Нун огълу Ехошуа 22 - Мукъаддес Китап

Нун огълу Ехошуа Иордан озенининъ шаркъ тарафында яшагъан къабилелерни эвге йибере

¹ О вакъыт Ехошуа Рубен къабилесини, Гъад къабилесини ве Менашше къабилесининъ ярысыны озюне чагъыртып,

² оларгъа бойле деди: – РАББИнинъ къулу Муса сизге буюргъанларынынъ эписини беджердинъиз, эр бир эмиримни туттынъыз.

³ Чокъ вакъыт девамында, бу куньге къадар агъа-къардашларынъызны къалдырмайып, Алланъыз олгъан РАББИнинъ эр бир эмирини ерине кетирдинъиз.

⁴ Энди РАББИ, сёз бергени дайын, агъа-къардашларынъызгъа раатлыкъ берди. Онынъ ичюн шимди чадырларынъызгъа, Иорданнынъ башкъа тарафына, РАББИнинъ къулу Муса сизге берген топракъкъа къайтынъыз.

⁵ Ялынъыз, РАББИнинъ къулу Муса сизге буюргъан Къанунны ве эмирлерни беджермеге тырышынъыз: Алланъыз олгъан РАББИни севинъиз, Онынъ ёлларындан юрюнъиз, эмирлерини беджеринъиз, РАББИге япышып, Онъа джан-юректен хызмет этинъиз.

⁶ Сонъ Ехошуа эр кеске яхшылыкъ тилеп, оларны йиберди, ве олар озь чадырларына къайтып кеттилер.

⁷ Муса Менашше къабилесининъ ярысына топракъ пайыны Башанда берди, къалгъан ярысына исе Иорданнынъ гъарбий тарафында, агъа-къардашларынен берабер топракъ пайыны берди. Оларны чадырларына йибергенинде, Ехошуа оларгъа яхшылыкъ тилеп:

⁸ – Чадырларынъызгъа буюк байлыкънен къайтасынъыз. Сизде энди чокътан-чокъ айванлар, кумюш, алтын, бакъыр, демир ве чокътан-чокъ урба бар. Душманларынъыздан алгъан гъаниметинъизнен агъа-къардашларынъызнен болюшинъиз, – деди.

⁹ Сонъ Рубен огъуллары, Гъад огъуллары ве Менашше къабилесининъ ярысы Ханаан топрагъында ерлешкен Шило шеэринден, Исраиль огъулларындан кеттилер ве Гиладгъа, озьлерининъ пайы олгъан топракъкъа, РАББИ Мусанен айттыргъан эмирине коре запт этильген топракъларына къайттылар.

Иордан озени янындаки къурбан ери

¹⁰ Рубен огъуллары, Гъад огъуллары ве Менашше къабилесининъ ярысы Ханаан топрагъында ерлешкен, Иордан озенининъ янында олгъан Гелилот ерине келип, Иорданнынъ янында улу сыфатлы къурбан ерини къурдылар.

¹¹ Рубен огъуллары, Гъад огъуллары ве Менашше къабилесининъ ярысы Ханаан топрагъында, Иорданнынъ янында олгъан Гелилотта, исраиллилернинъ къаршысында къурбан ерини къургъаны акъкъында исраиллилер эшиттилер.

¹² Буны эшитип, Исраиль огъулларынынъ бутюн джемааты Шилода топлашып, оларгъа къаршы дженк этмеге азырландылар.

¹³ Лякин Исраиль огъуллары дженк этмезден эвель, Рубен огъулларына, Гъад огъулларына ве Менашше къабилесининъ ярысына Гилад топрагъына руханий Элазарнынъ огълу Пинехасны ёлладылар.

¹⁴ Онен берабер он башлыкъ, Исраильнинъ эписи къабилелеринден бирер къабиле башлыгъы кеттилер. Олар Исраильнинъ сой башлыкълары эдилер.

¹⁵ Рубен огъулларына, Гъад огъулларына ве Менашше къабилесининъ ярысына Гилад топрагъына келип, оларгъа бойле дедилер:

¹⁶ – РАББИнинъ бутюн джемааты бойле айта: Шимди РАББИге къаршы турып, озюнъизге къурбан ерини къурып, Исраильнинъ Алласы олгъан РАББИден юзюнъизни чевирип, Онынъ огюнде не къадар хаинлик эттинъиз.

¹⁷ Бизге бу куньге къадар арынмагъа чаре бермеген, РАББИнинъ джемаатыны белягъа огъраткъан Пеорнынъ гунасы сизге етмезми?

¹⁸ Сиз бугунь РАББИден юзюнъизни чевиресинъизми? Бугунь сиз РАББИге къаршы турасынъыз, ярын исе бутюн Исраиль джемаатына къаршы РАББИнинъ гъазабы къозгъар.

¹⁹ Эгер алгъан топрагъынъыз сизге арам деп корюльсе, РАББИнен Корюшюв Чадыры тургъан топракъкъа кечип, бизим арамыздан топракъ пайыны алынъыз. Тек, Алламыз олгъан РАББИнинъ къурбан еринден гъайры башкъа къурбан ерини къурманъыз, РАББИге къаршы ве бизге къаршы турманъыз.

²⁰ Ёкъ этиледжек шейлерден алып, джинает эткен Зерахнынъ огълу Акъан бир озю дегиль эдими? РАББИнинъ гъазабы исе бутюн Исраиль джемаатына олды. Озь хаинлиги ичюн о, бир озю ольмеди.

²¹ Рубен огъуллары, Гъад огъуллары ве Менашше къабилесининъ ярысы Исраиль бинъбашыларына бойле джевап бердилер:

²² – Аллаларнынъ Алласы – РАББИ, аллаларнынъ Алласы – РАББИдир! О, биле, эм Исраиль де бильсин! Эгер биз бугунь РАББИге къаршы турып, ондан юзюмизни чевирсек, РАББИ бизни бугунь аджымасын!

²³ РАББИден юзюмизни чевирмек, къурбан айванларыны бутюнлей якъмакъ, отьмек бахшышларыны кетирмек ве аманлыкъ къурбанларыны чалмакъ ичюн къурбан ерини къургъан олсакъ, бизден РАББИнинъ Озю сорасын!

²⁴ Биз буны, илериде сизинъ огъулларынъыз бизим огъулларымызгъа: «Сизинъ Исраиль Алласы, РАББИнен не алып береджегинъиз бар?

²⁵ Эй, Рубен огъуллары ве Гъад огъуллары, РАББИ бизим ве сизинъ ортанъызгъа сынъыр оларакъ Иорданны къойды. РАББИде сизинъ къысметинъиз ёкътыр», – айткъанларындан къоркъып, яптыкъ. Бойледже, огъулларынъыз бизим огъулларымызгъа РАББИге ибадет этмек ичюн ёл бермез эдилер.

²⁶ Онынъ ичюн биз бойле деп тюшюндик: озьлеримизге къурбан ери къурайыкъ, лякин бутюнлей якъыладжакъ къурбанларны чалмайджакъмыз, анда башкъа къурбанларны да кетирмейджекмиз.

²⁷ О бизге, сизге ве келеджектеки несиллеримизге шаат олсун: биз де акъикъий къурбан еринде бутюнлей якъыладжакъ къурбанларны ве башкъа къурбанларны кетирмек ве аманлыкъ къурбанларыны чалмакъ ве бойледже РАББИге хызмет этмек мумкюнмиз. Сонъ сизинъ огъулларынъыз бизим огъулларымызгъа: «РАББИде сизинъ къысметинъиз ёкътыр», – айтмазлар.

²⁸ Биз бойле тюшюндик: эгер олар келеджекте бизге ве бизим несиллеримизге бойле айтсалар, биз оларгъа бойле джевап къайтарырмыз: «Мына бу РАББИнинъ къурбан ерине ошагъан шейни коресинъизми? Деделеримиз оны, къурбанларны бутюнлей якъмакъ я да башкъа къурбанлар кетирмек ичюн къурмагъанлар. О, сизнен бизим арамызда шаат олмакъ ичюн къурулгъандыр».

²⁹ Биз РАББИге къаршы турып, бугунь РАББИден юзюмизни чевиреджегимиз ёкъ! Къурбанларны бутюнлей якъмакъ, отьмек бахшышларыны кетирмек ве башкъа къурбанларны чалмакъ ичюн Корюшюв Чадырынынъ огюндеки РАББИ-Таалямызнынъ къурбан еринден гъайры башкъа бир къурбан ерини ич бир вакъыт къураджагъымыз ёкъ!

³⁰ Руханий Пинехас ве онен берабер олгъан джемаат башлыкълары ве Исраиль бинъбашылары Рубен огъулларынынъ, Гъад огъулларынынъ ве Менашше огъулларынынъ айткъанларыны эшитип бегендилер.

³¹ Элазарнынъ огълу руханий Пинехас Рубен огъулларына, Гъад огъулларына ве Менашше огъулларына: – Бугунь бизим арамызда РАББИ олгъаныны ве сиз РАББИге къаршы бу джинаетни этмегенинъизни бильдик. Энди сиз Исраиль огъулларыны РАББИнинъ къолундан къуртардынъыз, – деди.

³² Элазар огълу руханий Пинехас ве исраиллилернинъ башлыкълары Рубен огъулларындан ве Гъад огъулларындан, Гилад топрагъындан Ханаан топрагъына къайттылар ве Исраиль огъулларына джевап кетирдилер.

³³ Исраиль огъуллары буны бегендилер ве Аллагъа шукюр этип, Рубен огъулларына ве Гъад огъулларына къаршы дженкнен чыкъмакъ ве яшагъан топракъларыны тар-мар этмек фикиринден вазгечтилер.

³⁴ Рубен ве Гъад огъуллары: «О, бизим шаатымыздыр: Алла – РАББИдир», – дегенлери ичюн, къурбан ерини «Шаат» деп адландырдылар.