Римлилерге 10 - Мукъаддес Китап

¹ Агъа-къардашлар, мен керчектен джан-юректен исраиллилернинъ къуртулышы акъкъында Аллагъа ялварам.

² Мен шаатым: олар Аллагъа хызмет этмеге пек истейлер, амма догъру бильгини анъламайлар.

³ Алланынъ адамларны акълагъаныны анъламайып, озь арекетлеринен инсафлы олмагъа тырышалар ве, бойле этип, Алланынъ инсафлы истегине бойсунмайлар.

⁴ Месих исе – Къануннынъ сонъудыр. Иман эткен эр адам Алланынъ огюнде акълана.

⁵ Къанунны беджергенинен акъланмакъ акъкъында Муса бойле яза: «Низамнамелеримни ве къарарларымны беджерген адам оларнынъ ярдымынен яшайджакъ».

⁶ Иманы ичюн берильген инсафлыкъ акъкъында исе бойле айтыла: «Юрегинъде: “Месихни ерге кетирмек ичюн, кокке ким чыкъаджакъ?” – деп тюшюнме.

⁷ Я да “Месихни тирильтмек ичюн, ернинъ тюпсюзлигине ким тюшеджек?” – деп сорама».

⁸ Язы не айткъаныны эшитинъиз: «Алланынъ Сёзю санъа якъындыр, о сенинъ агъзынъда ве юрегинъдедир». Мына бу – биз огреткен иман акъкъындаки хабердир.

⁹ Эгер озь агъзынънен Исагъа Рабби десенъ ве юрегинънен Алла Оны тирильткенине инансанъ, къуртуладжакъсынъ.

¹⁰ Юрекнен иман этип, адам инсафлы деп сайыла, агъызнен Исагъа Рабби деп, къуртулыш ала.

¹¹ Языда айтыла ки, Онъа иман эткен ич кимсе утанмаз.

¹² Мында еудийлернен башкъа халкълар арасында фаркъы ёкъ. Рабби – эписининъ Раббисидир, Онынъ къолу Оны чагъыргъан адамларнынъ эписине ачыкътыр.

¹³ Раббининъ Адыны айтып чагъыргъан эр кес къуртуладжакъ.

¹⁴ Амма иманы олмагъанлар Оны насыл чагъыраджакълар? Онынъ акъкъында эшитмегенлер Онъа насыл иман этеджеклер? Хабер эткен адам олмаса, насыл эшитеджеклер?

¹⁵ Хабер этмеге ёлланылмасалар, насыл хабер этеджеклер? Язылгъаны киби, хайырлы хаберни кетиргеннинъ келюви не къадар хоштыр!

Исраиллилернинъ тек базылары Къуванчлы Хаберни къабул этти

¹⁶ Амма Къуванчлы Хаберни эписи къабул этмеди. Ешая бойле айта: «Я Рабби! Бизим хаберимизге ким инанды?»

¹⁷ Инанмакъ ичюн, биринджиден эшитмек керек, Месихнинъ сёзлерини эшитмектир.

¹⁸ Амма буны сорайым: олар эшитмедилерми? Эльбетте, эшиттилер! Языда айтыла ки, оларнынъ сеси бутюн ер юзюнден кечти, оларнынъ хабери дюньянынъ четине етти.

¹⁹ Даа сорайым: Исраиль анъламадымы? Биринджи олып, Муса бойле дей: «Мен сизлерни сиз танымагъан халкънен куньджю этеджегим, ахмакъ бир миллетнен ачувландыраджагъым».

²⁰ Ешая да догърудан Алланынъ сёзлерини айта: «Къыдырмагъанлар Мени тапты, истемегенлерге Озюмни ачыкъ косьтердим».

²¹ Амма Исраиль акъкъында Алла бойле дей: «Бойсунмагъан ве сёз динълемеген халкъкъа бутюн кунь къолларымны узатып тура эдим».