Римлилерге 12 - Мукъаддес Китап

Месихнинъ издешлерине ляйыкъ олгъаны киби яшанъыз

¹ Агъа-къардашларым, сизге Алланынъ мераметинен ялварам: тири ве азиз, Алла бегенген къурбанлыкъ киби, джанларынъызны Аллагъа беринъиз. Бойле ибадет акъикъийдир.

² Бу дюньягъа уйманъыз, амма, акъылынъыз янъы олгъан сайын, денъишинъиз ве Алланынъ яхшы, гузель ве къусурсыз истегенини сынап анъланъыз.

³ Манъа берильген эйиликнен эр биринъизге буны айтам: озюнъиз акъкъында олгъанынъыздан зияде тюшюнменъиз. Амма Алла эр бир адамгъа не къадар иман берген олса, шунъа коре алчакъгонъюлликнен озюнъизни тюшюнинъиз.

⁴ Бир беденнинъ мучелери чокъ, эр мученинъ исе озь иши бар.

⁵ Биз де, Месихнен берабер бир беден олып, бири-биримизге коре беденнинъ башкъа-башкъа мучелеримиз.

⁶ Бизге Алланынъ эйилигинен берильген къабилиетлер де башкъа-башкъадыр. Биревнинъ къабилиети пейгъамберлик этмек олса, иманына коре пейгъамберлик япсын.

⁷ Эгер хызмет этмек къабилиети олса, хызмет этсин; огретмек къабилиети олса, огретсин.

⁸ Ким гонъюль алмагъа уста олса, алсын. Бермеге севген адам ачыкъ юрекнен берсин. Ким башлыкъ олса, гъайретнен башлыкъ олсун. Мераметли олса, къуванчнен мераметлик япсын.

⁹ Севгинъиз джан-юректен олсун. Яманлыкъны кореджек козюнъиз олмасын, лякин яхшылыкъкъа япышынъыз.

¹⁰ Бири-биринъизни агъа-къардаш киби сыджакъ севгинен севинъиз, башкъаларына озюнъизден зияде сайгъы косьтеринъиз,

¹¹ гъайретинъизни эксильтменъиз, ичинъизде яшагъан Рухтан къызынъыз,

¹² умютнен къуванынъыз, кедерде сабырлы олунъыз, токътамайып дува окъунъыз,

¹³ ихтияджы олгъан иманлыларгъа ярдым этинъиз, мусафирчен олунъыз.

¹⁴ Сизлерни къувалагъанларгъа яхшылыкъ тиленъиз. Яхшылыкъ тиленъиз ве къаргъаманъыз.

¹⁵ Къувангъанларнен берабер къуванынъыз, агълагъанларнен берабер агъланъыз.

¹⁶ Озьара бир фикирде олунъыз. Къопай олманъыз, алчакъгонъюлли адамларнен дост олунъыз. Озюнъизни пек акъыллы деп сайманъыз.

¹⁷ Ич кимсенинъ яманлыгъына яманлыкънен къайтарманъыз. Бутюн адамлар яхшы сайгъан шейлерни япынъыз.

¹⁸ Эгер мумкюн олса, къолунъыздан кельгендже, бутюн адамларнен муаббет яшанъыз.

¹⁹ Севимли агъа-къардашларым, озьлеринъиз очь алманъыз, Алланынъ гъазабына ер беринъиз. Язылгъан ки: – Очь алмакъ Меним къолумда, джезасыны Мен берерим, – дей Рабби.

²⁰ Аксине, «душманынъ ач олса, онъа аш бер, сувсагъан олса, сув бер. Бойле япып, башына янгъан куллер киби топларсынъ».

²¹ Яманлыкъ сени енъмесин, лякин яманлыкъны яхшылыкънен енъ.