Сайылар 32 - Мукъаддес Китап

Эки бучукъ къабиленинъ ерлешюви

¹ Рубен ве Гъад огъулларынынъ пек чокъ сюрюлери бар эди. Олар Язер ве Гилад топракъларында сюрюлерни бакъмакъ ичюн ер олгъаныны корьдилер.

² Гъад огъуллары ве Рубен огъуллары Мусагъа, руханий Элазаргъа ве джемаатнынъ башлыкъларына келип:

³ – Эм Атарот ве Дивон, эм Язер, эм Нимра, эм Хешбон, эм Элале, эм Севам, эм Нево, эм Беон –

⁴ Исраиль джемаатынынъ огюнде РАББИ бойсундыргъан топракълары – сюрюлер ичюн келишкен топракълар, къулларынъызда исе сюрюлер бар, – дедилер.

⁵ Ве даа къоштылар: – Козюнъде урьмет къазансакъ, шу топракъны сенинъ къулларынъа мульк оларакъ бер, бизлерни Иорданнынъ башкъа тарафына кечирме.

⁶ Муса Гъад огъулларына ве Рубен огъулларына бойле джевап къайтарды: – Агъа-къардашларынъыз дженк этеджеклер, сизлер исе мында къаладжакъсынъызмы?

⁷ Не ичюн сиз Исраиль огъулларынынъ юреклерини оларгъа РАББИ берген топракъкъа кечмектен къайтарасынъыз?

⁸ Деделеринъиз де, мен оларны Къадеш-Барнеадан топракъны бакъып чыкъмакъ ичюн ёллагъанымда, ойле яптылар.

⁹ Олар Эшкъол вадийине къадар кеттилер, топракъны корьдилер, лякин Исраиль огъулларыны рухтан тюшюрдилер, ве олар РАББИнинъ оларгъа берген топрагъына кетмедилер.

¹⁰ О куню РАББИ оларгъа къаршы пек ачувланды ве емин этип:

¹¹ «Мен Ибраимге, Исхакъкъа ве Якъупкъа бу топракъны бермеге ант эттим. Мысырдан чыкъкъан йигирми ве йигирми яшындан буюк олгъан бу адамлар исе бу топракъны корьмейджеклер, чюнки олар джан-юректен Меним артымдан кетмедилер.

¹² Ялынъыз кенизли Ефунненинъ огълу Къалев ве Нуннынъ огълу Ехошуа оны кореджеклер, чюнки олар джан-юректен РАББИнинъ артындан кеттилер», – деди.

¹³ РАББИнинъ гъазабы Исраильге къаршы къайнады, ве РАББИнинъ козю огюнде яманлыкъ япкъан несиль кесильмегендже, О оларны сахра бою къыркъ йыл долаштырды.

¹⁴ Иште, РАББИнинъ гъазабыны Исраильге къаршы даа зияде кучьлендирмек ичюн, деделеринъизнинъ ерине сиз де, гунакярларнынъ пичлери, чыкътынъыз.

¹⁵ Сиз Ондан юзюнъизни чевирсенъиз, О сизни кене сахрада къалдырыр, ве сиз бутюн бу халкъны ёкъ этеджексинъиз.

¹⁶ Олар Мусагъа якъынлашып: – Мында биз сюрюлеримиз ичюн аранларны ве балаларымыз ичюн шеэрлерни къураджакъмыз, – дедилер.

¹⁷ – Бизлер биринджи сырада силяланырмыз, Исраиль огъулларынынъ оглеринден кетермиз ве оларны оларнынъ ерлерине алып барармыз. Балаларымыз исе, топракъта яшагъанлардан сакъланып, пекинген шеэрлерде къалсынлар.

¹⁸ Исраиль огъулларынынъ эр бири озь пайыны алмагъандже, эвлеримизге къайтмайджакъмыз.

¹⁹ Эгер бизге шаркъкъа тараф Иорданнынъ бу ялысында топракъ пайы берильсе, Иорданнынъ башкъа ялысында оларнен берабер пай алмайджакъмыз.

²⁰ Муса оларгъа бойле джевапланды: – Эгер сизлер айткъанынъызны япсанъыз, РАББИнинъ огюнде дженкке силяланып барсанъыз,

²¹ эгер РАББИ душманларыны къырмагъандже, эпинъиз силяланып, Онынъ огюнде Иорданнынъ башкъа тарафына кечсенъиз,

²² топракъ РАББИнинъ огюнде бойсунгъан сонъ, къайтып олурсынъыз ве РАББИнинъ ве Исраильнинъ огюнде къабаатсыз оладжакъсынъыз. О вакъыт РАББИнинъ огюнде бу топракъ сизинъ оладжакътыр.

²³ Лякин айткъанларынъызны япмасанъыз, РАББИге къаршы гуна къазанаджакъсынъыз ве гунанъыз сизинъ башынъызгъа тюшеджек.

²⁴ Балаларынъыз ичюн шеэрлерни къурунъыз, къой-эчкилеринъиз ичюн аранларны япынъыз. Берген сёзюнъизни беджеринъиз.

²⁵ Гъад огъуллары ве Рубен огъуллары Мусагъа: – Бизлер, къулларынъ, эфендимизнинъ буюргъаныны япармыз.

²⁶ Балаларымыз, апайларымыз, сюрюлеримиз ве бутюн айванларымыз мында, Гилад шеэрлеринде къаладжакълар.

²⁷ Къулларынъ эписи исе силяланып, эфендимизнинъ айткъаны киби, РАББИнинъ огюнде аскерлер оларакъ дженк этмек ичюн кетеджеклер, – дедилер.

²⁸ Муса олар акъкъында руханий Элазаргъа, Нуннынъ огълу Ехошуагъа ве исраиллилернинъ къабиле башлыкъларына буюргъанда,

²⁹ оларгъа: – Эгер Гъад огъуллары ве Рубен огъуллары эписи РАББИнинъ огюнде дженкке силяланып сизлернен берабер Иорданнынъ башкъа тарафына кечселер, сиз топракъларны бойсундыргъан сонъ, оларгъа мал-мульк оларакъ Гилад топрагъыны беринъиз.

³⁰ Амма силяланып сизлернен кетмеселер, Ханаан топрагъында сизлернен берабер топракъны аладжакълар, – деди.

³¹ Гъад огъуллары ве Рубен огъуллары бойле джевап бердилер: – РАББИнинъ къулларынъа айткъаныны япаджакъмыз.

³² Биз силяланып, РАББИнинъ огюнде Ханаан топрагъына кетеджекмиз. Лякин мулькюмизнинъ пайы Иорданнынъ бу тарафында олсун.

³³ Бойледже, Муса оларгъа – Гъад огъулларына, Рубен огъулларына ве Юсуфнынъ огълу Менашше къабилесининъ ярысына – аморлыларнынъ падишасы Сихоннынъ падишалыгъыны, Башан падишасы Огнынъ падишалыгъыны, топракъны ве онынъ шеэрлерини ве чевресиндеки койлерини, этрафларындаки топракъларынен шеэрлерни берди.

³⁴ Гъад огъуллары бойле пекинген шеэрлерни къурдылар: Дивон, Атарот, Ароэр,

³⁵ Атрот-Шофан, Язер, Ёгбеха,

³⁶ Бет-Нимра ве Бет-Харан шеэрлерини ве къойлар ичюн аранларны къурдылар.

³⁷ Рубен огъуллары бойле шеэрлерни къурдылар: Хешбон, Элале, Кирьятаим,

³⁸ Нево, Баал-Меон (буларнынъ адлары денъиштирильди) ве Сивма. Къургъан шеэрлерге олар янъы адлар бердилер.

³⁹ Макирнинъ огъуллары (Макир Менашшенинъ огълу эди) кетип, Гилад топрагъыны басып алдылар ве анда яшагъан аморлыларны къуваладылар.

⁴⁰ Бойледже, Муса Гиладны Менашшенинъ огълу Макирге берди, ве олар анда ерлештилер.

⁴¹ Менашшенинъ огълу Яир кетип, аморлыларнынъ чадыр койлерини басып алды ве оларны Хаввот-Яир деп адландырды.

⁴² Новах кетип, Кенат шеэрини ве этрафындаки койлерни запт этти ве оларгъа озь Новах адыны берди.