Сайылар 26 - Мукъаддес Китап

Исраильнинъ экинджи кере сайылувы

¹ Ёкъ этилювден сонъ, РАББИ Мусагъа ве руханий Харуннынъ огълу Элазаргъа:

² – Исраиль огъулларынынъ бутюн джемаатыны, йигирми ве йигирми яшындан буюк олгъан акъайларны эсапланъыз. Къоранталарына коре Исраильде дженкке ярагъан эписини сайынъыз, – деди.

³ Муса ве руханий Элазар Моав тегизлигинде, Иорданнынъ янында, Ерихон къаршысында халкъкъа:

⁴ – РАББИ Мусагъа буюргъаны киби, йигирми ве даа буюк яштаки акъайларны сайынъыз, – деди. Мысыр топрагъындан чыкъкъан исраиллилер булардыр:

⁵ Исраильнинъ биринджи догъгъаны Рубен. Рубеннинъ огъуллары: Ханокътан – ханокълыларнынъ сою, Паллудан – паллулыларнынъ сою,

⁶ Хецрондан – хецронлыларнынъ сою, Къармийден – къармийлилернинъ сою.

⁷ Будыр рубенлилернинъ сойлары. Оларнынъ джедвельде язылгъанлары – 43 730 адам.

⁸ Паллунынъ огълу – Элиав.

⁹ Элиавнынъ огъуллары: Немуэл, Датан ве Авирам. Шу Датан ве Авирам джемаатнынъ башлыкълары эдилер. Олар Къорах яндашларынен берабер Мусагъа ве Харунгъа къаршы чыкътылар ве РАББИге къаршы шикяет эттилер.

¹⁰ Ер озь агъзыны ачып, оларны Къорахнен берабер ютты. Атеш 250 адамларны якъкъанда, Къорахнынъ тарафдарлары да ольди. Бойледже, олар башкъалары ичюн алямет олдылар.

¹¹ Къорахнынъ огъуллары исе ольмеди.

¹² Сойларына коре Шимеоннынъ огъуллары: Немуэлден – немуэллилернинъ сою, Яминден – яминлилернинъ сою, Якинден – якинлилернинъ сою,

¹³ Зерахтан – зерахлыларнынъ сою, Шаулдан – шауллыларнынъ сою.

¹⁴ Шимеонлыларнынъ сойлары булардыр – 22 200 адам.

¹⁵ Сойларына коре Гъаднынъ огъуллары: Цефондан – цефонлыларнынъ сою, Хаггийден – хаггийлилернинъ сою, Шунийден – шунийлилернинъ сою,

¹⁶ Ознийден – ознийлилернинъ сою, Эрийден – эрийлилернинъ сою,

¹⁷ Ароддан – ародлыларнынъ сою, Арелийден – арелийлилернинъ сою.

¹⁸ Будыр Гъаднынъ сойлары. Оларнынъ джедвельде язылгъанлары – 40 500 адам.

¹⁹ Ехуданынъ огъуллары – Эр ве Онан. Эр ве Онан Ханаан топрагъында ольдилер.

²⁰ Сойларына коре Ехуданынъ огъуллары: Шеладан – шелалыларнынъ сою, Перецтен – перецлилернинъ сою, Зерахтан – зерахлыларнынъ сою.

²¹ Перецнинъ огъуллары: Хецрондан – хецронлыларнынъ сою, Хамулдан – хамуллыларнынъ сою.

²² Будыр Ехуданынъ сойлары. Оларнынъ джедвельде язылгъанлары – 76 500 адам.

²³ Сойларына коре Йиссакъарнынъ огъуллары: Толадан – толалыларнынъ сою, Пувадан – пувалыларнынъ сою,

²⁴ Яшувдан – яшувлыларнынъ сою, Шимрондан – шимронлыларнынъ сою.

²⁵ Будыр Йиссакъарнынъ сойлары. Оларнынъ джедвельде язылгъанлары – 64 300 адам.

²⁶ Сойларына коре Зевулуннынъ огъуллары: Середден – середлилернинъ сою, Элондан – элонлыларнынъ сою, Яхлеэлден – яхлеэллилернинъ сою.

²⁷ Будыр Зевулуннынъ сойлары. Оларнынъ джедвельде язылгъанлары – 60 500 адам.

²⁸ Сойларына коре Юсуфнынъ огъуллары: Менашше ве Эфраимдир.

²⁹ Менашшенинъ огъуллары: Макирден – макирлилернинъ сою (Макир Гиладнынъ бабасы олды), Гиладдан – гиладлыларнынъ сою.

³⁰ Гиладнынъ огъуллары булардыр: Иэзерден – иэзерлилернинъ сою, Хелектен – хелеклилернинъ сою,

³¹ Асриэлден – асриэллилернинъ сою, Шекемден – шекемлилернинъ сою,

³² Шемидадан – шемидалыларнынъ сою, Хеферден – хеферлилернинъ сою.

³³ Хефернинъ огълу Целофехаднынъ огъуллары олмады, ялынъыз къызлары бар эди. Целофехад къызларынынъ адлары: Махла, Ноа, Хогъла, Милкъа ве Тирца.

³⁴ Будыр Менашшенинъ сойлары. Оларнынъ джедвельде язылгъанлары – 52 700 адам.

³⁵ Сойларына коре Эфраимнинъ огъуллары булардыр: Шутелахтан – шутелахлыларнынъ сою, Бекерден – бекерлилернинъ сою, Тахандан – таханлыларнынъ сою.

³⁶ Шутелахнынъ огъуллары булардыр: Эрандан – эранлыларнынъ сою.

³⁷ Будыр Эфраим огъулларынынъ сойлары. Оларнынъ джедвельде язылгъанлары – 32 500 адам. Будыр сойларына коре Юсуфнынъ огъуллары.

³⁸ Сойларына коре Биньяминнинъ огъуллары булардыр: Беладан – белалыларнынъ сою, Ашбелден – ашбеллилернинъ сою, Ахирамдан – ахирамлыларнынъ сою,

³⁹ Шефуфамдан – шуфамлыларнынъ сою, Хуфамдан – хуфамлыларнынъ сою.

⁴⁰ Беланынъ огъуллары: Ард ве Нааман. Арддан – ардлыларнынъ сою, Наамандан – нааманлыларнынъ сою.

⁴¹ Будыр сойларына коре Биньяминнинъ огъуллары. Оларнынъ джедвельде язылгъанлары – 45 600 адам.

⁴² Сойларына коре Даннынъ огъуллары булардыр: Шухамдан – шухамлыларнынъ сою. Будыр сойларына коре Даннынъ сойлары.

⁴³ Шухамлыларнынъ бутюн сойлары, джедвельде язылгъанлары – 64 400 адам.

⁴⁴ Сойларына коре Ашернинъ огъуллары: Йимнадан – йимналыларнынъ сою, Йишвийден – йишвийлилернинъ сою, Бриадан – бриалыларнынъ сою.

⁴⁵ Брианынъ огъулларындан: Хеверден – хеверлилернинъ сою, Малкиэлден – малкиэллилернинъ сою.

⁴⁶ Ашернинъ Серах адлы бир къызы бар эди.

⁴⁷ Будыр Ашер огъулларынынъ сойлары. Оларнынъ джедвельде язылгъанлары – 53 400 адам.

⁴⁸ Сойларына коре Нафталийнинъ огъуллары: Яхцеэлден – яхцеэллилернинъ сою, Гунийден – гунийлилернинъ сою,

⁴⁹ Ецерден – ецерлилернинъ сою, Шиллемден – шиллемлилернинъ сою.

⁵⁰ Будыр сойларына коре Нафталийнинъ сойлары. Оларнынъ джедвельде язылгъанлары – 45 400 адам.

⁵¹ Сайылгъан Исраиль огъулларынынъ эписи – 601 730 адам.

⁵² РАББИ Мусагъа бойле деди:

⁵³ – Адларынынъ сайысына коре оларгъа пай оларакъ топракъ болюнсин.

⁵⁴ Сайысы чокъча олгъанларгъа буюк пайны, сайысы азджа олгъанларгъа кучюк пайны бер. Эр къабилеге джедвельде язылгъан сайысына коре, адам башына коре пай берильсин.

⁵⁵ Топракъ джерепке коре дагъытылсын. Олар озь къабилесининъ адларына коре пайларыны алсынлар.

⁵⁶ Эм чокъ сайылы, эм аз сайылы къабиленинъ пайлары джерепке коре дагъытылсынлар.

⁵⁷ Сойларына коре сайылгъан левийлилер булардыр: Гершондан – гершонлыларнынъ сою, Кехаттан – кехатлыларнынъ сою, Мерарийден – мерарийлилернинъ сою.

⁵⁸ Будыр левийлилернинъ сойлары: ливнийлилернинъ сою, хевронлыларнынъ сою, махлийлилернинъ сою, мушийлилернинъ сою, къорахлыларнынъ сою. Кехат Амрамнынъ бабасы олды.

⁵⁹ Амрамнынъ апайы Ёкевед эди. О, Левийнинъ къызы эди. Левийнинъ апайы оны Мысырда догъурды. Ёкевед Амрамгъа Харунны, Мусаны ве къызкъардашлары Мерьемни догъурды.

⁶⁰ Харун Надав, Авиху, Элазар ве Итамарнынъ бабасы олды.

⁶¹ Надав ве Авиху ольдилер, чюнки олар РАББИнинъ огюне башкъа бир атешни якътылар.

⁶² Левийлилернинъ джедвельде язылгъанлары – бир айлыкъ ве даа зияде олгъан бутюн эркеклер – 23 000 адам. Олар Исраиль огъулларынен берабер сайылмадылар, чюнки Исраиль огъулларынынъ арасында оларгъа топракъ пайы берильмеген эди.

⁶³ Булардыр Муса ве руханий Элазар сайгъан адамлар. Олар Исраиль огъулларыны Моав тегизлигинде, Иорданнынъ янында, Ерихон къаршысында сайды.

⁶⁴ Бу сайылгъанларнынъ арасында Мусанынъ ве руханий Харуннынъ Синай сахрасында сайылгъан Исраиль огъулларындан кимсе ёкъ эди.

⁶⁵ РАББИ оларгъа мытлакъ сахрада оледжеклерини айткъан эди. Олардан кимсе сагъ къалмагъан эди. Ялынъыз Ефунненинъ огълу Къалев ве Нуннынъ огълу Ехошуа къалдылар.