Сайылар 28 - Мукъаддес Китап

Эр вакъыттаки къурбанлар акъкъында

¹ РАББИ Мусагъа бойле деди:

² – Исраиль огъулларына бойле буюр, оларгъа бойле айт: Мукъайт олунъыз ве Меним бахшышларымны, Манъа хош къокъу чыкъармакъ ичюн атеште якъыладжакъ бахшыш оларакъ кетирген ашлыкъ бахшышларымны озь вакътында кетиринъиз.

³ Оларгъа айт: Атеште якъыладжакъ бахшыш оларакъ РАББИге шуны кетиринъиз: эки баш бир йыллыкъ къусурсыз къочкъарны. Оларны эр вакъыт бутюнлей якъыладжакъ къурбан оларакъ кетиринъиз.

⁴ Къочкъарнынъ бирини саба, экинджисини акъшам кетиринъиз.

⁵ Ашлыкъ бахшышы оларакъ ярым чанакъ темиз зейтюн ягъынен къарыштырылгъан бир чанакъ энъ яхшы богъдай унуны кетиринъиз.

⁶ Бу – даимий бутюнлей якъыладжакъ бахшыштыр. О, Синай дагъында буюрылгъан эди, хош къокъу чыкъармакъ ичюн, РАББИге атеште якъыладжакъ къурбандыр.

⁷ Эр бир къочкъарнен ярым чанакъ ольчюсинде тёкюледжек бахшышны кетиринъиз. Азиз ерде тёкюледжек бахшыш оларакъ РАББИ ичюн ичкини тёкюнъиз.

⁸ Экинджи къочкъарны, сабадаки киби, ашлыкъ бахшышынен ве тёкюледжек бахшышнен берабер атеште якъыладжакъ къурбан оларакъ акъшам кетиринъиз. О, РАББИге хош къокъу олсун.

Раатлыкъ куню кетирильген бахшышлар

⁹ Раатлыкъ куню эки баш бир йыллыкъ къусурсыз къочкъарны, ашлыкъ бахшышы оларакъ зейтюн ягъынен къарыштырылгъан эки чанакъ энъ яхшы богъдай унуны ве тёкюледжек бахшышны кетиринъиз.

¹⁰ Эр вакъыттаки бутюнлей якъыладжакъ къурбандан ве тёкюледжек бахшыштан гъайры, эр раатлыкъ куню бойле бутюнлей якъыладжакъ къурбанны кетиринъиз.

Янъы ай догъгъанда кетирильген бахшышлар

¹¹ Эр янъы айнынъ биринджи куню РАББИге бутюнлей якъыладжакъ къурбан оларакъ туварынъыздан эки бузавны, бир къочкъарны ве еди баш бир йыллыкъ къусурсыз къозуны кетиринъиз.

¹² Эр бузавнен берабер ашлыкъ бахшышы оларакъ зейтюн ягъынен къарыштырылгъан учь чанакъ энъ яхшы богъдай уну, къочкъарнен берабер ашлыкъ бахшышы оларакъ зейтюн ягъынен къарыштырылгъан эки чанакъ энъ яхшы богъдай уну,

¹³ эр къозунен берабер ашлыкъ бахшышы оларакъ зейтюн ягъынен къарыштырлгъан бир чанакъ энъ яхшы богъдай унуны кетиринъиз. Бу – РАББИ ичюн бутюнлей якъыладжакъ къурбандыр ве хош къокъудыр.

¹⁴ Эр бузавнен берабер тёкюледжек бахшыш оларакъ бир чанакъ, къочкъарнен берабер – чанакънынъ учьте экиси, эр къозунен берабер – ярым чанакъ шарап олсун. Йылларнынъ айларында эр янъы ай куню бойле бутюнлей якъыладжакъ къурбанлар кетирильсин.

¹⁵ Эр вакъыттаки бутюнлей якъыладжакъ къурбандан ве тёкюледжек бахшыштан гъайры, РАББИге гуналар ичюн къурбан оларакъ бир текени кетиринъиз.

Песах Байрамында кетирильген бахшышлар

¹⁶ Биринджи айда, айнынъ 14-юнджи куню – РАББИнинъ Песахыдыр.

¹⁷ Шу айнынъ 15-инджи куню байрам олсун. Еди кунь маясыз пишкен пите ашанъыз.

¹⁸ Биринджи куню мукъаддес топлашув олсун, ишке янашманъыз.

¹⁹ РАББИ ичюн атеште бутюнлей якъыладжакъ къурбан оларакъ тувардан эки бузав, бир къочкъар ве бир йыллыкъ еди къозуны кетиринъиз. Оларнынъ эписи къусурсыз олмакъ керек.

²⁰ Оларнен берабер ашлыкъ бахшышы оларакъ зейтюн ягъынен къарыштырылгъан энъ яхшы богъдай унуны кетиринъиз: эр бузавнен берабер – учь чанакъ, къочкъарнен берабер – эки чанакъ,

²¹ еди къозудан эр къозунен берабер – бир чанакъ.

²² Гуналар ичюн къурбан оларакъ, сиз ичюн одеме этмеге, бир теке кетиринъиз.

²³ Сабадаки бутюнлей якъыладжакъ къурбандан, эр вакъыттаки бутюнлей якъыладжакъ къурбандан гъайры шу къурбанларны кетиринъиз.

²⁴ Бойледже, еди кунь девамында атеште якъыладжакъ аш кетиринъиз. О, РАББИге хош къокъу олсун. Буны эр вакъыттаки бутюнлей якъыладжакъ къурбандан ве тёкюледжек бахшыштан гъайры япынъыз.

²⁵ Единджи куню мукъаддес топлашувынъыз олсун, ишке янашманъыз.

Биринджи Берекетлер Куню кетирильген бахшышлар

²⁶ Биринджи Берекетлер Куню, Афталар Байрамында РАББИге янъы ашлыкъ бахшышларыны кетиргенинъизде, мукъаддес топлашувынъыз олсун, ишке янашманъыз.

²⁷ РАББИ ичюн хош къокъу оларакъ, бутюнлей якъыладжакъ къурбан оларакъ тувардан эки бузав, бир къочкъар ве бир йыллыкъ еди къозуны кетиринъиз.

²⁸ Оларнен берабер ашлыкъ бахшышы оларакъ зейтюн ягъынен къарыштырылгъан энъ яхшы богъдай унуны кетиринъиз: эр бузавнен берабер – учь чанакъ, къочкъарнен берабер – эки чанакъ,

²⁹ еди къозудан эр къозунен берабер – бир чанакъ.

³⁰ Сиз ичюн одеме этмеге бир текени кетиринъиз.

³¹ Эр вакъыттаки бутюнлей якъыладжакъ къурбандан ве ашлыкъ бахшышындан гъайры, буларны тёкюледжек бахшышнен берабер кетиринъиз. Олар къусурсыз олмакъ керек.