Римлилерге 7 - Мукъаддес Китап

Эндиден сонъ Къануннынъ къуллары дегильмиз

¹ Къанунны бильгенлерге айтам: дин къардашлар, Къанун тек тири адамларнынъ яшайышында падишалыкъ эткенини бильмейсизми?

² Къанунгъа коре, эвли къадын тири акъайына багълы. Амма акъайы ольсе, къадын оны акъайына багълагъан къанундан къуртула.

³ Шунынъ ичюн, акъайы тири олгъан къадын башкъа акъайнен ятса, ороспу сайыла. Амма акъайы ольсе, къадын къанундан къуртула. Башкъа акъайнен ятса да, ороспу сайылмай.

⁴ Агъа-къардашларым, сизлер де бойле, Месихнинъ олюми ичюн Къануннынъ огюнде олю олдынъыз ве Алланынъ файдасына берекет бермек ичюн, олюмден тирильген Месихке къошулдынъыз.

⁵ Бедений истеклерине коре яшагъанымызда, Къанунгъа коре гуналы истеклер беденлеримизнинъ мучелеринде арекет эте эдилер, ве олар кетирген берекет олюм эди.

⁶ Энди исе, бизни багълап тургъан Къануннынъ огюнде олип, ондан къуртулдыкъ ве эвельки киби Къанун арифине дегиль, Рухнынъ ярдымынен янъы ёлунда Аллагъа хызмет этмеге имкян алдыкъ.

Къанун ве гуна

⁷ Шунынъ ичюн не айтайыкъ? Къанун – гунадырмы? Асыл ёкъ! Амма Къанун олмаса эди, мен гуна не олгъаныны бильмез эдим. Къанун «истеме», деп буюрмаса, мен «истек» не олгъаныны бильмез эдим.

⁸ Эмирнинъ ярдымынен гуна фырсат тапып, меним юрегимде эр тюрлю истекни уятты. Къанун олмагъанда исе, гуна олюдир.

⁹ Бир вакъытлары мен Къанунны бильмейип яшай эдим, амма эмир пейда олгъан сонъ, гуна тири олды,

¹⁰ мен исе ольдим, ве омюр кетиреджек олгъан эмир олюмни кетирди.

¹¹ Эмирнинъ ярдымынен гуна фырсат тапып, мени алдатты ве эмирнинъ ярдымынен мени ольдюрди.

¹² Бойлеликнен, Къанун азиздир, онынъ эмирлери де азиз, адалетли ве яхшыдыр.

¹³ Сонъ, яхшы бир шей манъа олюмни кетирдими? Мытлакъа ёкъ! Буны гуна япты. Яхшы бир шей ярдымынен манъа олюмни кетирип, гуна озюни ачыкътан косьтерди. Бойле этип, эмирнинъ ярдымынен гуна буюк къувет алды.

Гунанен олгъан куреш

¹⁴ Биз билемиз ки, Къанун Рухтан келе, мен исе бедени ве къаны олгъан адамым. Гуна мени сатын алды ве озюне къул япты.

¹⁵ Озюм япкъан ишлеримни анълап оламайым. Нени истесем, оны япмайым, нени кореджек козюм олмаса, оны япам.

¹⁶ Эгер истемеген шейни япсам, Къанун яхшы олгъаныны къабул этем.

¹⁷ Лякин бу ишлерни мен озюм дегиль, ичимде яшагъан гуна япа.

¹⁸ Билем ки, менде, яни беденимде яхшы шей олмай. Ичимде яхшылыкъ япмакъ истеги бар, амма оны япмагъа кучюм ёкъ.

¹⁹ Мен истеген яхшы ишни япмайым, истемеген яман ишни исе япам.

²⁰ Эгер истемеген ишни япсам, бу ишни мен озюм дегиль, ичимде яшагъан гуна япа.

²¹ Шунынъ ичюн, мен бойле бильдим: яхшылыкъ япмагъа истесем де, тек яманлыкъ япып олам.

²² Ичимдеки джаным Алланынъ Къанунына къувана да.

²³ Мен корем ки, беденим ве акъылым душманлыкъ эткен эки тюрлю къанунгъа коре арекет этелер, ве гуна мени беденимде арекет эткен къанунгъа коре эсир япа.

²⁴ Мен не къадар заваллым! Олюм кетирген бу беденден мени ким къуртараджакъ?

²⁵ Раббимиз Иса Месих ярдымынен Алла къуртараджакъ! Онъа шукюрлер олсун! Бойлеликнен, бир тарафтан, акъылым Алланынъ Къанунына къул олып, арекет эте, башкъа тарафтан исе, беденим гуна къанунынынъ къулу олып къала.