Нун огълу Ехошуа 9 - Мукъаддес Китап

Гивонлыларнынъ айнеджилиги

¹ Иорданнынъ гъарбий тарафында, дагъларда, тегиз ерлерде ве Акъ денъизнинъ бутюн ялысы боюнда Ливангъа баргъандже олгъан хитлилернинъ, аморлыларнынъ, ханаанлыларнынъ, перизлилернинъ, хивлилернинъ ве евуслыларнынъ падишалары буны эшиттилер.

² Сонъ олар Ехошуа ве Исраильге къаршы берабер дженк этмек ичюн бирлештилер.

³ Лякин Гивоннынъ адамлары, Ехошуа Ай ве Ерихон шеэрлеринен нелер япкъаныны эшитип,

⁴ айнеджиликке урулдылар. Янларына аш алып ёлгъа чыкътылар, эшеклерининъ устюне эски чувалларны ве эски йыртыкъ ве ямалгъан шарап мешин торбаларыны юкледилер.

⁵ Аякъларындаки аякъкъаплары эски ве ямалгъан, устьлериндеки урбалары эски-пуськю, ёллукъ отьмеклери де къатты ве куфленген эди.

⁶ Бойле этип, олар Гилгалгъа Ехошуанынъ ордусына кельдилер де, онъа ве эписи исраиллилерге: – Биз баягъы узакъ яткъан топракътан кельдик. Бизнен барышыкъ шартнамеси тизинъиз, – дедилер.

⁷ Исраиллилер исе хивлилерге: – Бельки сиз янымызда яшайсынъыз. Насыл этип биз сизлернен барышыкъ шартнамеси тизмек мумкюнмиз? – деп джевап бердилер.

⁸ Олар Ехошуагъа: – Биз сенинъ къулларынъ оламыз, – дедилер. – Сиз кимсиз ве къайдан кельдинъиз? – деп сорады олардан Ехошуа.

⁹ – Биз, сенинъ къулларынъ, Алланъ олгъан РАББИнинъ Намы ичюн, баягъы узакъ яткъан топракътан кельдик, чюнки биз Онынъ Намы ве Мысырда Онынъ бутюн япкъанлары акъкъында эшиттик.

¹⁰ Иорданнынъ башкъа тарафында олгъан эки аморлы падишаларгъа: Хешбон падишасы олгъан Сихонгъа ве Башан падишасы олгъан, Аштарот шеэринде акимлик япкъан Оггъа РАББИнинъ бутюн япкъанлары акъкъында эшиттик.

¹¹ Сонъ бизим акъсакъалларымыз ве эписи топрагъымызда яшагъанлар бизге бойле дедилер: «Къолларынъызгъа ёллукъ отьмеклерини алып, оларнынъ къаршысына кетинъиз ве оларгъа: “Биз сизинъ къулларынъыз, бизнен барышыкъ шартнамеси тизинъиз”, – айтынъыз».

¹² Мына бизим пителеримиз. Сизге кельмек ичюн биз эвден чыкъкъан куню олар даа сыджакъ эдилер, шимди исе мына, къуруп куфленип къалдылар.

¹³ Мешин торбалары да, оларны шарапкъа толдургъанымызда, даа янъы эдилер, энди исе йыртылдылар, устюмиздеки урба ве аякъкъапларымыз да баягъы узакъ ёлдан эски олдылар, – дедилер олар.

¹⁴ Исраиллилер ёллукъ ашларыны козьден кечирдилер, амма РАББИден акъыл сорамадылар.

¹⁵ Ехошуа оларнен барышыкъ шартнамесини тизди, оларны сагъ-селямет къалдыраджагъында сёз берди. Джемаатнынъ башлыкълары да бунъа емин эттилер.

¹⁶ Барышыкъ шартнамесини тизгенден сонъ учь кунь кечкенинен, исраиллилер о адамлар янларында яшагъан къомшулары олгъаныны эшиттилер.

¹⁷ Исраиллилер ёлгъа чыкъып, учюнджи куню хивлилернинъ шеэрлери Гивон, Кефира, Беэрот ве Кирьят-Ярим янына кельдилер.

¹⁸ Лякин Исраиль огъуллары оларны йыкъмадылар, чюнки джемаатнынъ башлыкълары Исраильнинъ Алласы олгъан РАББИнинъ Адынен оларны тиймемеге емин эткен эдилер. Бутюн джемаат башлыкъларына къаршы лаф этип башладылар.

¹⁹ Башлыкъларнынъ эписи исе халкъкъа: – Биз оларгъа Исраильнинъ Алласы олгъан РАББИнинъ огюнде ант эттик, онынъ ичюн биз оларгъа тийип оламаймыз.

²⁰ Оларгъа мына не япайыкъ: ант эткен еминимиз ичюн башларымызгъа беля тюшмесин деп, биз оларны сагъ-селямет къалдырайыкъ, – дедилер

²¹ ве: – Яшасынлар. Лякин джемаат башлыкълары айткъаны киби, бутюн джемаат ичюн одун парламагъа ве сув чекмеге меджбур олсунлар, – деп къоштылар.

²² Ехошуа хивлилерни янына чагъырып, оларгъа: – Сиз не мана, янымызда яшап, «биз сизден баягъы узакъта отурамыз», деп ялан айттынъыз?

²³ Бунынъ ичюн лянет олунъыз! Эр вакъыт къул олып, Алламнынъ эви ичюн одун парлап, сув ташыйджакъсынъыз, – деди.

²⁴ Олар Ехошуагъа бойле джевап къайтардылар: – Алланъ олгъан РАББИ къулу Мусагъа: «Исраиллилерге бутюн топракъны бер ве бу топракънынъ эписи сакинлерини ольдюр», – буюргъаны бизге, къулларынъа белли олды. Шунынъ ичюн, бизни ольдюрирсинъиз, деп отюмиз патлады, ве биз буны яптыкъ.

²⁵ Энди исе сенинъ къолунъдамыз. Бизлернен насыл догъру ве адалетли сайсанъ, ойле де яп.

²⁶ Ехошуа хивлилерни Исраиль огъулларынынъ къолларындан азат этти, ве олар ольдюрильмедилер.

²⁷ О куню де Ехошуа оларгъа бутюн джемаат ичюн ве РАББИ сайлап алгъан ерде олгъан къурбан ери ичюн одун кесмекни ве сув ташымакъны буюрды. Олар буны бу куньге къадар япалар.