Сайылар 21 - Мукъаддес Китап

Ханаанлыларнынъ енъильмеси

¹ Исраиль Атарим ёлунен барды. Негев еринде яшагъан, ханаанлы олгъан Арад падишасы шуны эшиткенде, оларнен дженклешти ве базыларыны эсирге алды.

² Исраиль РАББИге шу адакъны берди: «Эгер Сен бу халкъны бизим къолумызгъа берсенъ, оларнынъ эписи шеэрлерини Санъа багъышлап, бутюнлей ёкъ этеджекмиз».

³ РАББИ Исраильнинъ сесини эшитти ве ханаанлыларны къолуна берди. Исраиллилер оларны да, шеэрлерини де бутюнлей ёкъ эттилер. Бу ернинъ адыны Хорма деп къойдылар.

Бакъыр йылан

⁴ Сонъ исраиллилер Хор дагълыгъындан ёлгъа чыкътылар. Эдом топрагъынынъ четинден кечмек ичюн, олар Къызыл денъиз ёлунен бардылар. Лякин ёлда халкъ сабырсызланды.

⁵ Халкъ Аллагъа ве Мусагъа къаршы айтып башладылар: – Бизни Мысырдан не ичюн чыкъардынъыз? Бизге сахрада ольмек ичюнми? Мында не отьмек бар, не сув. Бу бир шейге кечмеген аштан да джанымыз безди.

⁶ О вакъыт РАББИ халкъкъа къаршы зеэрли йыланларны ёллады. Олар халкъны тишлемеге башладылар, ве Исраиль огъулларындан пек чокъу ольди.

⁷ Халкъ Мусагъа келип: – Бизлер РАББИге ве санъа къаршы айткъанымыз ичюн гуна къазандыкъ. РАББИге дува эт, О бизден йыланларны алсын, – деди. Муса халкъ ичюн дува этти.

⁸ Сонъ РАББИ Мусагъа: – Озюнъе йылан яп ве оны бир байракъ дирегине къой. Тишленген эр кес онъа бакъып, сагъ къалыр, – деди.

⁹ Муса бакъыр йыланны япты ве байракъ дирегининъ устюне къойды. Эгер йылан адамны тишлеген олса, о адам йылангъа бакъып, сагъ къала эди.

Сахра бою долашув

¹⁰ Исраиль огъуллары ёлгъа чыкъып, ордуларыны Овотта ерлештирдилер.

¹¹ Овоттан ёлгъа чыкъып, ордуларыны Ийе-Аваримде, Моавнынъ къаршысындаки сахрада, кунь догъгъан тарафта ерлештирдилер.

¹² Андан чыкъып, ордуларыны Зеред вадийинде ерлештирдилер.

¹³ Андан чыкъып, ордуларыны Арноннынъ башкъа тарафында сахрада ерлештирдилер. Анда шу озен аморлыларнынъ топрагъындан тыш акъа. Арнон озени – Моавнынъ кенарыдыр, озен Моав ве аморлылар арасында акъа.

¹⁴ Онынъ ичюн РАББИнинъ дженклери китабында бойле язылгъандыр:

¹⁵ «Шевет-Ар шеэрине баргъан ве Моав сынъырына узангъан вадийлер башлары».

¹⁶ Мындан Беэр къуюсына ёл алдылар. Бу къуюнынъ янында РАББИ Мусагъа: «Халкъны бир ерге топла, оларгъа сув береджегим», – деди.

¹⁷ О вакъыт Исраиль шу тюркюни йырлады: «Эй, къую, толып-таш! Онъа йыр йырланъыз!

¹⁸ Башлыкълар бу къуюны къазды, халкънынъ мырзалары оны озь акимиет таякъларынен къаздылар». Сахрадан олар Маттанагъа,

¹⁹ Маттанадан – Нахалиэлге, Нахалиэлден – Бамоткъа,

²⁰ Бамоттан – вадийге бардылар. Шу вадий Моав топрагъында, сахранынъ къаршысында олгъан Фисга дагъынынъ тёпесинде ерлешкендир.

Сихоннынъ ве Огнынъ енъильмеси

²¹ Исраиль аморлыларнынъ падишасына Сихонгъа эльчилернен бу хаберни ёллады:

²² – Топрагъынъдан кечмеге разылыкъ бер. Тарлаларгъа ве юзюмликлерге кирмейджекмиз, ич бир къуюдан сув ичмейджекмиз. Сенинъ топрагъынъдан кечмегендже, Падиша ёлундан кетеджекмиз.

²³ Лякин Сихон исраиллилерге озь топрагъындан кечмеге разылыкъ бермеди. О, бутюн халкъыны топлады ве Исраильге къаршы сахрагъа кетти. Яхацкъа кельген сонъ, о, исраиллилернен дженк этти.

²⁴ Исраиллилер оны къылычларынен урып енъдилер ве Арнон озенинден Яббокъ озенине къадар, аммонлыларнынъ топрагъына къадар узангъан топракъларыны басып алдылар. Аммонлыларнынъ сынъырлары къавий эди.

²⁵ Исраиллилер эписи андаки шеэрлерни запт этти. Сонъ олар аморлыларнынъ эписи шеэрлеринде, Хешбон шеэринде ве этрафындаки койлерде яшамагъа башлады.

²⁶ Хешбон аморлы Сихон падишанынъ шеэри эди. Сихон эвельки Моав падишасына къаршы дженк эткен ве элинден Арнонгъа къадар узангъан топракъларыны алгъан эди.

²⁷ Бунынъ ичюн кедайлар бойле айталар: «Хешбонгъа келинъиз, Сихоннынъ шеэри янъыдан къурулсын ве пекитильсин.

²⁸ Хешбондан атеш, Сихоннынъ шеэринден алев чыкъты ве Моавнынъ Ар шеэрини, Арнон тёпеликлерининъ саиплерини якъып ёкъ этти.

²⁹ Вай санъа, эй, Моав! Кемошнынъ халкъы, сен ёкъ олдынъ! Огъуллары тараф-тараф къачтылар, къызлары аморлыларнынъ падишасы Сихоннынъ эсирлери олды.

³⁰ Биз исе оларны окънен урдыкъ, Хешбон Дивонгъа къадар ёкъ олды. Медевагъа узангъан Нофахгъадже оларны дарма-дагъын этип бошаттыкъ».

³¹ Бойледже, Исраиль аморлыларнынъ топрагъында яшап башлады.

³² Муса Язерни бакъып чыкъмакъ ичюн адамларны ёллады. Исраиллилер Язернинъ этрафындаки койлерни запт эттилер ве анда яшагъан аморлыларны къувдылар.

³³ Сонъ айланып, Башан ёлунен кеттилер. Башан падишасы Ог бутюн халкъынен берабер оларгъа къаршы Эдрейде дженк этмек ичюн чыкъты.

³⁴ РАББИ Мусагъа: – Ондан къоркъма! Оны да, бутюн халкъыны да, бутюн топрагъыны да сенинъ къолунъа энди бердим. Хешбонда яшагъан аморлыларнынъ падишасы Сихонгъа япкъанларынъны онъа да япаджакъсынъ, – деди.

³⁵ Бойледже, исраиллилер Огны, онынъ огъулларыны ве бутюн халкъыны ёкъ этти, кимсени сагъ къалдырмады, топрагъыны да басып алдылар.