Сайылар 29 - Мукъаддес Китап

Боразанлар Кунюнде кетирильген бахшышлар

¹ Единджи айда, айнынъ биринджи куню мукъаддес топлашувынъыз олсун, ишке янашманъыз. О кунь сизлер ичюн Боразанлар Куню олсун.

² РАББИге хош къокъу чыкъармакъ ичюн, бутюнлей якъыладжакъ къурбан оларакъ бир бузав, бир къочкъар ве еди баш бир йыллыкъ къозу кетиринъиз. Олар къусурсыз олмакъ керек.

³ Оларнен берабер ашлыкъ бахшышы оларакъ зейтюн ягъынен къарыштырылгъан энъ яхшы богъдай унуны кетиринъиз: бир бузавнен берабер – учь чанакъ, бир къочкъарнен берабер – эки чанакъ,

⁴ еди къозудан эр къозунен берабер – бир чанакъ.

⁵ Гуналар ичюн къурбан оларакъ, сиз ичюн одеме этмеге, бир теке кетиринъиз.

⁶ Низамнамеге коре кетирильген янъы айнынъ бутюнлей якъыладжакъ къурбанындан ве ашлыкъ бахшышындан гъайры, эр вакъыттаки бутюнлей якъыладжакъ къурбандан, ашлыкъ бахшышындан ве оларнынъ тёкюледжек бахшыштан гъайры, буларны РАББИге хош къокъу чыкъармакъ ичюн кетиринъиз.

Одеме Куню кетирильген бахшышлар

⁷ Единджи айнынъ онунджы куню мукъаддес топлашувынъыз олсун. О куню алчакъгонъюлли олунъыз ве ишке янашманъыз.

⁸ РАББИге хош къокъу чыкъармакъ ичюн, бутюнлей якъыладжакъ къурбан оларакъ бир бузав, бир къочкъар ве еди баш бир йыллыкъ къозу кетиринъиз. Олар къусурсыз олмакъ керек.

⁹ Оларнен берабер ашлыкъ бахшышы оларакъ зейтюн ягъынен къарыштырылгъан энъ яхшы богъдай унуны кетиринъиз: бир бузавнен берабер – учь чанакъ, бир къочкъарнен берабер – эки чанакъ,

¹⁰ еди къозудан эр къозунен берабер – бир чанакъ.

¹¹ Гуналар ичюн къурбан оларакъ бир теке кетиринъиз. Булар, одемелер этмеге гуналар ичюн къурбандан ве эр вакъыттаки бутюнлей якъыладжакъ къурбаннен тёкюледжек бахшышлардан ве ашлыкъ бахшышларындан гъайры олсунлар.

Чалашлар Байрамында кетирильген бахшышлар

¹² Единджи айнынъ 15-инджи куню мукъаддес топлашувынъыз олсун, ишке янашманъыз. Еди кунь девамында РАББИнинъ байрамыны кечиринъиз.

¹³ РАББИге хош къокъу чыкъармакъ ичюн, бутюнлей якъыладжакъ къурбан оларакъ 13 бузав, эки къочкъар ве 14 баш бир йыллыкъ къозу кетиринъиз. Олар къусурсыз олмакъ керек.

¹⁴ Оларнен берабер ашлыкъ бахшышы оларакъ зейтюн ягъынен къарыштырылгъан энъ яхшы богъдай унуны кетиринъиз: 13 бузавларнынъ эр бузавынен берабер – учь чанакъ, эки къочкъарнынъ эр къочкъарынен берабер – эки чанакъ,

¹⁵ 14 къозудан эр къозунен берабер – бир чанакъ.

¹⁶ Гуналар ичюн къурбан оларакъ бир теке кетиринъиз. Булар, эр вакъыттаки бутюнлей якъыладжакъ къурбаннен тёкюледжек бахшышлардан ве ашлыкъ бахшышларындан гъайры олсунлар.

¹⁷ Экинджи куню 12 бузав, эки къочкъар ве 14 баш бир йыллыкъ къозу кетиринъиз. Олар къусурсыз олмакъ керек.

¹⁸ Оларнен берабер бузавларнынъ, къочкъарларнынъ ве къозуларнынъ сайысына коре, къараргъа коре ашлыкъ бахшышларыны ве тёкюледжек бахшышларны кетиринъиз.

¹⁹ Гуналар ичюн къурбан оларакъ бир теке кетиринъиз. Булар, эр вакъыттаки бутюнлей якъыладжакъ къурбаннен тёкюледжек бахшышлардан ве ашлыкъ бахшышларындан гъайры олсунлар.

²⁰ Учюнджи куню 11 бузав, эки къочкъар ве 14 баш бир йыллыкъ къозу кетиринъиз. Олар къусурсыз олмакъ керек.

²¹ Оларнен берабер бузавларнынъ, къочкъарларнынъ ве къозуларнынъ сайысына коре, къараргъа коре ашлыкъ бахшышлары ве тёкюледжек бахшышларны кетиринъиз.

²² Гуналар ичюн къурбан оларакъ бир теке кетиринъиз. Булар, эр вакъыттаки бутюнлей якъыладжакъ къурбаннен тёкюледжек бахшышлардан ве ашлыкъ бахшышларындан гъайры олсунлар.

²³ Дёртюнджи куню он бузав, эки къочкъар ве 14 баш бир йыллыкъ къозу кетиринъиз. Олар къусурсыз олмакъ керек.

²⁴ Оларнен берабер бузавларнынъ, къочкъарларнынъ ве къозуларнынъ сайысына коре, къараргъа коре ашлыкъ бахшышлары ве тёкюледжек бахшышларны кетиринъиз.

²⁵ Гуналар ичюн къурбан оларакъ бир теке кетиринъиз. Булар, эр вакъыттаки бутюнлей якъыладжакъ къурбаннен тёкюледжек бахшышлардан ве ашлыкъ бахшышларындан гъайры олсунлар.

²⁶ Бешинджи куню докъуз бузав, эки къочкъар ве 14 баш бир йыллыкъ къозу кетиринъиз. Олар къусурсыз олмакъ керек.

²⁷ Оларнен берабер бузавларнынъ, къочкъарларнынъ ве къозуларнынъ сайысына коре, къараргъа коре ашлыкъ бахшышлары ве тёкюледжек бахшышларны кетиринъиз.

²⁸ Гуналар ичюн къурбан оларакъ бир теке кетиринъиз. Булар, эр вакъыттаки бутюнлей якъыладжакъ къурбаннен тёкюледжек бахшышлардан ве ашлыкъ бахшышларындан гъайры олсунлар.

²⁹ Алтынджы куню секиз бузав, эки къочкъар ве 14 баш бир йыллыкъ къозу кетиринъиз. Олар къусурсыз олмакъ керек.

³⁰ Оларнен берабер бузавларнынъ, къочкъарларнынъ ве къозуларнынъ сайысына коре, къараргъа коре ашлыкъ бахшышлары ве тёкюледжек бахшышларны кетиринъиз.

³¹ Гуналар ичюн къурбан оларакъ бир теке кетиринъиз. Булар, эр вакъыттаки бутюнлей якъыладжакъ къурбаннен тёкюледжек бахшышлардан ве ашлыкъ бахшышларындан гъайры олсунлар.

³² Единджи куню еди бузав, эки къочкъар ве 14 баш бир йыллыкъ къозу кетиринъиз. Олар къусурсыз олмакъ керек.

³³ Оларнен берабер бузавларнынъ, къочкъарларнынъ ве къозуларнынъ сайысына коре, къараргъа коре ашлыкъ бахшышлары ве тёкюледжек бахшышларны кетиринъиз.

³⁴ Гуналар ичюн къурбан оларакъ бир теке кетиринъиз. Булар, эр вакъыттаки бутюнлей якъыладжакъ къурбаннен тёкюледжек бахшышлардан ве ашлыкъ бахшышларындан гъайры олсунлар.

³⁵ Секизинджи куню сизде байрам топлашувы олсун, ишке янашманъыз.

³⁶ Атеште бутюнлей якъыладжакъ къурбан оларакъ, РАББИге хош къокъу чыкъармакъ ичюн, бир бузав, бир къочкъар ве еди баш бир йыллыкъ къозу кетиринъиз. Олар къусурсыз олмакъ керек.

³⁷ Оларнен берабер: бузавнен, къочкъарнен ве къозуларнынъ сайысына коре къозуларнен берабер, къараргъа коре ашлыкъ бахшышлары ве тёкюледжек бахшышларны кетиринъиз.

³⁸ Гуналар ичюн къурбан оларакъ бир теке кетиринъиз. Булар, эр вакъыттаки бутюнлей якъыладжакъ къурбаннен тёкюледжек бахшышлардан ве ашлыкъ бахшышларындан гъайры олсунлар.

³⁹ Буларны РАББИге тайинленген вакъытта кетиринъиз. Олар адакъ бахшышларынъыздан, озь истегинен кетирильген бахшышларынъыздан, бутюнлей якъыладжакъ къурбанларынъыздан, ашлыкъ ве тёкюледжек бахшышларынъыздан, аманлыкъ къурбанларынъыздан гъайры олсунлар.