Сайылар 30 - Мукъаддес Китап

Адакълар акъкъында къаиделер

¹ Муса РАББИ буюргъан эр шейни Исраиль огъулларына айтып берди.

² Исраиль огъулларынынъ къабиле башлыкъларына бойле деди: – РАББИ буны буюрды:

³ Эгер бир кимсе РАББИге адакъ берсе я да озюни сёзнен багъласа, берген сёзюни бозмасын, агъзындан эр чыкъкъан лафны ерине кетирсин.

⁴ Эгер къадын РАББИге адакъ берсе ве яшлыгъында, бабасынынъ эвинде озюни сёзнен багъласа,

⁵ ве бабасы онынъ адагъыны ве озюни сёзнен багълагъаныны эшитсе, лякин онъа къаршы чыкъмаса, къадын бутюн адакъларыны ве озюни тутмагъа берген сёзюни ерине кетирмек керек.

⁶ Лякин бабасы буларны эшитип, онъа разылыкъ бермесе, онынъ эписи адакълары ве еминлери ерине кетирильмек керекмей. РАББИ оны багъышлайджакъ, чюнки бабасы онъа разылыкъ бермеди.

⁷ Эгер къадын адакъ вакътында, я да агъзындан чыкъкъан лафынен озюни багълагъанында, акъайгъа чыкъса,

⁸ ве акъайы буны эшитип, къаршы чыкъмаса, къадыннынъ бутюн берген адакълары ве сёзлери ерине кетирильмек керек.

⁹ Лякин акъайы буларны эшитип, онъа разылыкъ бермесе, онынъ адакъларыны ве агъзындан чыкъып оны багълагъан лафларыны ёкъ этеджек. РАББИ къадынны багъышлайджакъ.

¹⁰ Тул я да айырылгъан апайнынъ адагъы, джанына насыл агъырлыкъ алса-алсын, ерине кетирильмек керек.

¹¹ Эгер бир къадын акъайынынъ эвинде адакъ берсе я да озюни сёзнен багъласа,

¹² ве акъайы буны эшитип, къаршы чыкъмайып ясакъ этмесе, къадыннынъ бутюн адакълары ве бутюн сёзлери ерине кетирильмек керек.

¹³ Лякин эгер акъай оларны эшитип, оларны инкяр этсе, агъзындан чыкъкъан бутюн адакълары ве сёзлери ерине кетирильмек керекмей. Акъайы оларны ёкъ этти, ве РАББИ къадынны багъышлайджакъ.

¹⁴ Озь джаныны итаат этмек ичюн къадыннынъ берильген эр адагъыны ве эр еминини ерине кетирмеге акъайынынъ эм разылыкъ бермеге, эм разылыкъ бермемеге акъкъы бар.

¹⁵ Эгер акъай кунь куньден сесини чыкъармайып, онъа къаршы чыкъмаса, демек о, бутюн адакъларыны я да сёзлерини ерине кетирмеге разылыкъ берди, чюнки оларны эшиткен куню оларгъа къаршы чыкъмады.

¹⁶ Эгер оларны эшиткенден бираз вакъыт кечкен сонъ, оларны бозса, къадыннынъ гунасы акъайынынъ башына тюшер.

¹⁷ Акъайнынъ къадынынен, бабанынъ онынъ эвинде яшагъан яш къызынен аралары бойле олсун. Будыр – РАББИ Мусагъа буюргъан низамнамелер.