹⁷ – Топракъны аранъызда пайлаштыраджакъ акъайларнынъ адлары будыр: руханий Элазар ве Нуннынъ огълу Ехошуа.

¹⁸ Бундан гъайры, топракъны пайлаштырмакъ ичюн эр къабиледен бирер башлыкъ алынъыз.

¹⁹ Бу акъайларнынъ адлары будыр: Ехуда къабилесинден – Ефунненинъ огълу Къалев,

²⁰ Шимеон огъулларынынъ къабилесинден – Аммихуднынъ огълу Шемуэл,

²¹ Биньямин къабилесинден – Кислоннынъ огълу Элидад,

²² Дан огъулларынынъ къабилесинден – Ёглийнинъ огълу башлыкъ Буккий,

²³ Юсуфнынъ огъулларындан, Менашше огъулларынынъ къабилесинден – Эфоднынъ огълу башлыкъ Ханниэл,

²⁴ Эфраим огъулларынынъ къабилесинден – Шифтаннынъ огълу башлыкъ Кемуэл,

²⁵ Зевулун огъулларынынъ къабилесинден – Парнакънынъ огълу башлыкъ Элицафан,

²⁶ Йиссакъар огъулларынынъ къабилесинден – Аззаннынъ огълу башлыкъ Палтиэл,

²⁷ Ашер огъулларынынъ къабилесинден – Шеломийнинъ огълу башлыкъ Ахихуд,

²⁸ Нафталий огъулларынынъ къабилесинден – Аммихуднынъ огълу Педахел.

²⁹ Ханаан топрагъында Исраиль огъулларына топракъны пайлаштырмагъа РАББИ бу адамларгъа буюрды.