Нун огълу Ехошуа 4 - Мукъаддес Китап

Хатыра ташлары

¹ Бутюн халкъ Иордан озенинден кечкен сонъ, РАББИ Ехошуагъа:

² – Халкътан он эки адамны, эр бир къабилесинден бирер адамны алып,

³ оларгъа буюрынъыз, мындан, Иордан озенининъ ортасындан, руханийлер къыбырдамайып тургъан ерден он эки таш алсынлар. О ташларны алып, бу гедже геджелейджек еринъизге тиклеп къойсунлар, – деди.

⁴ Ехошуа Исраиль огъулларындан, эр бир къабиледен бирер сайлангъан он эки адамны янына чагъырды

⁵ ве оларгъа: – Алланъыз олгъан РАББИнинъ Сандыгъы огюнден кетип, Иорданнынъ ортасына барынъыз, – деди. – Андан, исраиллилернинъ къабилелери сайысына коре бирер таш алып, эр биринъиз омузынъызгъа къоюнъыз.

⁶ Олар сизде алямет олсунлар. Келеджекте огъулларынъыз сизден: «Бу ташларнынъ манасы не я?» – деп сорагъанларында,

⁷ оларгъа: «Манасы будыр: Иордан озенининъ сувлары РАББИнинъ Васиет Сандыгъы огюнде экиге болюнди. Сандыкъ озенден кечеяткъан вакъытта, Иорданнынъ сувлары экиге болюнди. Бойлеликнен, бу ташлар эр вакъыт Исраиль огъуллары ичюн хатыра оладжакълар», – айтынъыз.

⁸ Исраиль огъуллары Ехошуа буюргъанына коре яптылар. РАББИ Ехошуагъа айткъаны киби, олар Исраиль огъулларынынъ къабиле сайысына коре, Иордан ортасындан он эки ташны алып, оларны геджелейджек ерлерине алып кеттилер ве анда къойдылар.

⁹ Ехошуа Васиет Сандыгъыны ташыгъан руханийлер къыбырдамайып тургъан ерлерине, Иорданнынъ ортасына даа он эки ташны къойды. Олар бугунь де андалар.

¹⁰ Сандыкъны ташыгъан руханийлер Иорданнынъ ортасында тура эдилер. Муса Ехошуагъа буюргъанлары ве РАББИ Ехошуагъа халкъкъа айтмагъа буюргъан эр бир шей ерине кельди. Халкъ исе тез-тез озенден кечти.

¹¹ Бутюн халкъ кечкен сонъ, руханийлер де РАББИнинъ Сандыгъыны кечирдилер. Халкъ бунъа бакъа эди.

¹² Силялангъан рубенлилер, гъадлылар ве Менашше къабилесининъ ярысы, Муса айткъаны дайын, исраиллилернинъ огюнден кечтилер.

¹³ Къыркъ бинъге якъын дженкке силялангъан аскер дженк этмек ичюн, РАББИнинъ огюнде Ерихоннынъ тегиз ерлерине кеттилер.

¹⁴ О куню РАББИ Ехошуаны бутюн Исраильнинъ козю огюнде шуретледи. Бундан сонъ халкъ, Мусадан къоркъкъаны дайын, Ехошуадан да онынъ омрю боюнджа къоркътылар.

¹⁵ РАББИ Ехошуагъа:

¹⁶ – Эмир эт, Шаатлыкъ Сандыгъыны ташыгъан руханийлер Иордан озенинден чыкъсынлар, – деди.

¹⁷ Ехошуа руханийлерге: – Иордандан чыкъынъыз, – деп эмир берди.

¹⁸ РАББИнинъ Васиет Сандыгъыны ташыгъан руханийлер Иордан озени ортасындан чыкъып, оларнынъ табанлары къуру ялыгъа баскъанларынен, Иорданнынъ сувлары озь ёлунен, тюневин ве обирскунь олгъаны дайын, бутюн ялыларындан толып-ташып акъа башлады.

¹⁹ Бойлеликнен, биринджи айнынъ онунджы куню халкъ Иордан озенинден кечти ве Ерихоннынъ шаркъ тарафында яткъан Гилгал янында ордунен турды.

²⁰ Иордандан алгъан он эки ташны Ехошуа Гилгал еринде къойды

²¹ ве Исраиль огъулларына бойле деди: – Келеджекте огъулларынъыз сизден: «Бу ташларнынъ манасы не я?» – деп сорагъанларында,

²² огъулларынъызгъа бойле анълатынъыз: «Исраиль Иордан озенининъ ортасындан къуру ерден кечти.

²³ Сизлер кечмегендже, Алланъыз олгъан РАББИ Иорданнынъ сувларыны къурутты. Бойле этип, бизлер кечмегендже, Алланъыз олгъан РАББИ огюмизден Къызыл денъизни де къуруткъан эди.

²⁴ Шунынъ ичюн ер юзюндеки бутюн халкълар бильсинлер: РАББИнинъ къолу кучьлюдир. Сизлер исе омрюнъиз боюнджа Алланъыз олгъан РАББИден къоркъунъыз».