Сайылар 17 - Мукъаддес Китап

Харуннынъ чечеклеген таягъы

¹ РАББИ Мусагъа бойле деди:

² – Исраиль огъулларына айт, олар эр бир къабиледен бирер таякъ берсинлер, эр бир къабиле башы озь къабилеси ичюн эписи олып он эки таякъ кетирсин. Таякъларнынъ устюнде эр башлыкъларнынъ адларыны яз.

³ Левийнинъ таягъы устюне Харуннынъ адыны яз. Эр къабиле башы ичюн бир таякъ олсун.

⁴ Таякъларны Корюшюв Чадырында, Шаатлыкъ огюне къой. Анда Мен сизнен корюшеджегим.

⁵ Мен сайлайджакъ адамнынъ таягъы гуль ачаджакъ. Бойле этип, Мен Исраиль огъулларынынъ сизге бильдирген шикяетлерини токътатырым.

⁶ Муса РАББИнинъ сёзлерини Исраиль огъулларына бильдирди. Халкънынъ эписи башлыкълары, эр къабиле башы ичюн бирер дане таякъ, он эки таякъны кетирдилер. Таякълар арасында Харуннынъ таягъы да эди.

⁷ Муса таякъларны Корюшюв Чадырына РАББИнинъ огюне къойды.

⁸ Эртеси куню Муса Шаатлыкъ Чадырына кирди ве, иште, Левий къабилесинден олгъан Харуннынъ таягъы филис атты. Филис аткъан сонъ, чечек ачты, ве бадем пишти.

⁹ Муса бутюн таякъларны РАББИнинъ огюнден чыкъарып, эписи Исраиль огъулларына косьтерди. Олар таякъларгъа бакъты, эр бири озь таягъыны алды.

¹⁰ РАББИ Мусагъа: – Харуннынъ таягъыны кене Шаатлыкъ огюне къой. О, сакълансын ве Манъа къаршы чыкъкъанларгъа бельги олсун. Сонъ олар Манъа къаршы шикяет этмейджек ве шунынъ ичюн ольмейджеклер, – деди.

¹¹ Муса буны япты. РАББИ онъа буюргъаны киби, Муса ойле де япты.

¹² Исраиль огъуллары Мусагъа: – Оледжекмиз! Ёкъ оладжакъмыз! Эпимиз ёкъ оладжакъмыз!

¹³ РАББИнинъ Мескенине эр бир якъынлашкъан оле! Эпимиз оледжекмизми?! – дедилер.