Сайылар 1 - Мукъаддес Китап

Исраильнинъ биринджи сайылувы

¹ Исраиллилер Мысыр топрагъындан чыкъкъан сонъ, экинджи йылында, экинджи айнынъ биринджи кунюнде РАББИ Синай сахрасында, Корюшюв Чадырында Мусагъа бойле деди:

² – Исраиль огъулларынынъ бутюн джемаатыны, сойларындаки ве къоранталарындаки эр бир эркекни сайынъыз ве оларнынъ адларыны язынъыз.

³ Дженкке ярагъан, йигирми яшында ве йигирми яшындан буюк олгъан эписи исраиллилерни ордуларына коре Харуннен берабер сай.

⁴ Сизинъ янынъызда эр бир къабиледен бирер къоранта башлыгъы олмакъ керек.

⁵ Янынъызда оладжакъ адамларнынъ адлары будыр: Рубен къабилесинден – Шедеурнынъ огълу Элицур,

⁶ Шимеон къабилесинден – Цуришаддайнынъ огълу Шелумиэл,

⁷ Ехуда къабилесинден – Амминадавнынъ огълу Нахшон,

⁸ Йиссакъар къабилесинден – Цуарнынъ огълу Нетанэл,

⁹ Зевулун къабилесинден – Хелоннынъ огълу Элиав,

¹⁰ Юсуф огъулларындан: Эфраим къабилесинден – Аммихуднынъ огълу Элишама, Менашше къабилесинден – Педацурнынъ огълу Гъамалиэл,

¹¹ Биньямин къабилесинден – Гидонийнинъ огълу Авидан,

¹² Дан къабилесинден – Аммишаддайнынъ огълу Ахиэзер,

¹³ Ашер къабилесинден – Окъраннынъ огълу Пагиэл,

¹⁴ Гъад къабилесинден – Деуэлнинъ огълу Эльясаф,

¹⁵ Нафталий къабилесинден – Энаннынъ огълу Ахира.

¹⁶ Булар – джемаатнынъ сайлангъан акъайларыдыр, деделер къабилелерининъ башлыкълары, Исраильнинъ бинъбашыларыдыр.

¹⁷ Муса ве Харун, адлары юкъарыда бильдирильген акъайларнен берабер

^18-19 экинджи айнынъ биринджи кунюнде бутюн джемаатны топладылар ве, РАББИ Мусагъа буюргъаны киби, бутюн джемаатны деделернинъ несиллерине, сойларына ве къоранталарына коре, эписи йигирми ве йигирми яшындан буюк олгъанларны, бирер-бирер оларнынъ адларыны джедвельге яздылар. Бойледже, олар Синай сахрасында сайылды.

²⁰ Исраильнинъ биринджи огълу Рубеннинъ огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

²¹ Рубен къабилесинде 46 500 адам сайылды.

²² Шимеон огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

²³ Шимеон къабилесинде 59 300 адам сайылды.

²⁴ Гъад огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

²⁵ Гъад къабилесинде 45 650 адам сайылды.

²⁶ Ехуда огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

²⁷ Ехуда къабилесинде 74 600 адам сайылды.

²⁸ Йиссакъар огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

²⁹ Йиссакъар къабилесинде 54 400 адам сайылды.

³⁰ Зевулун огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

³¹ Зевулун къабилесинде 57 400 адам сайылды.

³² Юсуфнынъ огъуллары, Эфраим огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

³³ Эфраим къабилесинде 40 500 адам сайылды.

³⁴ Менашше огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

³⁵ Менашше къабилесинде 32 200 адам сайылды.

³⁶ Биньямин огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

³⁷ Биньямин къабилесинде 35 400 адам сайылды.

³⁸ Дан огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

³⁹ Дан къабилесинде 62 700 адам сайылды.

⁴⁰ Ашер огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

⁴¹ Ашер къабилесинде 41 500 сайылды.

⁴² Нафталий огъуллары – несиллерине, сойларына ве къоранталарына коре, бирер-бирер язылгъан адамларнынъ адларына коре, йигирми ве йигирми яшындан буюк олгъанлар, дженкке ярагъан акъайларнынъ эписи, –

⁴³ Нафталий къабилесинде 53 400 адам сайылды.

⁴⁴ Мусанен Харун ве Исраильнинъ он эки башлыкълары – эр бир къабиледен бирер адам – буларны сайдылар.

⁴⁵ Къоранталарына коре эписи исраиллилер, йигирми ве йигирми яшындан буюк олгъанлар ве дженкке ярагъанлар сайылды.

⁴⁶ Эписи сайылгъанлар 603 550 адам эди.

⁴⁷ Лякин сайылувда деделерининъ къоранталарына коре левийлилер сайылмадылар,

⁴⁸ чюнки РАББИ Мусагъа бойле деди:

⁴⁹ – Ялынъыз Левий къабилесини сайма. Исраиль огъулларыны сайгъанда, оларны сайма.

⁵⁰ Левийлилер Шаатлыкъ Мескени, онынъ эписи алетлери ве шейлери ичюн джевапкяр оладжакълар. Олар Мескенни ве онынъ эписи алетлерини ташысынлар, онда хызмет этсинлер ве ордуларыны Мескеннинъ этрафында ерлештирсинлер.

⁵¹ Чадырны башкъа ерге кочюрмеге керек олгъанда, левийлилер оны дагъытсынлар, чадырны тиклемеге керек олгъанда, левийлилер оны тиклесинлер. Эгер янына башкъа бир адам якъынлашса, о ольдюрильсин.

⁵² Исраиль огъуллары озь ордуларына коре озь ордуларында ерлешсинлер, озь байрагъы тюбюнде турсунлар.

⁵³ Исраиль огъулларына къаршы гъазап олмасын деп, левийлилер озь ордусыны Шаатлыкъ Мескенининъ этрафында ерлештирсинлер ве Шаатлыкъ Мескенини къаравулласынлар.

⁵⁴ Исраиль огъуллары шуны яптылар. РАББИ Мусагъа буюргъаны киби, олар эписини яптылар.