Сайылар 25 - Мукъаддес Китап

Шиттимде олгъан Исраильнинъ путперестлиги

¹ Исраиллилер Шиттимде яшагъанда, халкъ моавлы къызларнен ороспуланмагъа башладылар.

² Бу къызлар исраиллилерни озь аллаларына къурбан чалмагъа чагъырдылар. Исраиль халкъы къурбан этини ашай ве оларнынъ аллаларына табына башладылар.

³ Исраиль Баал-Пеоргъа табынып башладылар. Бунынъ ичюн РАББИ Исраильге пек гъазапланды.

⁴ РАББИ Мусагъа: – Халкънынъ эписи башлыкъларыны ал да, куньдюз оларны Меним огюмде ас. О вакъыт Исраильге къаршы олгъан РАББИнинъ гъазабы ятышыр, – деди.

⁵ Муса Исраиль къадыларына: – Эр биринъиз озь адамларынъыз арасында Баал-Пеоргъа табынгъанларны ольдюринъиз, – деди.

⁶ О арада Исраиль огъулларындан бир адам кельди ве агъа-къардашларына Мусанынъ ве Исраильнинъ бутюн джемаатынынъ козю огюнде мидьянлы бир къызны кетирди. Олар исе о вакъыт Корюшюв Чадырынынъ киришинде агъламакъта эдилер.

⁷ Руханий Харуннынъ торуны, Элазарнынъ огълу Пинехас буны корьгенде, турды да, джемааттан айырылды ве къолуна бир мызракъ алды.

⁸ Исраиллининъ артындан чадыргъа кирди ве мызрагъыны экисине бирден саплады. Мызракъ эм исраиллини, эм де къызнынъ къарыныны тешип чыкъты. Сонъ Исраиль огъулларынынъ ёкъ этилюви токътады.

⁹ Ёкъ этилювден ольгенлернинъ сайысы 24 000 адам эди.

¹⁰ РАББИ Мусагъа:

¹¹ – Руханий Харуннынъ торуны, Элазарнынъ огълу Пинехас Меним гъазабымны Исраиль огъулларындан къайтарды, оларнынъ арасында о, Меним ичюн гъайрет косьтерди. Шунынъ ичюн Мен куньджюлигимде Исраиль огъулларыны ёкъ этмедим.

¹² Шу себептен онъа айт ки, Мен онъа аманлыкъ васиетимни береджегим.

¹³ Шу васиет онъа ве онынъ эвлятларына эбедий руханийлик васиети оладжакъ. О, Алласы ичюн гъайретни косьтерди ве Исраиль огъуллары ичюн одеме этти, – деди.

¹⁴ Мидьянлы къызнен берабер ольдюрильген исраиллининъ ады Зимрий эди. О, Салунынъ огълу, шимеонлыларнынъ къоранта башлыгъы эди.

¹⁵ Ольдюрильген мидьянлы къызнынъ ады исе – Козбий. О, Цурнынъ къызы, Цур исе халкъларнынъ башы, мидьянлы сой башлыгъы эди.

¹⁶ РАББИ Мусагъа:

¹⁷ – Мидьянлыларгъа уджюм этинъиз ве оларны ёкъ этинъиз.

¹⁸ Олар озь айнеджиликлеринен сизге къаршы душманджа арекет эттилер, Пеорнен ве озь къызкъардашынен, мидьянлы башлыкънынъ къызы Козбийнен сизлерни алдаттылар. Лякин Пеор ичюн ёкъ этилюв кунюнде бу къыз ольдюрильди, – деди.