Сайылар 31 - Мукъаддес Китап

Исраиллилер мидьянлыларны джезалайлар

¹ РАББИ Мусагъа:

² – Исраиль огъуллары ичюн мидьянлыларны джезала. Бундан сонъ сен олип, халкъынъа къошуладжакъсынъ, – деди.

³ Муса халкъкъа буны айтты: – Мидьянлыларгъа къаршы дженк этмек, оларгъа РАББИнинъ джезасыны бермек ичюн, аранъыздан адамларны силяландырынъыз.

⁴ Эр къабиледен бирер бинъ адам сайланъыз, исраиллилернинъ эр къабилесинден адамларны дженкке ёлланъыз.

⁵ Исраиллилернинъ бинълеринден, эр къабилесинден бирер бинъ адам сайлады, 12 000 адам дженкке силяланды.

⁶ Муса оларны, эр къабиледен бинъер адамны дженкке ёллады. Оларнен берабер руханий Элазарнынъ огълу Пинехасны дженкке ёллады. Пинехас янына мукъаддес савутларны ве телюке сигналы чалмакъ ичюн боразанларны алды.

⁷ РАББИ Мусагъа буюргъаны киби, олар мидьянлыларгъа къаршы чыкътылар ве эписи акъайларны ольдюрдилер.

⁸ Ольдюрильгенлернинъ арасында мидьянлы падишалар Эвий, Рекем, Цур, Хур ве Рева бар эдилер. Бу, беш мидьянлы падиша эди. Беорнынъ огълу Беламны да къылычнен ольдюрдилер.

⁹ Мидьянлы къадынларнен балаларыны исраиллилер эсир алдылар. Бутюн айванларыны, сюрюлерини, малларыны гъаниметке алдылар.

¹⁰ Мидьянлылар яшагъан бутюн шеэрлерини ве чадыр ордуларыны атеште якътылар.

¹¹ Адамлардан башлап айванларгъадже бутюн алынгъан шейлерни ве гъаниметни янларына алдылар.

¹² Эсирлернен гъаниметни ве бутюн алынгъан шейлерни Мусагъа ве руханий Элазаргъа ве Исраиль огъулларынынъ джемаатына, ордусына, Моав тегизлигине, Иордан озенининъ янына, Ерихон къаршысына кетирдилер.

Эсирлернинъ такъдири ве гъаниметнинъ темизленюви

¹³ Муса, руханий Элазар ве джемаатнынъ башлыкълары оларны къаршыламакъ ичюн ордудан тыш чыкътылар.

¹⁴ Муса дженктен къайткъан арбий башлыкъларына: бинъбашыларгъа ве юзбашыларгъа ачувланды,

¹⁵ оларгъа: – Не ичюн эписи къадынларны сагъ къалдырдынъыз?

¹⁶ Бу къадынлар Беламнынъ огютине коре, Пеорнынъ истегине уйып, Исраиль огъуллары ичюн РАББИден юзь чевирмеге мана олдылар. Шунынъ ичюн РАББИнинъ джемааты арасында ёкъ этилюв олды.

¹⁷ Шимди бутюн огълан балачыкъларны ве акъайнен яткъан къадынларны ольдюринъиз.

¹⁸ Ялынъыз акъайнен ятмагъан яш къызларны озьлеринъиз ичюн сагъ къалдырынъыз.

¹⁹ Аранъызда биревни ольдюрген я да ольдюрильген биревге токъунгъан эр кес еди кунь ордудан тыш олсун. Учюнджи ве единджи куню озюнъизни ве эсирлеринъизни элялланъыз.

²⁰ Эр урбанъызны ве териден, эчки юнюнден, агъачтан япылгъан эр савутны элялланъыз, – деди.

²¹ Бундан сонъ руханий Элазар дженкке баргъан аскерлерге: – РАББИ Мусагъа буюргъан къануннынъ низамнамеси будыр.

²² Алтынны, кумюшни, бакъырны, демирни, къалайны, къуршунны

²³ ве атешке даянгъан эр шейни темизлемек ичюн, атештен кечиринъиз. Ондан гъайры оларны темизлев сувунен темизлемек керек. Атешке даянмагъан шейлерни сувдан кечиринъиз.

²⁴ Единджи куню урбаларынъызны ювунъыз ве бойле этип, элял оладжакъсынъыз. Сонъ ордугъа кирмек мумкюнсинъиз, – деди.

Гъаниметнинъ болюнюви

²⁵ РАББИ Мусагъа бойле деди:

²⁶ – Сен, руханий Элазар ве джемаат башлыкълары эсирге алынгъан адамларны ве басып алынгъан айванларны сайынъыз.

²⁷ Алынгъан шейлерни дженкке баргъан аскерлер ве бутюн джемаатнынъ арасында болюнъиз.

²⁸ Дженкке баргъан аскерлерден РАББИ ичюн берги ал. Эр беш юз адамдан, тувардан, эшектен ве къой-эчкиден бир адамны, туварны, эшекни ве къой-эчкини ал.

²⁹ Бу бергини аскерлернинъ яры пайындан ал да, РАББИге котериледжек бахшыш оларакъ Элазар руханийге бер.

³⁰ Исраиль огъулларынынъ ярысындаки адамлардан, туварлардан, эшеклерден, къой-эчкилерден ве башкъа айванлардан эллиде бирини ал да, РАББИнинъ Мескени ичюн джевапкяр олгъан левийлилерге бер.

³¹ Муса ве руханий Элазар РАББИнинъ Мусагъа буюргъаныны яптылар.

³² Дженкке баргъан аскерлернинъ гъаниметинден къалгъан булар эди: 675 000 къой-эчки,

³³ 72 000 тувар,

³⁴ 61 000 эшек

³⁵ ве эписи олып, акъайнен ятмагъан 32 000 къыз.

³⁶ Дженкке баргъан аскерлерге тюшкен яры пай бу эди: 337 500 къой-эчки,

³⁷ олардан РАББИге берги оларакъ – 675 къой-эчки;

³⁸ 36 000 тувар, олардан РАББИге берги оларакъ – 72 тувар;

³⁹ 30 500 эшек, олардан РАББИге берги оларакъ – 61 эшек;

⁴⁰ 16 000 адам, олардан РАББИге берги оларакъ – 32 адам.

⁴¹ РАББИ буюргъаны киби, Муса бу бергини, РАББИнинъ котериледжек бахшышыны руханий Элазаргъа берди.

⁴² Дженкке баргъан аскерлерден алынгъан, Исраиль огъулларына берильген яры пайы,

⁴³ джемааткъа тюшкен яры пай бу эди: 337 500 къой-эчки,

⁴⁴ 36 000 тувар,

⁴⁵ 30 500 эшек,

⁴⁶ 16 000 адам.

⁴⁷ РАББИ Мусагъа буюргъаны киби, Исраиль огъулларына тюшкен яры пайдан Муса эр элли адамдан ве айвандан бирини алып, оларны РАББИнинъ Мескени ичюн джевапкяр олгъан левийлилерге берди.

⁴⁸ Орду башлары, бинъбашылар ве юзбашылар Мусагъа келип,

⁴⁹ онъа: – Биз, къулларынъ, бизим къолумызда олгъан аскерлерни сайдыкъ. Ич бир адам гъайып олмады.

⁵⁰ Биз РАББИге бахшыш оларакъ тапылгъан алтын шейлерден билек ильванларыны, билезликлерни, юзюклерни, купелерни, кулонларны кетирдик. Буларны РАББИмизнинъ огюне джанларымыз ичюн одеме этмеге кетирдик, – дедилер.

⁵¹ Муса ве руханий Элазар алтынны, эр чешитте япылгъан алтын шейлерни алдылар.

⁵² Бинъбашылардан ве юзбашылардан алынгъан, котериледжек бахшыш оларакъ РАББИге кетирильген алтыннынъ джеми агъырлыгъы 167 кило эди.

⁵³ Дженкке баргъан эр бир аскер озю ичюн чайпагъан эди.

⁵⁴ Муса ве руханий Элазар бинъбашылардан ве юзбашылардан алтынны алды, Корюшюв Чадыры ичине, РАББИнинъ огюне, Исраиль огъуллары ичюн бир хатырлатма оларакъ кетирдилер.