Сайылар 15 - Мукъаддес Китап

Къурбанлар акъкъында къанунлар

¹ РАББИ Мусагъа бойле деди:

² – Исраиль халкъына бойле айт: Яшамакъ ичюн Мен сизге берген мемлекетке кирген сонъ,

³ туварларны я да къой-эчкилерни къурбан чалынъыз, къурбанларны – бутюнлей якъыладжакъ къурбан, адакъ къурбаны, озь истегинен берильген къурбан, я да байрам къурбаны – атеште якъып, РАББИге багъышланъыз ве РАББИ ичюн гузель къокъу чыкъарынъыз.

⁴ Озь къурбаныны кетирген адам РАББИге ашлыкъ бахшышы оларакъ ярым чанакъ зейтюн ягъынен къарыштырылгъан бир чанакъ энъ яхшы унны кетирсин.

⁵ Бутюнлей якъыладжакъ къурбанны я да башкъа бир къурбанны кетиргенинен, бундан гъайры даа тёкюледжек бахшыш оларакъ эр къозунен берабер ярым чанакъ шарап кетир.

⁶ Бир къочкъарны кетиргенде, ашлыкъ бахшышы оларакъ чанакънынъ учьте экиси зейтюн ягъынен къарыштырылгъан эки чанакъ энъ яхшы богъдай унуны кетир.

⁷ Тёкюледжек бахшыш оларакъ чанакънынъ учьте экиси шарапны кетир. О, РАББИге гузель къокъу олсун.

⁸ Бутюнлей якъыладжакъ къурбан, адакъ къурбаны я да аманлыкъ къурбаны оларакъ бир бузавны РАББИге кетиргенде,

⁹ бузавнен берабер ашлыкъ бахшышы оларакъ бир чанакъ зейтюн ягъынен къарыштырылгъан учь чанакъ энъ яхшы богъдай унны кетир.

¹⁰ Тёкюледжек бахшыш оларакъ бир чанакъ шарапны кетир. О, РАББИге гузель къокъу олсун.

¹¹ Эр бир бугъаны, къочкъарны, къозу я да улакъны кетиргенде, бойле япынъыз.

¹² Къач айван къурбан оларакъ кетирсенъиз, эр бири ичюн айны шейлерни япынъыз.

¹³ Бу шейлерни эр бир исраилли япсын, атеште къурбанларны якъып, РАББИге гузель къокъу чыкъарсын.

¹⁴ Аранъызда ерлешкен кельмешек я да келеджек несиллеринъизде сизлерде яшамакъ ичюн кельген эр бир адам РАББИге гузель къокъу чыкъармакъ ичюн, атеште якъыладжакъ къурбанны кетирмеге истесе, эр бир шейни сиз киби япсын.

¹⁵ Джемаат! Сизлерге ве аранъызда яшагъан кельмешекке бир низамнаме олсун. Бу низамнаме сизинъ несиллеринъизге эбедий олсун. Эм сизлер, эм кельмешеклер РАББИнинъ огюнде олунъыз.

¹⁶ Сизлер ве аранъызда яшагъан кельмешеклер ичюн бир къанун ве бир къарар олсун.

¹⁷ РАББИ Мусагъа бойле деди:

¹⁸ – Исраиль огъулларына бойле айт: Сизни кирсетеджек мемлекетке кирген сонъ,

¹⁹ о топракънынъ отьмегини ашагъанынъызда, РАББИге котериледжек бахшыш кетиринъиз.

²⁰ Котериледжек бахшыш оларакъ биринджи хамырынъыздан япылгъан питени кетиринъиз. Оны арман бахшышы киби кетиринъиз.

²¹ Бутюн несиллеринъиз биринджи хамырынъыздан РАББИге котериледжек бахшыш берсинлер.

²² Эгер сиз янълышып, РАББИ Мусагъа айткъан бутюн эмирлерини беджермесенъиз,

²³ РАББИ сизге Мусанен эр бир буюргъаныны, РАББИ сизге ве келеджек несиллеринъизге эмир этеджеклерини ерине кетирмесенъиз,

²⁴ бу аселет япылмаса ве джемаат бунынъ акъкъында бильмеген олса, бутюн джемаат бутюнлей якъыладжакъ къурбан оларакъ бир бузавны кетирсин ве РАББИге гузель къокъу чыкъарсын. Къараргъа коре ашлыкъ бахшышы ве тёкюледжек бахшышны къошсун. Сонъ бир улакъны гуналар ичюн къурбан оларакъ кетирсинлер.

²⁵ Руханий бутюн Исраиль огъулларынынъ джемааты ичюн одеме этсин, ве халкъ багъышланаджакъ. Бу – янълыш эди ве бу янълыш ичюн олар РАББИге атеште якъыладжакъ бахшышларны ве гуналары ичюн къурбанны кетирдилер.

²⁶ Бутюн Исраиль огъулларынынъ джемааты да, арасында яшагъан кельмешеклер де багъышланаджакълар, чюнки бутюн халкъ буны янъылып япты.

²⁷ Эгер бирде-бир адам бильмеден гуна япса, гуналар ичюн къурбан оларакъ бир йыллыкъ эчкини алып кетирсин.

²⁸ Сонъ янъылып гуна япкъан адамнынъ гунасы ичюн руханий РАББИнинъ огюнде одеме этсин. Одеме этильген сонъ, шу адам багъышланаджакъ.

²⁹ Янъылып гуна япкъан адам ичюн – эм исраилли, эм аранъызда яшагъан кельмешек ичюн – бир къанун олсун.

³⁰ Исраиллилерден я да кельмешеклерден бири билип-турып гуна япса, РАББИге сайгъысызлыкъ бильдире. О джан халкъ арасындан ёкъ этильсин.

³¹ О, РАББИнинъ сёзюни урьмет этмеди ве Онынъ эмирини бозды. О джан мытлакъа ёкъ этильсин, къабааты онынъ устюнде къалсын.

Раатлыкъ кунюни бозгъан адам акъкъында

³² Исраиль огъуллары сахрада олгъанда, раатлыкъ куню одун джыйгъан адамны таптылар.

³³ Одун джыйгъанны туткъан адамлар оны Муса, Харун ве бутюн джемаат огюне кетирдилер.

³⁴ Адамгъа не япыладжагъы белли олмагъанда, оны къаравулларнынъ незарети алтында къалдырдылар.

³⁵ РАББИ Мусагъа: – Шу адам ольмек керек. Ордудан тыш бутюн джемаат оны ташнен урып ольдюрсин, – деди.

³⁶ Бутюн джемаат адамны ордудан тыш чыкъарып, РАББИ Мусагъа насыл эмир эткени киби, оны ташнен урып ольдюрдилер.

Пускюллер акъкъында къаиделер

³⁷ РАББИ Мусагъа бойле деди:

³⁸ – Исраиль огъулларына бойле айт: Бутюн несиллеринъиз урбаларынъызнынъ кенарына пускюллер тикинъиз. Эр пускюльнинъ ичине мор юньден япылгъан йипни кирсетинъиз.

³⁹ Сизде пускюллер олгъанда, пускюллерге бакъкъан вакъытта сиз РАББИнинъ эписи эмирлерини акълынъызгъа кетиреджексинъиз ве оларны беджереджексинъиз. Сонъ сизни садыкълыкъ ёлундан ургъан юреклеринъизнинъ ве козьлеринъизнинъ артындан бармайджакъсынъыз,

⁴⁰ амма бутюн эмирлеримни акълынъызда тутаджакъсынъыз, оларны беджереджексинъиз ве Алланъызнынъ огюнде азиз оладжакъсынъыз.

⁴¹ Мен – РАББИм, сизинъ Алланъыз. Сизинъ Алланъыз олмакъ ичюн, Мен сизлерни Мысыр топрагъындан чыкъардым! Мен – РАББИм, сизинъ Алланъыз!