Сайылар 23 - Мукъаддес Китап

¹ – Мында манъа еди къурбан ери къур ве еди бузавнен еди къочкъар азырла, – деди Белам Балакъкъа.

² Балакъ Белам айткъаны киби япты. Балакънен Белам эр къурбан ерининъ устюнде бирер бузавнен къочкъар къурбан оларакъ якътылар.

³ Сонъ Белам Балакъкъа: – Бутюнлей якъыладжакъ къурбанынънынъ янында бекле. Мен барайым, бельки РАББИ къаршыма чыкъар. О, манъа ачаджагъыны санъа бильдереджегим, – деди ве юксек бир ерге чыкъты.

⁴ Алла Беламгъа корюнди. Белам Онъа: – Еди къурбан ерини къурдым, эр къурбан ерининъ устюнде бирер бузавнен къочкъар къурбан оларакъ якътым, – деди.

⁵ РАББИ Беламгъа не айтаджагъыны бильдирип: «Балакъкъа къайтып, буны айт», – деди.

⁶ Белам къайтты. Иште, Балакъ бутюнлей якъыладжакъ къурбан янында турмакъта, ве Моав башлыкъларынынъ эписи онынъ янындадыр.

⁷ Белам бойле кинаели икяени айтып берди: – Моав падишасы Балакъ мени Арам топрагъындан, шаркъ дагъларындан алып кетирди. «Кель, меним ичюн Якъупны къаргъа! Кель, Исраильге яманлыкъ тиле», – деди.

⁸ Эгер Алла оларны къаргъамаса, мен оларны насыл къаргъайым? Эгер РАББИ оларгъа яманлыкъ тилемесе, мен насыл этип тилейим?

⁹ Мен оларны къаяларнынъ тёпесинден корем, оларгъа байырлардан бакъам. Иште, олар айры яшайлар, башкъа миллетлер киби дегиллер.

¹⁰ Ким Якъупнынъ тозуны, Исраильнинъ дёртте бирини сайып олур? Инсафлы адамнынъ олюминен олейим, сонъум оларнынъки киби олсун!

¹¹ Балакъ Беламгъа: – Манъа япкъанынъ недир? Мен сени душманларымны къаргъамакъ ичюн кетирдим, сен исе оларгъа яхшылыкъ тилейсинъ! – деди.

¹² – Аджеба мен РАББИнинъ манъа берген сёзлерини айтмагъа борджлу дегилимми? – деди Белам.

Беламнынъ экинджи пейгъамберлиги

¹³ Сонъ Балакъ онъа бойле деди: – Юр меннен башкъа бир ерге. Андан сен бу халкънынъ эписини дегиль де, бир къысмыны корерсинъ. Оларны мен ичюн шу ерден къаргъа.

¹⁴ Балакъ Беламны Цофим яйласына, Фисга дагъынынъ тёпесине алып барды. Анда еди къурбан ерини къурды, эр къурбан ерининъ устюнде бирер бузав ве бирер къочкъар бутюнлей якъыладжакъ къурбан оларакъ кетирди.

¹⁵ Белам Балакъкъа: – Мында, бутюнлей якъыладжакъ къурбаннынъ янында бекле, мен Алланынъ къаршысына барайым, – деди.

¹⁶ РАББИ Беламнен корюшти ве не айтаджагъыны бильдирди: «Балакъкъа къайтып, буны айт».

¹⁷ Белам къайтты. Иште, Балакъ бутюнлей якъыладжакъ къурбан янында турмакъта, ве Моав башлыкълары онынъ янындадыр. Балакъ онъа: – РАББИ не айтты? – деди.

¹⁸ Белам бойле кинаели икяени айтып берди: – Эй, Балакъ, тур ве динъле! Циппорнынъ огълу, манъа къулакъ ас!

¹⁹ Алла адам дегиль, О, ялан сёйлемез. Алла инсан огълу дегиль. О, тюшюнджесини денъиштирмез. Айтып да, япмазмы? Сёз берип де, ерине кетирмезми?

²⁰ Мен яхшылыкъ тилемеге башладым, чюнки О, яхшылыкъ тиледи. Буны денъиштирип оламам.

²¹ Якъупта беля корюнмей, Исраильде къаза тапылмай. РАББИ, оларнынъ Алласы – оларнынъ янындадыр, олар Оны озь Падишалары деп илян этип, Онъа боразанларда чалалар.

²² Алла оларны Мысырдан чыкъарды, О олар ичюн кийик бугъанынъ бойнузлары киби.

²³ Якъупкъа къаршы къаргъыш ёкътыр, Исраильге къаршы ырымджылыкъ ёкътыр. Бир заманда Якъуп ве Исраиль акъкъында: «Алла нелер япты!» – дениледжек.

²⁴ Иште, бу халкъ, бир ыргъачы арслан киби, тура, арслан киби, котериле. Гъаниметни ашап битирмегендже, ольдюрильгенлерининъ къаныны ичмегендже ятмаз.

²⁵ О вакъыт Балакъ Беламгъа: – Не оларны къаргъа, не де оларгъа яхшылыкъ тиле, – деди.

²⁶ Белам джевап берип: – РАББИ не десе, оны япаджагъымны айтмадыммы санъа? – деди Балакъкъа.

Беламнынъ учюнджи пейгъамберлиги

²⁷ – Юр, мен сени башкъа бир ерге алып барайым. Бельки, Аллагъа хош келир, андан меним ичюн оларны къаргъарсынъ, – деди Балакъ Беламгъа.

²⁸ Бойледже, Балакъ Беламны сахрагъа бакъкъан Пеор дагъынынъ тёпесине алып барды.

²⁹ – Мында манъа еди къурбан ери къур ве манъа еди бузавнен еди къочкъар азырла, – деди Белам Балакъкъа.

³⁰ Балакъ Беламнынъ айткъаныны япты ве эр къурбан еринде бирер бузав ве бирер къочкъарны бутюнлей якъыладжакъ къурбан оларакъ якъты.