Сайылар 3 - Мукъаддес Китап

Харуннынъ огъуллары

¹ Мына, Харун, Муса ве оларнынъ эвлятлары акъкъында ривает. О вакъыт РАББИ Синай дагъында Мусанен лаф этти.

² Харун огъулларынынъ адлары шудыр: биринджи огълу Надав, Авиху, Элазар ве Итамар.

³ Будыр Харун огъулларынынъ, ягълангъан руханийлернинъ адлары. Харун оларны руханийликке багъышлады.

⁴ Лякин Надав ве Авиху РАББИнинъ огюнде ольдилер, чюнки олар Синай сахрасында РАББИнинъ огюнде арам атешни къулланып ибадет эттилер. Оларнынъ балалары ёкъ эди. Элазар ве Итамар Харун бабасы янында руханийлик эттилер.

Левийнинъ къабилеси

⁵ РАББИ Мусагъа бойле деди:

⁶ – Левийлилернинъ къабилесини кетир де, руханий Харуннынъ янына къой; олар онынъ янында хызмет этсинлер.

⁷ Олар Харун ве бутюн джемаат ичюн хызметлерини Корюшюв Чадырынынъ огюнде беджерсинлер, Мескен ичюн хызметлерини япсынлар

⁸ ве Корюшюв Чадырынынъ бутюн шейлерини сакълап къорчаласынлар. Исраиль огъулларынынъ ерине олар Мескен ичюн хызметлерини япсынлар.

⁹ Левийлилерни Харунгъа ве онынъ огъулларына бер. Исраиль огъулларындан олар бутюнлей Харунгъа берильгендир.

¹⁰ Харунны ве онынъ огъулларыны руханийлик вазифесине къой. Олардан башкъа бирев бу хызметни япса, ольдюриледжектир.

¹¹ РАББИ Мусагъа бойле деди:

¹² – Иште, Исраиль огъулларынынъ арасындан, эписи исраиллилернинъ биринджи огъулларынынъ еринде Мен Озюме левийлилерни алдым. Левийлилер Менимки олсунлар.

¹³ Бутюн биринджи догъгъанлар Менимкидир. Мысыр топрагъында биринджи догъгъанларнынъ эписини ёкъ эткен куньде, Мен Исраильнинъ эм инсанларда, эм айванларда биринджи догъгъанларыны Озюм ичюн айырдым. Олар Менимки олсунлар. Мен – РАББИм.

Левийлилернинъ сойларына коре сайылувы

¹⁴ РАББИ Мусагъа Синай сахрасында бойле деди:

¹⁵ – Левий огъулларыны къоранта ве сойларына коре сай. Бир айлыкъ яшындан башлап ве буюк яшта олгъан эр бир эркекни сай.

¹⁶ Муса эмирге бойсунып, РАББИ буюргъаны киби, оларны сайды.

¹⁷ Левий огъулларынынъ адлары будыр: Гершон, Кехат ве Мерарий.

¹⁸ Сойларына коре Гершон огъулларынынъ адлары будыр: Ливний ве Шимий.

¹⁹ Сойларына коре Кехатнынъ огъуллары будыр: Амрам ве Йицхар, Хеврон ве Уззиэл.

²⁰ Сойларына коре Мерарийнинъ огъуллары будыр: Махлий ве Муший. Будыр къоранталарына коре левийлилернинъ сойлары.

²¹ Гершондан – Ливний сою ве Шимий сою. Бу, гершонлыларнынъ сойлары.

²² Джедвельде язылгъан бир айлыкъ ве даа буюк яштаки бутюн эркеклернинъ сайысы 7 500 эди.

²³ Гершонлыларнынъ сойлары Мескеннинъ артындан гъарпкъа тараф ордунен ерлешсинлер.

²⁴ Лаэлнинъ огълу Эльясаф гершонлыларнынъ къоранталары башлыгъы олсун.

²⁵ Гершон огъуллары Корюшюв Чадырында Мескен, Чадырнынъ орьтюси ве Корюшюв Чадырынынъ киришиндеки перде ичюн джевапкяр эдилер.

²⁶ Азбар перделери, Мескеннинъ ве къурбан ерининъ чевресиндеки азбар киришиндеки перде, йиплер ве бутюн керекли алетлери оларнынъ къолунда эдилер.

²⁷ Кехаттан – амрамлыларнынъ сою, йицхарлыларнынъ сою, хевронлыларнынъ сою ве уззиэллилернинъ союдыр. Бу, кехатлыларнынъ сойларыдыр.

²⁸ Джедвельде язылгъан бир айлыкъ ве даа буюк яштаки бутюн эркеклернинъ сайысы 8 600 эди. Олар Мукъаддес Ер ичюн джевапкяр эди.

²⁹ Кехат огъулларынынъ сойлары озь ордуларыны Мескеннинъ дженюбий тарафында ерлештирсинлер.

³⁰ Уззиэлнинъ огълу Элицафан кехатлыларнынъ къоранталары башлыгъы олсун.

³¹ Олар Сандыкъ, стол, къандиль, къурбан ерлери, хызмет вакътында къулланылгъан мукъаддес савутлар ве бутюн алетлеринен берабер перде ичюн джевапкяр олсунлар.

³² Руханий Харуннынъ огълу Элазар левийли башлыкъларнынъ башлыгъы олсун. О, Мукъаддес Ер ичюн джевапкяр олгъанларгъа башлыкъ этсин.

³³ Мерарийден – Махлий сою ве Муший сою. Бу, Мерарийнинъ сойларыдыр.

³⁴ Джедвельде язылгъан бир айлыкъ ве даа буюк яштаки бутюн эркеклернинъ сайысы 6 200 эди.

³⁵ Авихаилнинъ огълу Цуриэл мерарийлилернинъ къоранталарына башлыкъ олсун. Олар озь ордусыны Мескеннинъ шималий тарафында ерлештирсинлер.

³⁶ Мерарийнинъ огъуллары Мескеннинъ черчивелери, сырыкълары, диреклери, темеллери, оларнынъ эписи шейлери ве алетлери,

³⁷ чевре-четиндеки азбарнынъ диреклери, оларнынъ темеллери, къазычыкълары ве йиплери ичюн джевапкяр олсунлар.

³⁸ Мескеннинъ огюнде, Корюшюв Чадырынынъ шаркъ тарафында озь ордуларыны Муса, Харун ве огъуллары ерлештирсин. Олар Исраиль огъуллары ичюн Мукъаддес Ер ичюн джевапкяр олсунлар. Мукъаддес Ерге башкъа эр ким якъынлашса, ольдюриледжектир.

³⁹ РАББИнинъ буюргъанына коре Муса ве Харун джедвельде язгъан бир айлыкъ ве даа буюк яштаки бутюн левийли эркеклернинъ сайысы, оларнынъ сойларына коре, 22 000 эди.

Левийлилерни биринджи догъгъанларнынъ ерине алув

⁴⁰ РАББИ Мусагъа бойле деди: – Исраиллилернинъ бир айлыкъ ве даа буюк яштаки биринджи догъгъан бутюн эркеклерини сай, адларыны яз.

⁴¹ Мен ичюн левийлилерни ал. Мен – РАББИм. Оларны исраиллилернинъ бутюн биринджи догъгъанларынынъ ерине ал, исраиллилернинъ биринджи догъгъан айванларынынъ ерине Мен ичюн левийлилернинъ айванларыны ал.

⁴² Бойледже, Муса, РАББИ буюргъаны киби, исраиллилернинъ биринджи догъгъанларынынъ эписини сайып, джедвельге язды.

⁴³ Адлары язылгъан, биринджи догъгъан бир айлыкъ ве даа буюк яштаки эркеклернинъ сайысы 22 273 эди.

⁴⁴ РАББИ Мусагъа бойле деди:

⁴⁵ – Исраиллилернинъ биринджи догъгъанларынынъ ерине левийлилерни, айванларынынъ ерине левийлилернинъ айванларыны ал. Левийлилер Меним олсунлар. Мен – РАББИм.

⁴⁶ Левийлилернинъ сайысына бакъкъанда, исраиллилернинъ биринджи догъгъанларындан къалгъан 273 адамны сатын алмакъ ичюн,

⁴⁷ адам башына бешер кумюш ал. Кумюшнинъ чекиси мукъаддес шекель чекисинде олсун, бир шекельде йигирми гера бар.

⁴⁸ Къалгъан адамлар ичюн алынгъан кумюш акъчаны Харунгъа ве онынъ огъулларына бер.

⁴⁹ Муса левийлилернинъ сайысындан къалгъан исраиллилер ичюн кумюш акъчасыны алды.

⁵⁰ Исраиллилернинъ биринджи догъгъанларындан мукъаддес шекель чекисинде 1 365 кумюш акъчасыны алды.

⁵¹ РАББИнинъ эмирине коре, РАББИ Мусагъа буюргъаны киби, Муса кумюш акъчаны Харунгъа ве онынъ огъулларына берди.