Сайылар 2 - Мукъаддес Китап

Орду ичинде къабилелернинъ ерлешюви

¹ РАББИ Мусагъа ве Харунгъа бойле деди:

² – Исраиль огъуллары айры-айры озь ордуларыны озь байрагъы тюбюнде ве озь къоранталарынынъ бельгилеринен къойсунлар, озь ордуларыны Корюшюв Чадырынынъ этрафында ерлештирсинлер.

³ Кунь догъгъан тарафта, шаркъта озь байрагъы тюбюнде Ехуда ордусы озь болюклеринен ерлешсин. Амминадавнынъ огълу Нахшон ехудалыларнынъ башлыгъы олсун.

⁴ Онынъ аскерлери – 74 600 сайылгъан акъай.

⁵ Ондан сонъ Йиссакъар къабилеси озь ордусыны ерлештирсин. Цуарнынъ огълу Нетанэл йиссакъарлыларнынъ башлыгъы олсун.

⁶ Онынъ аскерлери – 54 400 сайылгъан акъай.

⁷ Сонъ Зевулун къабилеси озь ордусыны ерлештирсин. Хелоннынъ огълу Элиав зевулунлыларнынъ башлыгъы олсун.

⁸ Онынъ аскерлери – 57 400 сайылгъан акъай.

⁹ Ехуда ордусынен сайылгъан аскерлер, болюклерине коре, эписи олып, 186 400 адам. Олар ёлгъа биринджи чыкъаджакълар.

¹⁰ Дженюпке тараф озь байрагъы тюбюнде Рубен ордусы озь болюклеринен ерлешсин. Шедеурнынъ огълу Элицур рубенлилернинъ башлыгъы олсун.

¹¹ Онынъ аскерлери – 46 500 сайылгъан акъай.

¹² Онынъ янына Шимеон къабилеси озь ордусыны ерлештирсин. Цуришаддайнынъ огълу Шелумиэл шимеонлыларнынъ башлыгъы олсун.

¹³ Онынъ аскерлери – 59 300 сайылгъан акъай.

¹⁴ Сонъ Гъаднынъ къабилеси озь ордусыны ерлештирсин. Деуэлнинъ огълу Эльясаф гъадлыларнынъ башлыгъы олсун.

¹⁵ Онынъ аскерлери – 45 650 сайылгъан акъай.

¹⁶ Рубен ордусынен сайылгъан аскерлер, болюклерине коре, эписи олып, 151 450 адам. Олар ёлгъа экинджи чыкъаджакълар.

¹⁷ Корюшюв Чадыры ёлгъа чыкъкъанда, левийлилернинъ ордусы башкъа ордуларнынъ ортасында олсун. Эр орду, тургъаны киби, озь байрагъы тюбюнде ёлгъа чыкъсын.

¹⁸ Гъарпкъа тараф озь байрагъы тюбюнде Эфраим ордусы озь болюклеринен ерлешсин. Аммихуднынъ огълу Элишама эфраимлилернинъ башлыгъы олсун.

¹⁹ Онынъ аскерлери – 40 500 сайылгъан акъай.

²⁰ Онынъ янына Менашшенинъ къабилеси озь ордусыны ерлештирсин. Педацурнынъ огълу Гъамалиэл менашшелилернинъ башлыгъы олсун.

²¹ Онынъ аскерлери – 32 200 сайылгъан акъай.

²² Сонъ Биньяминнинъ къабилеси озь ордусыны ерлештирсин. Гидонийнинъ огълу Авидан биньяминлилернинъ башлыгъы олсун.

²³ Онынъ аскерлери – 35 400 сайылгъан акъай.

²⁴ Эфраим ордусынен сайылгъан аскерлер, болюклерине коре, эписи олып, 108 100 адам. Олар ёлгъа учюнджи чыкъсынлар.

²⁵ Шимальге тараф озь байрагъы тюбюнде Дан ордусы озь болюклеринен ерлешсин. Аммишаддайнынъ огълу Ахиэзер данлыларнынъ башлыгъы олсун.

²⁶ Онынъ аскерлери – 62 700 сайылгъан акъай.

²⁷ Онынъ янына Ашернинъ къабилеси озь ордусыны ерлештирсин. Окъраннынъ огълу Пагиэл ашерлилернинъ башлыгъы олсун.

²⁸ Онынъ аскерлери – 41 500 сайылгъан акъай.

²⁹ Сонъ Нафталийнинъ къабилеси озь ордусыны ерлештирсин. Энаннынъ огълу Ахира нафталийлилернинъ башлыгъы олсун.

³⁰ Онынъ аскерлери – 53 400 сайылгъан акъай.

³¹ Дан ордусынен сайылгъан аскерлер, болюклерине коре, эписи олып, 157 600 адам. Олар озь байракълары тюбюнде ёлгъа сонъки чыкъсынлар.

³² Къоранталарына коре сайылгъан Исраиль огъуллары булардыр. Ордуларда сайылгъан аскерлер, болюклерине коре, эписи олып, 603 550 адам.

³³ Левийлилерни исе, РАББИ Мусагъа буюргъаны киби, башкъа исраиллилернен берабер саймадылар.

³⁴ Исраиллилер РАББИ Мусагъа эр буюргъан шейни беджердилер. Олар озь байракълары тюбюнде ордуларыны ерлештире эдилер ве эр кес, озь сойларынен ве къоранталарынен бирликте ёлгъа чыкъа эдилер.